'జ‌నాభీష్టానికి అనుగుణంగా వైయస్ఆర్‌సిపి కృషి'

కాకినాడ (తూర్పు గోదావరి జిల్లా) : ప్రజల ఆకాంక్షకు అనుగుణంగా వైయస్‌ఆర్ కాంగ్రె‌స్‌ పార్టీ పనిచేస్తుందని తూర్పుగోదావరి జిల్లా పార్టీ కన్వీనర్‌ కుడుపూడి చిట్టబ్బాయి తెలిపారు. సమస్యల పరిష్కారమే ధ్యేయంగా నిబద్ధతతో పనిచేస్తున్న తమ పార్టీ ప్రజలకు ఎంతగానో చేరువైందని చిట్టబ్బాయి అన్నారు. కాకినాడలోని పార్టీ జిల్లా కార్యాలయంలో సోమవారం ఆయన మీడియా సమావేశంలో మాట్లాడారు. ప్రజా సంబంధ అంశాలపై పార్టీ నిరంతరం ప్రతిస్పందిస్తూనే ఉందన్నారు. బాధ్యతాయుతమైన ప్రతిపక్షంగా వ్యవహరించి, పార్టీ అధ్యక్షుడు శ్రీ జగన్మోహన్‌రెడ్డి, గౌరవ అధ్యక్షురాలు శ్రీమతి విజయమ్మ స్ఫూర్తితో ప్రజలకు అండగా నిలుస్తున్నట్లు చెప్పారు.