తిరుపతి : టిటిడి పరిధిలోని శ్రీ వేంకటేశ్వర వైద్య విజ్ఞాన సంస్థ (స్విమ్స్)లో చేపట్టిన 303 పోస్టుల నియామక ప్రక్రియ డీఎస్సీ తరహా స్కాంను మించిన అవినీతి వ్యవహారంగా మారిందని టిటిడి మాజీ ఛైర్మన్ భూమన కరుణాకరరెడ్డి తీవ్ర ఆరోపణలు చేశారు. నియామకాల పేరుతో నిబంధనలను తుంగలో తొక్కి, కొందరికి అనుకూలంగా మొత్తం ప్రక్రియను మార్చేశారని విమర్శించారు. ఈ వ్యవహారంపై స్వతంత్ర సంస్థతో సమగ్ర విచారణ జరిపి బాధ్యులపై చర్యలు తీసుకోవాలని డిమాండ్ చేశారు. నిబంధనలకు విరుద్ధంగా నియామకాలు స్విమ్స్లో 236 నర్సింగ్ పోస్టులు, 24 బ్యాక్లాగ్ పోస్టులు, 212 రెగ్యులర్ పోస్టులు, 19 పారామెడికల్ పోస్టుల భర్తీలో విద్యార్హతలు, అనుభవం వంటి నిబంధనలను పక్కన పెట్టారని భూమన ఆరోపించారు. పారదర్శకంగా జరగాల్సిన నియామక ప్రక్రియను కొందరు వ్యక్తులకు అనుకూలంగా మార్చి నిబంధనలకు తూట్లు పొడిచారని అన్నారు. ఆదిశేషయ్య పాత్రపై తీవ్ర ఆరోపణలు ఈ నియామకాల వెనుక చంద్రబాబు సమీప బంధువు ఆదిశేషయ్య కీలక పాత్ర పోషించారని భూమన ఆరోపించారు. స్విమ్స్ డైరెక్టర్ను పక్కన పెట్టి బర్డ్ డైరెక్టర్కు బాధ్యతలు అప్పగించడంతో పాటు శాఖాధిపతిగా ఆదిశేషయ్యను నియమించడం అనుమానాలకు తావిస్తోందన్నారు. గతంలో 100 మంది వైద్యుల నియామకాల్లోనూ కోట్ల రూపాయల అవినీతి జరిగిందని, అందులో కూడా ఆదిశేషయ్యే సూత్రధారి అని ఆరోపించారు. ప్రశ్నపత్రాల రూపకల్పనలోనూ అక్రమాలు ఉద్యోగాలు పొందే అభ్యర్థులకు అనుకూలంగా ప్రశ్నపత్రాలను రూపొందించారని, టిటిడి బోర్డు లేదా ప్రభుత్వ అనుమతి లేకుండానే నియామక నిబంధనల్లో మార్పులు చేశారని భూమన విమర్శించారు. ఏపీపీఎస్సీ, ఎయిమ్స్, ఎన్టీఆర్ హెల్త్ యూనివర్సిటీ వంటి నిపుణుల సంస్థల పర్యవేక్షణలోనే వైద్య నియామకాలు జరగాలని, సాంకేతిక పోస్టులకు ఐఐటీ వంటి జాతీయ స్థాయి సంస్థల ద్వారా పరీక్షలు నిర్వహించాలని సూచించారు. ఇంజినీరింగ్ పోస్టుల భర్తీపైనా అనుమానాలు మే నెలలో నిర్వహించిన 60 ఇంజినీరింగ్ పోస్టుల పరీక్షలకు 34 వేల మంది దరఖాస్తు చేసుకున్నప్పటికీ, రెండు కేంద్రాల్లో పరీక్షలు నిర్వహిస్తామని ప్రకటించి కేవలం 18 వేల మందికే అవకాశం కల్పించారని తెలిపారు. ఒక్కో పోస్టును రూ.30 లక్షలకు విక్రయించారనే చర్చ జరుగుతోందని ఆరోపించారు. 2023 నోటిఫికేషన్ను ప్రామాణికంగా తీసుకుని 2024, 2025 సంవత్సరాల అభ్యర్థులకు అన్యాయం చేశారని, విద్యార్హతల్లోనూ మార్పులు చేసి కొందరికి లబ్ధి చేకూర్చారని అన్నారు. వేదపారాయణ పోస్టుల భర్తీపైనా ఆరోపణలు 700 వేదపారాయణ పోస్టులను రూ.15 లక్షల చొప్పున విక్రయించారనే ఆరోపణలు వస్తున్నాయని, ఇప్పటికీ ఫలితాలు వెల్లడించలేదని భూమన పేర్కొన్నారు. వేదాలపై సరైన అవగాహన లేని వ్యక్తులను నియమించే పరిస్థితి రావడం టిటిడి ప్రతిష్టకు భంగం కలిగిస్తోందని ఆవేదన వ్యక్తం చేశారు. టిటిడి ప్రతిష్టను కాపాడాలి టిటిడిలో ఉద్యోగాన్ని సేవగా భావించే సంప్రదాయాన్ని కాపాడాల్సిన అవసరం ఉందని భూమన అన్నారు. ఆరోపణలపై మౌనం పాటించడం అనుమానాలను మరింత పెంచుతోందని వ్యాఖ్యానించారు. మాజీ ఉప ముఖ్యమంత్రి నారాయణస్వామికి శ్రీవారి దర్శనంలో అవమానం జరిగిందని, శాసనమండలి సభ్యులకు కూడా తగిన గౌరవం లభించడం లేదని విమర్శించారు. సమగ్ర విచారణే పరిష్కారం స్విమ్స్, టిటిడి ఉద్యోగాల నియామకాలపై వచ్చిన అన్ని ఆరోపణలపై స్వతంత్రంగా సమగ్ర విచారణ జరిపి నిజానిజాలు వెలికితీయాలని భూమన కరుణాకరరెడ్డి డిమాండ్ చేశారు. పారదర్శకతతోనే టిటిడి ప్రతిష్ట, భక్తుల విశ్వాసం, సంస్థ గౌరవం నిలబడతాయని ఆయన స్పష్టం చేశారు.
