తాడేప‌ల్లి: పరీక్షల కోసం లక్షలాది మంది అభ్యర్థులు ఏళ్ల తరబడి కష్టపడుతున్నారు. తమ కుటుంబాల ఆర్థిక భారాన్ని భరిస్తూ, నిజాయితీగా ఉద్యోగం సాధించాలనే లక్ష్యంతో శ్రమిస్తున్నారు. కానీ నియామక వ్యవస్థలో అక్రమాలు చోటుచేసుకుంటే వారి భవిష్యత్తుతో పాటు మొత్తం పరీక్షల వ్యవస్థపై నమ్మకం దెబ్బతింటుంది. వైయ‌స్ఆర్‌సీపీ అధ్యక్షుడు, మాజీ ముఖ్యమంత్రి వైయస్ జగన్‌మోహన్‌రెడ్డి సోషల్‌ మీడియా వేదికగా ముఖ్యమంత్రి చంద్రబాబు నాయుడిని ప్రశ్నించారు. అభ్యర్థుల కష్టానికి న్యాయం చేయాల్సిన బాధ్యత ప్రభుత్వానిది “చంద్రబాబు గారూ.. న్యాయంగా పరీక్షలు నిర్వహించి, అర్హులకు అవకాశం కల్పించడం ప్రభుత్వానికి ఇష్టాయిష్టాలకు సంబంధించిన విషయం కాదు. అది ప్రభుత్వ బాధ్యత. మరి, ఏళ్ల తరబడి కష్టపడి చదివిన అభ్యర్థుల శ్రమకు న్యాయం చేయాల్సిన బాధ్యత మీకు లేదా? డీఎస్సీలో ఇప్పుడు వెలుగులోకి వస్తున్న కుంభకోణానికి మీరు బాధ్యత వహిస్తారా?” అని వైయస్ జగన్ ప్రశ్నించారు. లక్షలాది అభ్యర్థుల భవిష్యత్తుతో ముడిపడిన అంశం పరీక్షల నిర్వహణలో పారదర్శకత, నిష్పక్షపాతత్వం లేకపోతే అర్హత ఉన్న అభ్యర్థులకు అన్యాయం జరుగుతుంది. ఉద్యోగం కోసం ఎదురుచూస్తున్న యువతలో వ్యవస్థపై నమ్మకం కోల్పోయే పరిస్థితి ఏర్పడుతుంది. డీఎస్సీ వ్యవహారంపై ప్రభుత్వం పూర్తి బాధ్యత వహించి, అభ్యర్థుల కష్టానికి న్యాయం చేయాల్సిన అవసరం ఉంది.
