తాడేప‌ల్లి: సుప్రీంకోర్టు ఆదేశాలను స్వాగతించిన వైయ‌స్ఆర్‌సీపీ సీనియర్‌ నేతలు, రాష్ట్రంలోని 19 మున్సిపాలిటీల్లో నామినేషన్ల ప్రక్రియలో ఎదురైన అడ్డంకుల నేపథ్యంలో అభ్యర్థులకు మరో అవకాశం కల్పించడాన్ని ప్రజాస్వామ్య పరిరక్షణకు కీలక పరిణామంగా అభివర్ణించారు. నామినేషన్లు వేయకుండా అడ్డుకోవడం, దాడులు, బెదిరింపుల ఘటనలపై న్యాయస్థానం జోక్యం చేసుకోవాల్సిన పరిస్థితి రావడం రాష్ట్ర ఎన్నికల వ్యవస్థ తీరుపై ప్రశ్నలు లేవనెత్తుతోందని పేర్కొన్నారు. అభ్యర్థులకు తగిన భద్రత కల్పించి, నామినేషన్లను స్వీకరించేలా చర్యలు తీసుకోవాలని, పోలీసు, రెవెన్యూ అధికారులు రాజకీయ ఒత్తిళ్లకు తలొగ్గకుండా చట్టప్రకారం విధులు నిర్వర్తించాలని స్పష్టం చేశారు. సుప్రీంకోర్టు ఆదేశాలను నిష్పక్షపాతంగా అమలు చేసి, ప్రతి అభ్యర్థికి సమాన అవకాశాలు కల్పించాలని వారు కోరారు. సుప్రీంకోర్టు ఆదేశాలు ప్రభుత్వానికి చెంపపెట్టు: పెద్దిరెడ్డి రామచంద్రారెడ్డి, ఎమ్మెల్యే, వైయ‌స్ఆర్‌సీపీ రీజినల్‌ కోఆర్డినేటర్‌ సుప్రీంకోర్టు ఇచ్చిన తీర్పు ప్రజాస్వామ్యాన్ని కాపాడే గొప్ప చర్య. ప్రజాస్వామ్యంలో ప్రతిపక్షానికి కూడా సమాన అవకాశాలు కల్పించాలనే సందేశాన్ని ఈ తీర్పు ఇచ్చింది. చంద్రబాబు ప్రభుత్వానికి అనుకూలంగా వ్యవహరిస్తూ వైయ‌స్ఆర్‌సీపీ అభ్యర్థులను నామినేషన్లు వేయకుండా అడ్డుకుంటున్న పోలీసు, అధికారుల తీరుకు సుప్రీంకోర్టు ఆదేశాలు చెంపపెట్టు కావాలి. 19 మున్సిపాలిటీల్లో నామినేషన్ల స్వీకరణకు మరో అవకాశం కల్పించడాన్ని స్వాగతిస్తున్నాం. నామినేషన్‌ కేంద్రాల వద్ద అభ్యర్థులను, వారి ప్రతిపాదకులను అడ్డుకోవడం తక్షణమే ఆపి, అందరికీ సమాన అవకాశాలు కల్పించాలి. ఎంపీ మిథున్‌రెడ్డిపై ఐదు కేసులు నమోదు చేయడం, దాడులకు గురైన వైయ‌స్ఆర్‌సీపీ కార్యకర్తలపైనే కేసులు పెట్టడం వంటి అంశాలను తీవ్రంగా పరిగణించాలి. నామినేషన్లు స్వీకరించకపోతే కలెక్టర్లను ఆశ్రయిస్తాం. అవసరమైతే మరోసారి న్యాయస్థానాన్ని ఆశ్రయించి ప్రజాస్వామ్య హక్కుల కోసం పోరాడతాం. సుప్రీం తీర్పు చూసైనా చంద్రబాబు కళ్లు తెరవాలి: పెద్దిరెడ్డి మిథున్‌రెడ్డి, వైయ‌స్ఆర్‌సీపీ లోక్‌సభా పక్ష నేత సుప్రీంకోర్టు ఆదేశాలను స్వాగతిస్తున్నాం. నామినేషన్లు దాఖలు చేయకుండా అడ్డుకున్న మున్సిపాలిటీల్లో భద్రత కల్పించి, కలెక్టర్ల