అమరావతి: రాష్ట్రంలో రాబోయే స్థానిక సంస్థల ఎన్నికల నేపథ్యంలో పలు జిల్లాల్లో వైయ‌స్ఆర్‌సీపీలో చేరికల కార్యక్రమాలు కొనసాగుతున్నాయి. కృష్ణా, వైఎస్సార్‌ కడప, నెల్లూరు, పార్వతీపురం మన్యం, చిత్తూరు జిల్లాల్లోని వివిధ నియోజకవర్గాల్లో టీడీపీకి చెందిన నాయకులు, కార్యకర్తలు, కుటుంబాలు వైయ‌స్ఆర్‌సీపీలో చేరినట్లు పార్టీ వర్గాలు వెల్లడించాయి. మాజీ ఎమ్మెల్యేలు, మాజీ మంత్రులు, ఎమ్మెల్సీలు, పార్టీ నియోజకవర్గ ఇన్‌చార్జిల ఆధ్వర్యంలో జరిగిన ఈ కార్యక్రమాల్లో కొత్తగా చేరిన వారికి పార్టీ కండువాలు కప్పి ఆహ్వానించారు. కొన్ని ప్రాంతాల్లో పార్టీ నాయకులకు గుర్తింపు కార్డులు పంపిణీ చేయడంతో పాటు, క్షేత్రస్థాయిలో పార్టీని బలోపేతం చేయడం, కార్యకర్తల మధ్య సమన్వయం పెంపొందించడం, ప్రజా సమస్యలపై పనిచేయడంపై నాయకులు దిశానిర్దేశం చేశారు. గన్నవరం, విజయవాడ గ్రామీణ ప్రాంతాల్లో చేరికలు గన్నవరం: కృష్ణా జిల్లా గన్నవరం నియోజకవర్గంలోని ఇస్లాంపేటకు చెందిన సుమారు 100 మంది టీడీపీ కార్యకర్తలు వైయ‌స్ఆర్‌సీపీలో చేరారు. మాజీ ఎమ్మెల్యే వల్లభనేని వంశీ వారికి పార్టీ కండువాలు కప్పి ఆహ్వానించారు. నున్న: విజయవాడ రూరల్‌ మండలం నున్న గ్రామంలో వైయ‌స్ఆర్‌సీపీ గ్రామ పార్టీ నూతన కార్యాలయాన్ని మాజీ మంత్రి కొడాలి నాని, మాజీ ఎమ్మెల్యే వల్లభనేని వంశీ ప్రారంభించారు. ఈ సందర్భంగా వైయ‌స్‌ రాజశేఖర్‌రెడ్డి విగ్రహానికి పూలమాలలు వేసి నివాళులర్పించారు. కార్యక్రమంలో మాజీ మేయర్‌ రాయన భాగ్యలక్ష్మి, మాజీ డిప్యూటీ మేయర్‌ అవుతు శైలజారెడ్డి, కొమ్మా కోట్లు, యార్కరెడ్డి నాగిరెడ్డి తదితరులు పాల్గొన్నారు. అవనిగడ్డలో టీడీపీ కుటుంబాల చేరిక చల్లపల్లి మండలం – నడకుదురు: కృష్ణా జిల్లా అవనిగడ్డ నియోజకవర్గంలోని నడకుదురు గ్రామంలో టీడీపీకి చెందిన పలు కుటుంబాలు వైయ‌స్ఆర్‌సీపీలో చేరాయి. మాజీ ఎమ్మెల్యే సింహాద్రి రమేష్‌బాబు ఆధ్వర్యంలో జరిగిన కార్యక్రమంలో కొత్తగా పార్టీలో చేరిన వారికి ఆయన వైయ‌స్ఆర్‌సీపీ కండువాలు కప్పి ఆహ్వానించారు. ప్రొద్దుటూరులో 40 కుటుంబాల చేరిక వైఎస్సార్‌ కడప జిల్లా – ప్రొద్దుటూరు: పట్టణంలోని రాయల్‌ ఫంక్షన్‌ హాల్‌ ఎదురుగా ఉన్న 13వ సచివాలయం పరిధిలో టీడీపీకి చెందిన సుమారు 40 కుటుంబాలు వైయ‌స్ఆర్‌సీపీలో చేరాయి. దివంగత మాజీ కౌన్సిలర్‌ వై.ఎస్‌. హమీద్‌ కుటుంబ సభ్యులు కూడా పార్టీలో చేరారు. వైయ‌స్ఆర్‌సీపీ రాష్ట్ర అధికార ప్రతినిధి రాచమల్లు శివప్రసాద్‌రెడ్డి ఆధ్వర్యంలో జరిగిన ఈ కార్యక్రమంలో కొత్తగా చేరిన వారికి స్వాగతం పలికారు. పార్టీ నాయకులు, కార్యకర్తలు, అనుబంధ విభాగాల సభ్యులు, మహిళా నాయకురాళ్లు పెద్ద సంఖ్యలో పాల్గొన్నారు. సర్వేపల్లిలో 50 కుటుంబాల చేరిక నెల్లూరు జిల్లా – పేడూరు: సర్వేపల్లి నియోజకవర్గంలోని తోటపల్లిగూడూరు మండలం పేడూరు గ్రామంలో టీడీపీకి చెందిన సుమారు 50 కుటుంబాలు వైయ‌స్ఆర్‌సీపీలో చేరాయి. తిక్కవరపు సనత్‌కుమార్‌రెడ్డి, తూపిలి ఉదయ్‌కుమార్‌రెడ్డి ఆధ్వర్యంలో జరిగిన కార్యక్రమంలో మాగుంట రామకృష్ణారెడ్డి, జగన్నాటి ఏడుకొండలు, సంగారు సారయ్య, సంగారపు శీనయ్య, నక్కా బాబు తదితర నాయకులకు