తాడేపల్లి: రాష్ట్రంలో ఎంపీటీసీ, జెడ్పీటీసీ ఎన్నికల నామినేషన్ల ప్రక్రియ ప్రారంభం కాకముందే వైయ‌స్ఆర్‌సీపీ అభ్యర్థులు, నాయకులను లక్ష్యంగా చేసుకుని కూటమి నేతలు, పోలీసులు వేధింపులకు పాల్పడుతున్నారు. నామినేషన్లు వేయకుండా అడ్డుకునేందుకు ముందస్తు అరెస్టులు, బైండోవర్‌ కేసులు, ఇళ్లపై దాడులు, అభ్యర్థులను భయభ్రాంతులకు గురిచేసే చర్యలు కొనసాగుతున్నాయని పేర్కొంటున్నాయి. మరోవైపు, ప్రతిపక్ష అభ్యర్థులను నామినేషన్‌ కేంద్రాల వద్ద అడ్డుకోవాలని టీడీపీ నాయకులు బహిరంగంగా పిలుపునివ్వడం ఎన్నికల స్వేచ్ఛపై ఆందోళన కలిగిస్తోంది. మంగళగిరిలో వీరయ్యపై పీడీ యాక్ట్‌ మంగళగిరి ప్రాంతంలో ఎంపీటీసీగా పోటీ చేసేందుకు సిద్ధమైన వైయ‌స్ఆర్‌సీపీ నేత వీరయ్యను తాడేపల్లి పోలీసులు బలవంతంగా తీసుకెళ్లారు. ఆయనపై పీడీ యాక్ట్‌ నమోదు చేసి జైలుకు తరలించారు. ఎన్నికల్లో పోటీ చేయాలనుకునే నాయకులను ముందుగానే అరెస్టు చేయడం ద్వారా ప్రతిపక్షాన్ని కట్టడి చేసే ప్రయత్నాలు జరుగుతున్నాయి. కడపలో మేయర్‌ అభ్యర్థి దీప్తిరెడ్డి ఇంటి వద్ద నేతల పరిశీలన కడప వైయ‌స్ఆర్‌సీపీ మేయర్‌ అభ్యర్థి దీప్తిరెడ్డి ఇంటిని జిల్లా పార్టీ అధ్యక్షుడు రవీంద్రనాథ్‌రెడ్డి, మాజీ ఉప ముఖ్యమంత్రి అంజాద్‌ బాషా, ఎమ్మెల్సీ రామచంద్రారెడ్డి, మాజీ మేయర్లు సురేష్‌బాబు, పాకా సురేష్‌ పరిశీలించారు. దీప్తిరెడ్డిపై భౌతిక దాడికి ప్రయత్నం జరిగిందని, ఆమెపై హత్యాయత్నానికి పాల్పడేందుకు యత్నించారని వైయ‌స్ఆర్‌సీపీ నేతలు పేర్కొన్నారు. అధికారాన్ని అడ్డుపెట్టుకుని మహిళా అభ్యర్థులను భయపెట్టే ప్రయత్నాలను సహించబోమని, తగిన సమయంలో సమాధానం చెబుతామని స్పష్టం చేశారు. వెల్దుర్తిలో ప్రతిపక్ష అభ్యర్థులను అడ్డుకోవాలని పిలుపు పత్తికొండ ఎమ్మెల్యే కేఈ శ్యామ్‌కుమార్‌ సమక్షంలో వెల్దుర్తి మండలానికి చెందిన టీడీపీ నాయకుడు ప్రతిపక్ష అభ్యర్థులను అడ్డుకోవాలంటూ రెచ్చగొట్టే వ్యాఖ్యలు చేశారు. అన్ని గ్రామాల నుంచి కార్యకర్తలు నామినేషన్‌ కేంద్రాలకు చేరుకుని వైయ‌స్ఆర్‌సీపీ అభ్యర్థులను అడ్డుకోవాలని