తాడేప‌ల్లి: వైఎస్ జగన్ గారు లేవనెత్తిన ప్రశ్నలకు సమాధానం చెప్పలేక చంద్రబాబు అసలు విషయాన్ని పక్కదారి పట్టిస్తూ అబద్ధాలతో ప్రజలను తప్పుదోవ పట్టించే ప్రయత్నం చేస్తున్నారని వైఎస్సార్ సీపీ స్టేట్ కోఆర్డినేటర్ సజ్జల రామకృష్ణారెడ్డి విమర్శించారు. వైఎస్సార్ కాంగ్రెస్ పార్టీ కేంద్ర కార్యాల‌యంలో ఆయన మీడియాతో మాట్లాడుతూ సుప్రీంకోర్టు మార్గదర్శకాలను పాటించకుండా, ఎన్నికల ప్రక్రియలో చోటుచేసుకుంటున్న దారుణాల‌ను కప్పిపుచ్చేందుకు వాస్తవాలను వక్రీకరించి కోర్టును తప్పుదోవ పట్టించే ప్రయత్నం జరుగుతోందని సజ్జల ఆరోపించారు. నామినేషన్ల అడ్డగింతపై ఉన్న ఆధారాలు, సీసీటీవీ ఫుటేజీని పరిశీలించకుండా అధికారుల నివేదికలతోనే సరిపెట్టుకోవడం ద్వారా అసలు వాస్తవాలను కప్పిపుచ్చే పరిస్థితి ఏర్పడుతోందని, సుప్రీంకోర్టు మార్గదర్శకాలను తు.చ. తప్పకుండా అమలు చేసి నిజాలను వెలుగులోకి తీసుకురావాలని ఆయన డిమాండ్ చేశారు. వైఎస్సార్‌సీపీ అభ్యర్థులను నామినేషన్లు వేయకుండా అడ్డుకోవడం, నామినేషన్ పత్రాలను చించివేయడం, సరైన పత్రాలు సమర్పించినా తిరస్కరించారన్న ఆరోపణలపై సమాధానం చెప్పకుండా జగన్ గారిపై వ్యక్తిత్వ హననానికి దిగడం ఏమిటని ప్రశ్నించారు. వైఎస్సార్‌సీపీ నాయకులను గృహనిర్బంధం చేయడం, పోలీసులతో అడ్డంకులు సృష్టించడం, సుప్రీంకోర్టు మార్గదర్శకాల తర్వాత కూడా ముళ్ల కంచెలు వేయడంపై ప్రభుత్వం, పోలీసు శాఖ సమాధానం చెప్పాలని డిమాండ్ చేశారు. వైఎస్సార్‌సీపీ పేరుతో టీడీపీ నకిలీ నామినేషన్లు దాఖలు చేసిందన్న ఆరోపణలపై సమగ్ర విచారణ జరిపి వాస్తవాలను బయటపెట్టాలని కోరారు. నామినేషన్ల అడ్డగింతపై వచ్చిన ఫిర్యాదులను సీసీటీవీ ఫుటేజీ, నామినేషన్ రసీదులు, తిరస్కరణ కారణాలతో పరిశీలించకుండా రాష్ట్ర ఎన్నికల సంఘం అధికారుల నివేదికలతోనే సరిపెట్టుకోవడం సరికాదన్నారు. గతంలో ఎన్నికలను బహిష్కరిస్తున్నట్లు ప్రకటించిన చంద్రబాబు, ఇప్పుడు ఎన్నికల ప్రక్రియపై మాట్లాడే ముందు తన గత వైఖరిపై సమాధానం చెప్పాలని అన్నారు. రెండున్నరేళ్ల పాలనలో ఏం చేశారో చెప్పకుండా జగన్ గారి కుటుంబం, ఆస్తుల గురించి మాట్లాడటం, ఎల్లో మీడియా ద్వారా తప్పుడు వార్తలు ప్రచారం చేయించడం చంద్రబాబు రాజకీయ పద్ధతిగా మారిందని విమర్శించారు. తనపై వస్తున్న ఆరోపణలకు, ప్రజలకు ఇచ్చిన హామీల అమలుపై చంద్రబాబు ఆధారాలతో సమాధానం చెప్పాలని, వ్యక్తిగత విమర్శలతో అసలు సమస్యల నుంచి తప్పించుకోలేరని సజ్జల రామకృష్ణారెడ్డి స్పష్టం చేశారు. ఆయన ఇంకా ఏమ‌న్నారంటే... - జగన్ గారు లేవనెత్తిన ప్రశ్నలకు సమాధానం చెప్పలేకే: వైఎస్ జగన్ గారు లేవనెత్తిన అసలు ప్రశ్నలకు సమాధానం చెప్పాలన్న చిత్తశుద్ధి చంద్రబాబు లో లేదని స్పష్టమవుతోంది. ఎన్నికల్లో వైఎస్సార్‌సీపీ అభ్యర్థులు నామినేషన్లు వేయకుండా అడ్డుకున్నారన్న ఆరోపణలపై సమాధానం చెప్పాల్సింది