మాజీ మంత్రి, ఉమ్మడి నెల్లూరు జిల్లా వైయ‌స్ఆర్‌సీపీ అధ్యక్షుడు డాక్టర్‌ కాకాణి గోవర్ధన్‌రెడ్డి పార్టీ కండువాలు కప్పి ఆహ్వానించారు. అనంతరం వైయ‌స్ఆర్‌సీపీ నాయకులకు గుర్తింపు కార్డులు అందజేశారు. ఈ సందర్భంగా కాకాణి గోవర్ధన్‌రెడ్డి మాట్లాడుతూ దశాబ్దాలుగా టీడీపీలో పనిచేసిన నాయకులు, కార్యకర్తలు ఆ పార్టీని వీడి వైయ‌స్ఆర్‌సీపీలో చేరడం గమనించాల్సిన విషయమన్నారు. సర్వేపల్లి నియోజకవర్గంలో సోమిరెడ్డి చంద్రమోహన్‌రెడ్డి తీరుపై అసంతృప్తితో టీడీపీ శ్రేణులు పార్టీని వీడుతున్నాయని విమర్శించారు. తన పార్టీ వారికే తిరిగి కండువాలు కప్పి, ఇతర పార్టీల నుంచి చేరికలుగా ప్రచారం చేసుకుంటున్నారని సోమిరెడ్డిపై విమర్శలు గుప్పించారు. వైఎస్‌ జగన్‌మోహన్‌రెడ్డి నాయకత్వంపై విశ్వాసంతో వైయ‌స్ఆర్‌సీపీలో చేరుతున్న వారికి మంచి భవిష్యత్తు ఉంటుందని పేర్కొంటూ, పార్టీ బలోపేతానికి కలిసికట్టుగా పనిచేయాలని పిలుపునిచ్చారు. డంగభద్రలో 30 కుటుంబాల చేరిక పార్వతీపురం మన్యం జిల్లా – జియ్యమ్మవలస మండలం: డంగభద్ర గ్రామంలో టీడీపీకి చెందిన 30 కుటుంబాలు వైయ‌స్ఆర్‌సీపీలో చేరాయి. గ్రామ వైస్‌ సర్పంచ్‌ లింగరోతు గోవింద నాయుడు, వార్డు సభ్యుడు రాగోలు గంగునాయుడు, గంట్యాడ గణపతి నాయుడు, వావులపల్లి తాతబాబుతో పాటు పలువురు నాయకులు, వారి కుటుంబ సభ్యులు పార్టీలో చేరారు. మాజీ ఉప ముఖ్యమంత్రి పాముల పుష్పశ్రీవాణి వారికి పార్టీ కండువాలు కప్పి సాదరంగా ఆహ్వానించారు. పార్టీలో చేరిన నాయకులు, కుటుంబ సభ్యులకు అభినందనలు తెలిపి, పార్టీ బలోపేతానికి అందరూ కృషి చేయాలని పిలుపునిచ్చారు. కుప్పంలో 12 కుటుంబాల చేరిక చిత్తూరు జిల్లా – కుప్పం: నియోజకవర్గంలోని అడవి బూదగురు పంచాయతీలో టీడీపీకి చెందిన సుమారు 12 కుటుంబాలు వైయ‌స్ఆర్‌సీపీలో చేరాయి. నియోజకవర్గ ఇన్‌చార్జి, ఎమ్మెల్సీ కేఆర్‌జే భరత్‌ ఆధ్వర్యంలో, కుప్పం మండల కన్వీనర్‌ హెచ్‌.ఎం. మురుగేష్‌ సమక్షంలో ఈ కార్యక్రమం జరిగింది. కొత్తగా పార్టీలో చేరిన వారికి వైయ‌స్ఆర్‌సీపీ నాయకులు, కార్యకర్తలు స్వాగతం పలికారు. ఈ కార్యక్రమంలో ఎం. బాలకృష్ణ, ఏ. ముత్తుకరుప్పన్‌, వి. శేఖర్‌, ఎస్‌. సిద్ధప్ప, కె. సుబ్రమణ్యం, దొడతమ్మ, ఎం. సింగారవేలు, ఎం. జ్ఞానశేఖర్‌, అజిత్‌, రాజా, రజినీ, బి. మణి, దేవరాజ్‌, జనార్ధన్‌, తోటప్ప, కనకరాజ్‌, కొణ్నప్ప, వీరభద్రన్‌, మహేంద్రన్‌, అరుణాచలం, మద్దప్ప తదితరులు వైయ‌స్ఆర్‌సీపీలో చేరారు. ప్రజలతో మమేకమై వారి సమస్యల పరిష్కారానికి కృషి చేస్తూ, పార్టీని క్షేత్రస్థాయిలో బలోపేతం చేయడమే లక్ష్యంగా పనిచేస్తామని పార్టీ నాయకులు తెలిపారు. స్థానిక ఎన్నికల సన్నద్ధతపై పార్టీ శ్రేణుల దృష్టి వివిధ ప్రాంతాల్లో జరిగిన ఈ కార్యక్రమాల్లో పార్టీ కండువాల పంపిణీతో పాటు నాయకులు, కార్యకర్తలకు గుర్తింపు కల్పించడం, స్థానిక స్థాయిలో సమన్వయాన్ని పెంపొందించడం ప్రధానంగా కనిపించింది. చేరికలతో పాటు ప్రజా సమస్యలపై నిరంతరం పనిచేయడం, గ్రామాలు, వార్డుల్లో పార్టీ కార్యకలాపాలను విస్తరించడం, నాయకులు–కార్యకర్తలు ఐక్యంగా ముందుకు సాగడం వంటి అంశాలపై పార్టీ నేతలు దృష్టి సారించారు.
