'యుపిఎకి అనుకూలంగా లేరనే జగన్‌పై కక్ష'

హైదరాబా‌ద్: ‌యుపిఎ ప్రభుత్వానికి, సోనియాగాంధీకి అనుకూలంగా లేనందు వల్లే వైయస్‌ఆర్ కాంగ్రె‌స్ పార్టీ అ‌ధినేత శ్రీ వైయస్ జగ‌న్మోహన్‌రెడ్డిపై కక్ష సాధిస్తున్నారని పార్టీ కేంద్ర పాలక మండలి  సభ్యుడు బాజిరెడ్డి గోవర్ధన్ దుయ్యబట్టారు. చంచల్‌గూడ జైలులో ఉన్న శ్రీ జగన్మోహన్‌రెడ్డిని ఆయన బుధవారంనాడు ప్రత్యేక ములాఖత్‌లో కలిశారు. ఆ తరువాత జైలు బయట మీడియా ప్రతినిధులతో మాట్లాడారు. తమ పార్టీ అధినేతపై కక్ష సాధించేందుకే ప్రభుత్వం కుట్ర పన్ని అసత్య ఆరోపణలు చేసి, సిబిఐని వాడుకుని జైలులో పెట్టించిందని ఆరోపించారు. చివరికి జైలులో కూడా ఆయనను వేధించేందుకే సిసి కెమెరాలు ఏర్పాటు చేసి ములాఖత్‌లను పర్యవేక్షిస్తోందన్నారు. ఆయనను ఎవరూ కలవకుండా ఇబ్బందులు పెడుతోందని బాజిరెడ్డి మండిపడ్డారు. దేశంలో చాలా మంది నాయకులపై సిబిఐ విచారణలు, ఆరోపణలు ఉన్నప్పటికీ యుపిఎ ప్రభుత్వానికి అనుకూలంగా ఉన్నందునే వారిని పట్టించుకోవడంలేదని విమర్శించారు.