దొడ్డిమేకలలో షర్మిల రచ్చబండ కార్యక్రమం

అంతకు ముందు పెద్ద కడుబూరులో షర్మిల‌ అశేష జనవాహినిని ఉద్దేశించి‌ షర్మిల మాట్లాడుతూ, మహానేత వైయస్‌ఆర్ ప్రవేశపెట్టిన పథకాలకు కాంగ్రె‌స్ ప్రభుత్వం తూట్లు పొడుస్తోందని దుయ్యబట్టారు. ఈ ప్రభుత్వం ప్రజా సమస్యలను మూడేళ్ళుగా గాలికొదిలేసిందని, అయినా, ప్రతిపక్ష టీడీపీ చోద్యం చూస్తూనే ఉన్నదని నిప్పులు చెరిగారు. తాజాగా చంద్రబాబు నాయుడు పాదయాత్ర అంటూ కొత్త డ్రామా ఆడుతున్నారని అన్నారు.  చంద్రబాబుకు పాదయాత్ర చేయాల్సిన అవసరం లేదన్నారు. అవిశ్వాసం పెట్టి ఈ అసమర్థ ప్రభుత్వాన్ని దించేయవచ్చని సూచించారు. అవిశ్వాసం పెట్టకుండా ప్రభుత్వాన్ని నిలబెడుతోంది చంద్రబాబేనని షర్మిల ఆరోపించారు.

టీడీపీ, కాంగ్రెస్‌ కుమ్మక్కై నీచ రాజకీయాలు చేస్తున్నాయని అన్నారు. ఒక్క సాక్ష్యం లేకపోయినా విచారణ పేరుతో జగనన్నకు బెయిల్ రాకుండా చేస్తున్నాయని ఆవేదన వ్యక్తం చేశారు. జగనన్న ఏ తప్పూ చేయలేదని, త్వరలో బయటకు వస్తారని ఆమె విశ్వాసం వ్యక్తం చేశారు.