చిత్తూరు: చిత్తూరు మున్సిపల్ ఎన్నికల నామినేషన్ల ఉపసంహరణ ప్రక్రియలో జిల్లా కలెక్టర్ వ్యవహరించిన తీరు కంచె చేను మేసినట్టుగా ఉందని వైయ‌స్ఆర్‌సీపీ నేత విజయానందరెడ్డి మండిపడ్డారు. ఎన్నికల షెడ్యూల్ విడుదలైనప్పటి నుంచి టీడీపీ అధికార దుర్వినియోగానికి పాల్పడుతూ, నామినేషన్ల దశ నుంచి ఉపసంహరణ వరకు వైయ‌స్ఆర్‌సీపీ అభ్యర్థులను భయభ్రాంతులకు గురిచేసిందని పేర్కొన్నారు. అభ్యర్థులు, ప్రపోజర్లు వ్యక్తిగతంగా హాజరుకాకపోయినా టీడీపీ అభ్యర్థులను ఏకగ్రీవంగా ప్రకటించుకోవడం ఎన్నికల ప్రక్రియలో చోటుచేసుకున్న తీవ్రమైన పరిణామమని స్పష్టం చేశారు. నామినేషన్ల నుంచి ఉపసంహరణ వరకు అరాచకం ఎన్నికల షెడ్యూల్ విడుదలైనప్పటి నుంచి నామినేషన్ల ప్రక్రియ, స్క్రూటినీ సమయంలో బయటి ప్రాంతాల నుంచి అల్లరిమూకలను రప్పించి వైయ‌స్ఆర్‌సీపీ అభ్యర్థులను, చిత్తూరు ప్రజలను భయపెట్టే ప్రయత్నాలు జరిగాయని విజయానందరెడ్డి పేర్కొన్నారు. ఈ పరిణామాలతో ఆందోళనకు గురైన వైయ‌స్ఆర్‌సీపీ అభ్యర్థులు, ప్రపోజర్లు తమిళనాడులోని ఏలగిరి ప్రాంతానికి వెళ్లి క్యాంపులో ఉన్నారని తెలిపారు. సంతకాల ఫోర్జరీపై ఆందోళన తమ సంతకాలను ఫోర్జరీ చేసి నామినేషన్లను ఉపసంహరించే ప్రయత్నాలు జరుగుతాయనే భయాలను అభ్యర్థులు, ప్రపోజర్లు జిల్లా కలెక్టర్ వాట్సాప్‌కు, మీడియాకు తెలియజేశారని విజయానందరెడ్డి వివరించారు. ఈ అంశం పలు మీడియా సంస్థల్లో ప్రసారం కావడంతో కలెక్టర్ స్పందించి, అభ్యర్థులు, ప్రపోజర్లు వ్యక్తిగతంగా హాజరై ఉపసంహరణ ప్రక్రియ పూర్తి చేస్తేనే అది చెల్లుబాటు అవుతుందని వైయ‌స్ఆర్‌సీపీ నాయకులకు హామీ ఇచ్చారని గుర్తుచేశారు. మున్సిపల్ కార్యాలయం వద్ద అల్లరిమూకల హల్‌చల్ నామినేషన్ల ఉపసంహరణ రోజున మున్సిపల్ కార్యాలయం వద్ద వందలాదిగా అల్లరిమూకలు చేరి వైయ‌స్ఆర్‌సీపీ నాయకులపై దాడులకు సిద్ధంగా ఉన్నా పోలీసులు వారిని నియంత్రించలేదని విజయానందరెడ్డి ఆరోపించారు. అల్లరిమూకల కదలికలను అడ్డుకోవాల్సిన పోలీసులు ప్రేక్షక పాత్ర వహించడంతో టీడీపీ నాయకులు మరింతగా రెచ్చిపోయారని పేర్కొన్నారు. వ్యక్తిగత హాజరు లేకుండానే ఏకగ్రీవాలా? అభ్యర్థులు, ప్రపోజర్లు వ్యక్తిగతంగా హాజరుకాకపోయినా టీడీపీ అభ్యర్థులను ఏకగ్రీవంగా ప్రకటించుకున్నారని విజయానందరెడ్డి తెలిపారు. కంటి తుడుపు చర్యగా మూడు, నాలుగు డివిజన్లను మాత్రమే వదిలిపెట్టారని పేర్కొన్నారు. ఉపసంహరణ ప్రక్రియపై కలెక్టర్ ఇచ్చిన హామీకి, క్షేత్రస్థాయిలో జరిగిన పరిణామాలకు పొంతన లేకుండా పోయిందని విమర్శించారు. అక్రమ ఏకగ్రీవాలపై న్యాయపోరాటం వైయ‌స్ఆర్‌సీపీ అభ్యర్థుల తరఫున ఇప్పటికే న్యాయస్థానాన్ని ఆశ్రయించేందుకు సిద్ధమయ్యామని విజయానందరెడ్డి స్పష్టం చేశారు. ఎట్టి పరిస్థితుల్లోనూ ఈ అక్రమ ఏకగ్రీవాలను అంగీకరించబోమని, ఎన్నికల ప్రక్రియను తిరిగి ప్రారంభించేలా న్యాయపోరాటం కొనసాగిస్తామని ప్రకటించారు. ఎన్నికల్లో ప్రతి అభ్యర్థికి సమాన అవకాశం కల్పించాల్సిన బాధ్యత అధికారులపై ఉందని, ఆ బాధ్యతను విస్మరించి ఏకగ్రీవాల ప్రక్రియ సాగితే ప్రజాస్వామ్య స్ఫూర్తికే విఘాతం కలుగుతుందని విజయానందరెడ్డి పేర్కొన్నారు.