పిలుపునిచ్చినట్లు పార్టీ వర్గాలు తెలిపాయి. వైయ‌స్ఆర్‌సీపీ అభ్యర్థులు నామినేషన్లు వేస్తే గ్రామాల్లో అల్లర్లు జరుగుతాయంటూ భయభ్రాంతులకు గురిచేసే ప్రయత్నాలు చేస్తున్నారని పేర్కొన్నాయి. ఉరవకొండలో బైండోవర్‌ పేరుతో వేధింపులు మంత్రి పయ్యావుల కేశవ్‌ ప్రాతినిధ్యం వహిస్తున్న ఉరవకొండ నియోజకవర్గంలో వైయ‌స్ఆర్‌సీపీ నాయకులను పోలీసులు బైండోవర్‌ పేరుతో పోలీస్‌ స్టేషన్లలో రేయింబవళ్లు ఉంచుతున్నారని పార్టీ శ్రేణులు తెలిపాయి. స్థానిక సంస్థల ఎన్నికల్లో పోటీ చేయకుండా ప్రతిపక్ష నాయకులను ముందస్తుగా కట్టడి చేసే ప్రయత్నాలు జరుగుతున్నాయని అభ్యంతరం వ్యక్తం చేశాయి. రామగిరిలో 100 మందికి బైండోవర్‌ రాప్తాడు నియోజకవర్గంలోని రామగిరి మండలంలో సుమారు 100 మందిని బైండోవర్‌ చేసినట్లు సమాచారం. టీడీపీ ఎమ్మెల్యే పరిటాల సునీత సొంత మండలమైన రామగిరిలో నామినేషన్ల సందర్భంగా వైయ‌స్ఆర్‌సీపీ నేతలపై దాడులు చేసేందుకు కంకర రాళ్లను సిద్ధం చేశారని పార్టీ వర్గాలు ఆరోపించాయి. ఈ నేపథ్యంలో ఎన్నికల ప్రక్రియ ప్రశాంతంగా, స్వేచ్ఛగా జరిగేలా అధికారులు చర్యలు తీసుకోవాలని వైయ‌స్ఆర్‌సీపీ శ్రేణులు కోరుతున్నాయి. ఉమ్మడి అనంతపురం జిల్లాలో ఎన్నికలపై ఉత్కంఠ ఉమ్మడి అనంతపురం జిల్లాలో 63 జెడ్పీటీసీ స్థానాలు, సుమారు వెయ్యి ఎంపీటీసీ స్థానాలకు ఎన్నికలు జరగనున్న నేపథ్యంలో రాజకీయ వాతావరణం వేడెక్కింది. నామినేషన్ల ప్రక్రియ ప్రారంభానికి ముందే వైయ‌స్ఆర్‌సీపీ నేతలపై పోలీసుల వేధింపులు, బైండోవర్‌ చర్యలు పెరుగుతున్నాయని పార్టీ వర్గాలు పేర్కొన్నాయి. ఎన్నికల్లో పోటీ చేయడం ప్రతి అభ్యర్థి హక్కు. నామినేషన్లు దాఖలు చేసే స్వేచ్ఛను అడ్డుకోవడం, అభ్యర్థులను భయపెట్టడం, దాడులకు పాల్పడటం వంటి ఘటనలపై నిష్పాక్షిక విచారణ జరిపి బాధ్యులపై చర్యలు తీసుకోవాలని వైయ‌స్ఆర్‌సీపీ నేతలు కోరుతున్నారు. అన్ని పార్టీల అభ్యర్థులకు సమాన అవకాశాలు కల్పించి, పోలీసు యంత్రాంగం రాజకీయ ఒత్తిళ్లకు అతీతంగా వ్యవహరించేలా ఎన్నికల సంఘం చర్యలు తీసుకోవాలని విజ్ఞప్తి చేస్తున్నారు.
