తాడేపల్లి : రాష్ట్రంలో ఖాళీగా ఉన్న పోలీస్ ఉద్యోగాలను తక్షణమే భర్తీ చేయాలని కోరుతూ ఆంధ్రప్రదేశ్ విద్యార్థి, నిరుద్యోగ, యువజన జేఏసీ ప్రతినిధులు మాజీ ముఖ్యమంత్రి, వైయస్ఆర్సీపీ అధ్యక్షుడు వైయస్ జగన్ను గురువారం తాడేపల్లిలోని పార్టీ కేంద్ర కార్యాలయంలో కలిశారు. రాష్ట్రంలో సుమారు 20 వేల పోలీస్ పోస్టులు ఖాళీగా ఉన్నాయని, వాటిలో కనీసం 10 వేల పోస్టులను వెంటనే భర్తీ చేసేలా ప్రభుత్వంపై ఒత్తిడి తీసుకురావాలని కోరుతూ వినతిపత్రం సమర్పించారు. అలాగే పోలీస్ ఉద్యోగాలకు సిద్ధమవుతున్న అభ్యర్థుల గరిష్ట వయోపరిమితిని 35 సంవత్సరాలకు పెంచేలా ప్రభుత్వాన్ని డిమాండ్ చేయాలని విజ్ఞప్తి చేశారు. నిరుద్యోగుల ఆవేదనను వివరించిన జేఏసీ ఏపీఎస్యూ జేఏసీ కన్వీనర్ ఎంబేటి రామచంద్ర ఆధ్వర్యంలో వచ్చిన ప్రతినిధులు మాట్లాడుతూ, రాష్ట్రంలో లక్షలాది మంది యువత ఎన్నో సంవత్సరాలుగా పోలీస్ ఉద్యోగాల కోసం కఠోరంగా శిక్షణ పొందుతున్నారని తెలిపారు. కూటమి ప్రభుత్వం అధికారంలోకి వచ్చిన తర్వాత ఉద్యోగాల భర్తీపై ఎలాంటి చర్యలు చేపట్టకపోవడంతో నిరుద్యోగులు తీవ్ర నిరాశలో ఉన్నారని పేర్కొన్నారు. ఉద్యోగాల కోసం శిక్షణ, కోచింగ్లకు భారీగా ఖర్చు చేసిన అభ్యర్థులు, వారి కుటుంబాలు ఆర్థికంగా తీవ్ర ఇబ్బందులు ఎదుర్కొంటున్నాయని వివరించారు. వయోపరిమితి పెంపు అవసరమని విజ్ఞప్తి 2022లో చివరిసారిగా పోలీస్ నియామకాల నోటిఫికేషన్ విడుదలైందని, అప్పటి నుంచి కొత్త నోటిఫికేషన్ రాకపోవడంతో వేలాది మంది అభ్యర్థులు ఆందోళన చెందుతున్నారని జేఏసీ ప్రతినిధులు తెలిపారు. ప్రభుత్వ ఆలస్యం కారణంగా ప్రస్తుతం అమల్లో ఉన్న వయోపరిమితి వల్ల అనేక మంది అర్హత కోల్పోయే పరిస్థితి ఏర్పడిందని పేర్కొంటూ, అభ్యర్థులకు నష్టం జరగకుండా గరిష్ట వయోపరిమితిని 35 సంవత్సరాలకు పెంచాలని కోరారు. ఖాళీల భర్తీతో పోలీస్ శాఖకు బలోపేతం పోలీస్ శాఖలో భారీగా ఖాళీలు ఉన్నప్పటికీ వాటిని భర్తీ చేయకపోవడం వల్ల ఒకవైపు నిరుద్యోగులకు అవకాశాలు కోల్పోతుండగా, మరోవైపు పోలీస్ శాఖలో సిబ్బంది కొరత కొనసాగుతోందని జేఏసీ ప్రతినిధులు వివరించారు. కనీసం 10 వేల పోలీస్ ఉద్యోగాలకు తక్షణమే నోటిఫికేషన్ విడుదల చేసేలా ప్రభుత్వంపై వైయస్ఆర్సీపీ తరఫున ఒత్తిడి తీసుకురావాలని విజ్ఞప్తి చేశారు. నిరుద్యోగులకు అండగా ఉంటామని వైయస్ జగన్ భరోసా జేఏసీ ప్రతినిధుల విజ్ఞప్తులను సావధానంగా విన్న వైయస్ జగన్, రాష్ట్రంలోని లక్షలాది మంది నిరుద్యోగ యువతకు వైయస్ఆర్సీపీ అండగా ఉంటుందని భరోసా ఇచ్చారు. పోలీస్ ఉద్యోగాల భర్తీతో పాటు వయోపరిమితి పెంపు అంశాన్ని ప్రభుత్వ దృష్టికి తీసుకెళ్లి, నిరుద్యోగుల తరఫున అవసరమైన ఒత్తిడి తీసుకొస్తామని హామీ ఇచ్చారు. ఈ సందర్భంగా ఏపీఎస్యూ జేఏసీ కన్వీనర్ ఎంబేటి రామచంద్రతో పాటు జేఏసీ సభ్యులు వై. గణేష్, జె. నాగార్జున, ఎస్. సాంబశివరావు, వి. గురవారెడ్డి, ఎం. నవీన్, యు. అభిరామ్ తదితరులు పాల్గొన్నారు.
