అన్నమయ్య జిల్లా: రాజంపేటలో మున్సిపల్ ఎన్నికల నామినేషన్ల ప్రక్రియపై వైయ‌స్ఆర్‌సీపీ అభ్యర్థులు తీవ్ర ఆందోళన వ్యక్తం చేశారు. నామినేషన్లు దాఖలు చేయడానికి సిద్ధంగా ఉన్నప్పటికీ, భద్రత లేకపోవడంతో పార్టీ కార్యాలయం నుంచి బయటకు రాలేని పరిస్థితి నెలకొందని ఆరోపించారు. మున్సిపల్ కార్యాలయం పరిసరాల్లో టీడీపీకి చెందిన వ్యక్తులు గుమిగూడి తమను అడ్డుకుంటున్నారని, బెదిరింపులకు పాల్పడుతున్నారని పేర్కొన్నారు. మున్సిపల్ కార్యాలయం వద్ద ఉద్రిక్తత గత మూడు రోజులుగా మున్సిపల్ కార్యాలయం లోపల, బయట టీడీపీకి చెందిన వ్యక్తులు గుంపులుగా ఉంటూ వైయ‌స్ఆర్‌సీపీ అభ్యర్థులను నామినేషన్లు వేయకుండా అడ్డుకుంటున్నారని అభ్యర్థులు ఆరోపించారు. రాళ్లు, ఇనుప రాడ్లు, కత్తులతో బెదిరింపులకు పాల్పడుతున్నారని, తమకు ప్రాణహాని ఉందని ఆందోళన వ్యక్తం చేశారు. మహిళా అభ్యర్థులను అసభ్య పదజాలంతో దూషిస్తూ, బయటకు వస్తే దాడులు చేస్తామని బెదిరిస్తున్నారని వైయ‌స్ఆర్‌సీపీ అభ్యర్థులు ఆరోపించారు. ఎన్నికల్లో పోటీ చేయడం ప్రతి అభ్యర్థి హక్కు అని, భయభ్రాంతులకు గురిచేసి నామినేషన్ల ప్రక్రియకు దూరం చేయడం ప్రజాస్వామ్య స్ఫూర్తికి విరుద్ధమని పేర్కొన్నారు. పోలీసుల తీరుపై అభ్యంతరం తమ ఫిర్యాదులపై పోలీసులు స్పందించడం లేదని, నామినేషన్లు వేయకుండా ఇంట్లోనే ఉండాలని సూచిస్తున్నారని అభ్యర్థులు ఆరోపించారు. ఎన్నికల నియమావళి అమలులో అధికారులు నిష్పక్షపాతంగా వ్యవహరించి, నామినేషన్ కేంద్రం వద్ద శాంతిభద్రతలను కాపాడాలని కోరారు. రాజంపేట వైయ‌స్ఆర్‌సీపీ మున్సిపల్ అభ్యర్థులు ఎన్నికల సంఘానికి పలు విజ్ఞప్తులు చేశారు. మున్సిపల్ కార్యాలయం వద్ద తగిన పోలీసు భద్రత కల్పించాలని, అవసరమైతే కేంద్ర బలగాలను మోహరించాలని కోరారు. నామినేషన్ల ప్రక్రియకు ఆటంకం కలిగిస్తున్న వ్యక్తులపై చర్యలు తీసుకుని, అభ్యర్థులందరికీ సమాన అవకాశాలు కల్పించాలని విజ్ఞప్తి చేశారు. గెలుపోటములను నిర్ణయించేది ప్రజలేనని, ప్రతి అభ్యర్థికి ప్రజాస్వామ్యబద్ధంగా ఎన్నికల్లో పోటీ చేసే అవకాశం ఉండాలని వైయ‌స్ఆర్‌సీపీ అభ్యర్థులు స్పష్టం చేశారు. రాజంపేటలో నామినేషన్ల ప్రక్రియ ప్రశాంతంగా, పారదర్శకంగా సాగేలా ఎన్నికల సంఘం, పోలీసు అధికారులు తక్షణమే చర్యలు తీసుకోవాలని కోరారు.