సమక్షంలో నామినేషన్లు స్వీకరించాలని ఆదేశించడం ప్రజాస్వామ్య పరిరక్షణకు కీలక నిర్ణయం. ఇప్పటికైనా చంద్రబాబు ప్రభుత్వం కక్షపూరిత రాజకీయాలను పక్కనపెట్టి, ప్రశాంతంగా ఉన్న పల్లెల్లో గొడవలు సృష్టించడం, నామినేషన్లను అడ్డుకోవడం వంటి చర్యలను ఆపాలి. మహిళలపై దాడులు చేస్తూ, ప్రజలను రెచ్చగొడుతూ ఏకగ్రీవాల కోసం ప్రయత్నించడం ఎంతవరకు సమంజసమో చంద్రబాబు, లోకేష్ సమాధానం చెప్పాలి. అధికారులు రాజకీయ ఒత్తిళ్లకు తలొగ్గి చట్టవిరుద్ధంగా వ్యవహరించకుండా, ఏ పార్టీ అధికారంలో ఉన్నా రాజ్యాంగం, ప్రజాస్వామ్య వ్యవస్థలను కాపాడాలి. టీడీపీ నాయకులు కూడా గొడవలకు దిగకుండా ఆలోచించాలి. అధికారం శాశ్వతం కాదనే విషయాన్ని గుర్తుంచుకోవాలి. ప్రతి అభ్యర్థికి నామినేషన్‌ వేసే అవకాశం కల్పించి, ఎన్నికలు ప్రశాంతంగా, ప్రజాస్వామ్యబద్ధంగా జరిగేలా ప్రభుత్వం, అధికారులు తక్షణ చర్యలు తీసుకోవాలి. ఎన్నికలు సజావుగా జరుగుతున్నాయని చంద్రబాబు ఇప్పుడు చెప్పగలడా?: భూమన కరుణాకర్‌రెడ్డి, వైయ‌స్ఆర్‌సీపీ రీజినల్‌ కోఆర్డినేటర్‌ సుప్రీంకోర్టు ఆదేశాలను స్వాగతిస్తున్నాం. నామినేషన్లు వేయలేకపోయిన చోట్ల అభ్యర్థులకు మరో అవకాశం కల్పించడం, పోలీసు భద్రతతో పాటు సీసీ కెమెరాలు ఏర్పాటు చేయాలని ఆదేశించడం చంద్రబాబు ప్రభుత్వానికి చెంపపెట్టు. రాష్ట్రంలో ఎన్నికలు సజావుగా జరుగుతున్నాయని చెబుతున్న చంద్రబాబు, నామినేషన్ల ప్రక్రియలో హింసాత్మక పరిస్థితులు ఏర్పడటంతో సుప్రీంకోర్టు జోక్యం చేసుకోవాల్సిన అవసరం ఎందుకు వచ్చిందో సమాధానం చెప్పాలి. ప్రభుత్వం, పోలీసు వ్యవస్థ, రాష్ట్ర ఎన్నికల సంఘం కుమ్మక్కై వైయ‌స్ఆర్‌సీపీ అభ్యర్థులను నామినేషన్లు వేయకుండా అడ్డుకున్నాయని, దాడులు, బెదిరింపులతో ప్రజాస్వామ్యాన్ని అపహాస్యం చేశారని మేము ఆధారాలతో సహా న్యాయస్థానం దృష్టికి తీసుకెళ్లాం. మహిళలపై దాడులు, అభ్యర్థులపై దౌర్జన్యాలు, నామినేషన్‌ పత్రాలను అడ్డుకోవడం వంటి ఘటనలకు సంబంధించిన ఆధారాలను సమర్పించాం. ఎన్నికల సంఘం, పోలీసు అధికారులు నిష్పాక్షికంగా వ్యవహరించి తమ బాధ్యతలను చట్టప్రకారం నిర్వర్తించాలి. అధికార పార్టీకి అనుకూలంగా వ్యవహరిస్తే చట్టపరమైన పరిణామాలను ఎదుర్కోవాల్సి వస్తుంది. ప్రతి అభ్యర్థికి సమాన అవకాశం కల్పించి, స్థానిక సంస్థల ఎన్నికలు ప్రహసనంగా మారకుండా చూడాలి.