పోయి, జగన్ గారిపై వ్యక్తిగత విమర్శలకు దిగుతున్నారు. ప్రజాస్వామ్యంలో ఎన్నికలు స్వేచ్ఛగా, నిష్పక్షపాతంగా జరగడం అత్యంత ముఖ్యం, కానీ ఆ ప్రాథమిక అంశాన్నే పక్కనపెట్టి రాజకీయ నాటకాలు చేస్తున్నారు. వైఎస్సార్‌సీపీ రౌడీయిజం చేసిందని ఆరోపిస్తున్న చంద్రబాబు, తమ అభ్యర్థులకు నామినేషన్లు వేయకుండా అడ్డుకున్నారన్న ప్రశ్నకు మాత్రం ఎందుకు సమాధానం చెప్పడం లేదు? ఎక్కడెక్కడ నామినేషన్లు తిరస్కరించారు, ఎక్కడ పత్రాలు చించివేశారు, ఎక్కడ అభ్యర్థులను అడ్డుకున్నారు అనే అంశాలపై విచారణకు సిద్ధంగా ఉన్నారా? జగన్ గారు ఆధారాలతో ప్రశ్నలు లేవనెత్తితే వాటికి సమాధానం చెప్పకుండా వ్యక్తిత్వ హననానికి దిగడం చంద్రబాబు చూస్తే ఆయ‌న‌లో భ‌యం క‌నిపిస్తోంది. అసలు సమస్య నుంచి ప్రజల దృష్టిని మళ్లించడానికి చంద్రబాబు చేసే ప్రయత్నాలను ప్రజలు గమనిస్తున్నారు. - ప్రజాస్వామ్యంపై ప్రజలకు నమ్మకం కలిగేలా ఎన్నికల సంఘం వ్యవహరించాలి: మా ప్రధాన ప్రశ్న ఒక్కటే, వైఎస్సార్‌సీపీ అభ్యర్థులు నామినేషన్లు వేయడానికి వెళ్తే వారిని ఎందుకు అడ్డుకున్నారు? నామినేషన్ పత్రాలు చించివేశారన్న ఆరోపణలు ఎందుకు వచ్చాయి, పత్రాలు సమర్పించినట్లు రసీదులు ఉన్న చోట కూడా తిరస్కరణలు ఎందుకు జరిగాయి? నామినేషన్లు వేయకుండా అడ్డుకున్న విధానాల‌కు సంబంధించిన ఆధారాలు ఉన్నాయని చెబుతున్నప్పుడు, వాటిని పరిశీలించి వాస్తవాలను వెల్లడించాల్సిన బాధ్యత ఎన్నికల అధికారులపై ఉంది. వైఎస్సార్‌సీపీ నాయకులను గృహనిర్బంధం చేయడం, రాకపోకలకు అడ్డంకులు కల్పించడం, సుప్రీంకోర్టు మార్గదర్శకాల తర్వాత కూడా ముళ్ల కంచెలు వేయడం వంటి చర్యలపై పోలీసు శాఖ సమాధానం చెప్పాలి. వైఎస్సార్‌సీపీ పేరుతో టీడీపీ వ్యక్తులే నకిలీ నామినేషన్లు దాఖలు చేశారన్న ఆరోపణలు వచ్చినప్పుడు, ఆ పత్రాలను పరిశీలించి బాధ్యులపై చర్యలు తీసుకోవాలి. ఎన్నికల సంఘానికి ఫిర్యాదులు అందినప్పుడు సీసీటీవీ ఫుటేజీ, నామినేషన్ రసీదులు, తిరస్కరణ కారణాలు, సంబంధిత రికార్డులను స్వయంగా పరిశీలించాలి. అధికారుల నుంచి నివేదికలు తెప్పించుకోవడమే కాకుండా, ఫిర్యాదులపై స్వతంత్ర విచారణ జరిపి ప్రజాస్వామ్యంపై ప్రజలకు నమ్మకం కలిగించాలి. - సుప్రీంకోర్టు మార్గదర్శకాల అమ‌లులో నిర్ల‌క్ష్యంపై సమాధానం చెప్పాలి: రాష్ట్ర ఎన్నికల సంఘం రాజ్యాంగబద్ధమైన సంస్థగా వ్యవహరించాలి తప్ప, అధికారుల నివేదికలను యథాతథంగా స్వీకరించి ఫిర్యాదులను ముగించే సంస్థగా మిగిలిపోకూడదు. ఫిర్యాదులు వచ్చినప్పుడు సీసీటీవీ దృశ్యాలు, నామినేషన్ పత్రాలు, స్వీకరణ రసీదులు, తిరస్కరణకు ఇచ్చిన కారణాలు పరిశీలించకుండా నిష్పక్షపాత ఎన్నికలు ఎలా సాధ్యమవుతాయి? ఎన్నికల షెడ్యూల్‌, ఎన్నికల ప్రవర్తనా నియమావళి, వాటికి సంబంధించిన సుప్రీంకోర్టు మార్గదర్శకాలను అమలు చేయడంలో ఎలాంటి నిర్లక్ష్యం జరిగినా దానిపై