ఆళ్లగడ్డ: ఆళ్లగడ్డ మున్సిపాలిటీలో వైయ‌స్ఆర్‌సీపీ అభ్యర్థి నామినేషన్ పత్రాలను టీడీపీ నేత భూమా విఖ్యాత్‌రెడ్డి దౌర్జన్యంగా చించివేశారని వైయ‌స్ఆర్‌సీపీ నేతలు ఆరోపించారు. ఈ విషయం తెలుసుకున్న మాజీ ఎమ్మెల్సీ గంగుల ప్రభాకర్‌రెడ్డి, మాజీ ఎమ్మెల్యే గంగుల బిజేంద్రారెడ్డి కార్యాలయానికి చేరుకున్నారు. నామినేషన్ పత్రాలు చించివేసిన ఘటనకు సంబంధించిన సీసీటీవీ ఫుటేజీ చూపించాలని కోరినా అధికారులు చూపించడం లేదంటూ గంగుల ప్రభాకర్‌రెడ్డి ఆగ్రహం వ్యక్తం చేశారు. ఇలాంటి రౌడీయిజం, చిల్లర చేష్టలు మానుకోవాలని గంగుల బిజేంద్రారెడ్డి హెచ్చరించారు. టీడీపీ తరఫున పోటీ చేసేందుకు అభ్యర్థులు లేకపోతే, వైయ‌స్ఆర్‌సీపీ నుంచి 32 మంది అభ్యర్థులను బరిలోకి దించి గెలిపించుకుంటామని ఆయన సవాల్ విసిరారు. గుత్తిలో వైయ‌స్ఆర్‌సీపీ నేత గంటా నరహరిపై దాడికి యత్నం అనంతపురం: గుత్తిలో వైయ‌స్ఆర్‌సీపీ రాష్ట్ర అధికార ప్రతినిధి గంటా నరహరిపై దాడికి యత్నం జరిగినట్లు సమాచారం. నామినేషన్ పత్రాల కోసం గుత్తి మున్సిపల్ కార్యాలయానికి వెళ్లిన ఆయనపై టీడీపీ ఎమ్మెల్యే గుమ్మనూరు జయరాం వర్గీయులు రాళ్లతో దాడి చేసినట్లు వైయ‌స్ఆర్‌సీపీ వర్గాలు ఆరోపించాయి. ఈ ఘటనలో గంటా నరహరి కారుకు చెందిన అద్దాలు ధ్వంసమైనట్లు సమాచారం. నామినేషన్ల ప్రక్రియ సందర్భంగా ఇలాంటి ఘటనలు చోటుచేసుకోవడంపై వైయ‌స్ఆర్‌సీపీ శ్రేణులు ఆందోళన వ్యక్తం చేశాయి. ఎన్నికలు ప్రశాంతంగా జరిగేలా అధికారులు చర్యలు తీసుకోవాలని కోరాయి.
