తాడేపల్లి: వైయ‌స్ఆర్‌సీపీ పునాదులను బలంగా నిర్మించడంలో జిల్లా ప్రధాన కార్యదర్శులు క్రియాశీలక పాత్ర పోషించాలని.. వైయ‌స్ఆర్‌సీపీ రాష్ట్ర కో-ఆర్డినేటర్ సజ్జల రామకృష్ణారెడ్డి పిలుపునిచ్చారు. తాడేపల్లిలోని పార్టీ కేంద్ర కార్యాలయంలో జిల్లా ప్రధాన కార్యదర్శులతో (యాక్టివిటీ, మీడియా-సోషల్‌ మీడియా, ఆర్గనైజేషన్‌, అనుబంధ విభాగాలు, న్యాయ విభాగాలు) అవగాహనా సమావేశం నిర్వ‌హించారు. ఈ స‌మావేశంలో ముఖ్య అతిథిగా హాజరైన పార్టీ స్టేట్ కో-ఆర్డినేటర్ సజ్జల రామకృష్ణారెడ్డి, రాష్ట్ర ప్రధాన కార్యదర్శులు లేళ్ళ అప్పిరెడ్డి, పూడి శ్రీహరి, వైయ‌స్ఆర్‌సీపీ ఎస్సీ సెల్ అధ్యక్షుడు టీజేఆర్‌ సుధాకర్‌ బాబు, లీగల్‌ సెల్ అధ్యక్షుడు ఎం.మనోహర్‌ రెడ్డి, పలువురు నాయకులు పాల్గొన్నారు. ఈ సంద‌ర్భంగా పార్టీ స్టేట్ కోఆర్డినేటర్ సజ్జల రామకృష్ణారెడ్డి మాట్లాడారు. జిల్లా ప్రధాన కార్యదర్శులంటే జిల్లాలో పార్టీకి కమాండర్‌ లాంటివారు. మీరంతా పార్టీకి బలమైన పునాదులను నిర్మించాలి. ఎన్నికలు ఎప్పుడొచ్చినా ధీటుగా ఎదుర్కోగలిగేలా సిద్దం కావాలి. పార్టీ కమిటీల నిర్మాణం అనేది ఇప్పుడు మండల స్ధాయి నుంచి గ్రామస్ధాయిలోకి వెళుతుంది. మనమంతా బలమైన వ్యవస్ధగా రూపొందాం. పార్టీ ఆవిర్భావం నుంచి అనేక అంశాలలో క్రియాశీలకంగా ఉన్నాం. మనం ఒక బలమైన వ్యవస్ధాగత నిర్మాణంపై సీరియస్‌గా దృష్టిపెట్టాం. జగన్‌ గారు కోట్లాదిమంది విశ్వాసం, నమ్మకం చూరగొని చక్కని పాలన అందించారు. సమిష్టిగా పనిచేసినప్పుడే మన పార్టీ బలోపేతం అవుతుంది, అందుకే ఈ ప్రయత్నంలో భాగంగా జిల్లా ప్రధాన కార్యదర్శులను, జిల్లా అధ్యక్షులతో సమన్వయం చేసుకునేలా దిశానిర్ధేశం చేశాం. మీరంతా మీ శక్తిసామర్ధ్యాలు నిరూపించుకునే అవకాశం మీకు పార్టీలో కల్పించబడింది. దానిని ఛాలెంజ్‌గా తీసుకుని మీరు నిలబడాలి, పార్టీని నిలబెట్టాలి. అందుకు అవసరమైన టీమ్‌ను సిద్దం చేసుకోవాలి. మండల స్ధాయి నుంచి బలమైన నాయకత్వం ఉన్నప్పుడే మనం అనుకున్న ఫలితాలు సాధించగలుగుతాం. లోపాలు సరిదిద్దుకుని సమన్వయంతో ముందుకెళ్ళాలి. పార్టీ ఓనర్షిప్‌ మెకానిజం అనేది నిరంతరం నడుస్తుండాలి. అందుకు అవసరమైన సమావేశాలు ఎప్పటికప్పుడు జరుగుతూ ఉండాలి. ప్రజాసమస్యలపై నిరంతరం ప్రజలపక్షాన నిలబడి ప్రభుత్వాన్ని నిలదీయడం, ప్రజల గొంతకగా మనం నిలబడాలి. పార్టీ కేంద్ర కార్యాలయంతో సమన్వయం చేసుకుంటూ ముందుకెళ్ళాలి. పార్టీ కోర్‌ టీమ్‌ సిద్దమయితే మనం విస్తృతంగా ప్రజల్లోకి వెళ్ళగలుగుతాం. ఆకాశమే హద్దుగా మీరు పనిచేయగలిగే అవకాశాన్ని మన నాయకుడు జగన్‌ గారు మీకు ఇచ్చారు. కూటమి ప్రభుత్వంపై ఏడాది నుంచే ప్రజల్లో తీవ్ర వ్యతిరేకత మొదలైంది. సూపర్‌ సిక్స్‌ అంటూ ప్రజలను మోసగించారు. రాష్ట్ర ఆదాయం పూర్తిగా పడిపోయింది, వ్యవసాయాన్ని గాలికొదిలేశారు, రైతులు రోడ్లెక్కారు, రాష్ట్ర ఆర్ధిక పరిస్ధితి ఘోరంగా ఉంది, విపరీతమైన అప్పులు చేస్తూ ఆ డబ్బులు ఏం చేస్తున్నారో తెలియని పరిస్ధితి, అడ్డగోలుగా దోపిడీ, విచ్చలవిడి అవినీతి, రోజుకో పేరుతో కొత్త కొత్త డ్రామాలు, చంద్రబాబు వ్యాఖ్యలు చూస్తే దెయ్యాలు వేదాలు వల్లించడమే అవుతుంది. కూటమి నాయకులు మాఫియా ముఠాల్లా తయారయ్యారు. జగన్‌ గారు ఒక దార్శనికతతో వ్యవస్ధలు బలోపేతం చేస్తే చంద్రబాబు వాటిని నిర్వీర్యం చేస్తున్నారు. పోలీస్‌ వ్యవస్ధను అడ్డం పెట్టుకుని అక్రమ కేసులతో మన పార్టీ క్యాడర్‌ను వేధించడం, ప్రతిపక్షాన్ని నామరూపాల్లేకుండా చేయాలని కుట్రలు, కుతంత్రాలు, భయోత్పాతం ద్వారా చేయాలని చూస్తున్నారు, మనం వీటన్నింటిని ధీటుగా ఎదుర్కొన్నాం. మనం బలమైన పార్టీగా నిలబడ్డాం. ఇకముందు కూడా ఇదే పంథాతో ముందుకెళదాం. చంద్రబాబు అబద్దానికి ప్రతిరూపం, కూటమి ప్రభుత్వ బరితెగింపును నిలువరిద్దామని సజ్జల రామకృష్ణారెడ్డి దిశానిర్ధేశం చేశారు.