సమాధానం చెప్పాల్సిందే. సుప్రీంకోర్టు ప్రస్తావించిన మార్గదర్శకాలను పాటించకుండా, జరిగిన పరిణామాలను కప్పిపుచ్చే ప్రయత్నం జరుగుతోందన్న మా ఆందోళనను తేలికగా తీసుకోకూడదు. గతంలో నిమ్మగడ్డ రమేష్‌కుమార్‌ రాష్ట్ర ఎన్నికల కమిషనర్‌గా ఉన్న సమయంలో ఎన్నికల నిర్వహణపై జరిగిన పరిణామాలు, ఆ తర్వాత నీలం సాహ్ని బాధ్యతలు చేపట్టిన సందర్భాన్ని కూడా చంద్రబాబు గుర్తుచేసుకోవాలి. - రెండున్నరేళ్ల పాలనా వైఫ‌ల్యాల‌పై సమాధానం చెప్పకుండా..: చంద్రబాబు రెండున్నరేళ్ల పాలనలో ప్రజలకు ఇచ్చిన హామీల్లో ఏవి అమలు చేశారో, రాష్ట్రానికి ఏం చేశారో ముందుగా చెప్పాలి. ఎన్నికలను ఎదుర్కొనే ధైర్యం ఉంటే ప్రతిపక్ష అభ్యర్థులను నామినేషన్ల దశలోనే అడ్డుకోవాల్సిన అవసరం ఏముంది? ప్రజల ముందుకు వెళ్లి తమ పనితీరును వివరించాల్సిన ప్రభుత్వం, ప్రత్యర్థులను పోటీ నుంచి తప్పించే షార్ట్‌కట్‌ రాజకీయాలకు పాల్పడుతోంది. తనపై వస్తున్న విమర్శలకు వాస్తవాలతో సమాధానం ఇవ్వకుండా, జగన్ గారి వ్యక్తిత్వం, కుటుంబం, ఆస్తుల గురించి మాట్లాడటం చంద్రబాబు చౌకబారు రాజకీయాలకు నిదర్శనం. జగన్ గారి కుటుంబాన్ని, వ్యక్తిగత జీవితాన్ని రాజకీయ వివాదాల్లోకి లాగడం ద్వారా ఎన్నికల అక్రమాలపై ఉన్న ప్రశ్నలు మాయమైపోవు. చంద్రబాబు పర్యటనలు, హడావుడి, నైతిక విలువల గురించి చేసే ప్రసంగాలు ప్రజలకు జవాబుదారీతనాన్ని చూపించాలి తప్ప, అసలు సమస్యల నుంచి తప్పించుకునే సాధనాలుగా మారకూడదు. ప్రతిపక్షంపై వ్యక్తిగత దాడులు చేయడం ద్వారా బాధ్యత నుంచి తప్పించుకోలేరు. - చంద్రబాబు ఫేక్ న్యూస్‌ ఫ్యాక్టరీలు న‌డుపుతున్నాడు: జగన్ గారి గురించి తప్పుడు కథనాలు సృష్టించి ప్రచారం చేయడంలో చంద్రబాబు ఫేక్ న్యూస్‌ ఫ్యాక్టరీలా వ్యవహరిస్తున్నారు. అబద్ధాలను పదేపదే చెప్పినంత మాత్రాన అవి నిజాలు కావు. చంద్రబాబు ప్రెస్‌మీట్‌లో చెప్పిన ఆరోపణలన్నీ నిజాలేనని భావించడానికి ఆధారాలు చూపించాలి. జగన్ గారిపై వ్యక్తిత్వ హననం చేయడం, ఎల్లో మీడియా ద్వారా తప్పుడు వార్తలను ప్రచారం చేయడం, వాటినే మళ్లీ రాజకీయ వేదికలపై చదివి వినిపించడం వల్ల ప్రజలు వాస్తవాలను మరిచిపోరు. జగన్ గారి కుటుంబం, ఆస్తులు, ఇళ్లు లేదా ప్యాలెస్‌ల గురించి మాట్లాడే ముందు చంద్రబాబు తన కుటుంబం, తన ఆస్తులు, తన నివాసాలు, తన రాజకీయ ప్రవర్తనపై వచ్చే ప్రశ్నలకు కూడా సమాధానం చెప్పాలి. తన తమ్ముడు రామమూర్తి నాయుడు గురించి సహా కుటుంబ సంబంధిత అంశాలను రాజకీయ విమర్శల్లోకి తెస్తున్నప్పుడు, ఎవరి వ్యక్తిగత జీవితాన్ని ఎవరు రాజకీయ ఆయుధంగా ఉపయోగిస్తున్నారో ప్రజలు ప్రశ్నిస్తారు. వైఎస్సార్ కుటుంబం ప్రజాసేవ, విలువలు, ప్రజలతో ఉన్న అనుబంధం విషయంలో చంద్రబాబు కుటుంబంతో పోల్చలేనిది. అందుకే వ్యక్తిగత దూషణలతో ప్రజలను డైవ‌ర్టు చేయాల‌ని చూస్తున్నాడని సజ్జల రామకృష్ణారెడ్డి ధ్వ‌జ‌మెత్తారు.
