నెల్లూరు ఈఆర్వో నందన్ ను వెంటనే తప్పించాలి

తాడేప‌ల్లి: నెల్లూరు మునిసిపల్ కార్పొరేషన్ కమిషనర్‌గా, నెల్లూరు నగర శాసనసభ నియోజకవర్గం (117) ఎన్నికల నమోదు అధికారి (ERO)గా విధులు నిర్వర్తిస్తున్న వై.ఓ.నందన్ ను వెంటనే ఎస్ఐఆర్ విధుల నుంచి తప్పించాలని, ఆయనపై స్వతంత్ర విచారణకు ఆదేశాలు ఇవ్వాలని రాష్ట్ర ఎన్నికల ప్రధానాధికారి వివేక్ యాదవ్ ను వైఎస్సార్సీపీ ఎమ్మెల్సీ లేళ్ల అప్పిరెడ్డి కోరారు.  ఆలాగే ఈ విచారణ పూర్తయ్యే వరకు అన్ని ఎన్నికల సంబంధిత బాధ్యతల నుంచి ఆయన్ను తక్షణమే తప్పించాలని కోరుతూ సీఈఓకు ఆయన ఇవాళ ఓ లేఖ రాశారు.  ఫిర్యాదుకు సంబంధించి ఆడియో రికార్డుల  ఆధారాలను కూడా ఆయన సీఈవోకు పంపారు.  

- లేళ్ల అప్పిరెడ్డి సీఈఓకు రాసిన లేఖలో ముఖ్యాంశాలు

ప్రస్తుతం రాష్ట్రంలో కొనసాగుతున్న ప్రత్యేక ఓటర్ల జాబితాల సవరణ కార్యక్రమం (SIR)లో భాగంగా 22.06.2026న జరిగిన సమీక్ష సమావేశాల్లో మంత్రి పొంగూరు నారాయణ బూత్ స్థాయి అధికారులు, ఇతర ఎన్నికల అధికారులతో కలిసి పాల్గొని జోక్యం చేసుకున్నారని ఆరోపణలు ఉన్నాయి. ఆ తర్వాత 24.06.2026 న జరిగిన తెలుగుదేశం పార్టీ బూత్ స్థాయి ఏజెంట్ల (BLA) టెలికాన్ఫరెన్స్‌లో ఎన్నికల నమోదు అధికారి పాల్గొని, బూత్ వారీగా ఓటర్ల గుర్తింపు, వర్గీకరణ మరియు SIR ప్రక్రియను సులభతరం చేయడానికి మై టీడీపీ యాప్ వినియోగాన్ని ప్రోత్సహించినట్లు, అనుబంధంగా సమర్పించిన ఆడియో రికార్డింగుల ద్వారా స్పష్టమవుతోంది. ఈ నేపథ్యంలో ఎస్ఐఆర్ ప్రక్రియలో మై టీడీపీ యాప్ వినియోగంపై రాష్ట్రవ్యాప్తంగా సమగ్ర విచారణ జరపాలని కూడా కోరుతున్నాం. 

ప్రస్తుతం కొనసాగుతున్న ఓటర్ల జాబితాల ప్రత్యేక సవరణ కార్యక్రమంలో భాగంగా నెల్లూరు నగర శాసనసభ నియోజకవర్గం నెం.117కు ఎన్నికల నమోదు అధికారి (ERO)గా పనిచేస్తున్న, నెల్లూరు మునిసిపల్ కార్పొరేషన్ కమిషనర్ వై.ఓ.నందన్ ప్రవర్తనపై సీఈవో కార్యాలయం తక్షణమే జోక్యం చేసుకోవాలి.  22.06.2026 న నెల్లూరులో నిర్వహించిన సమీక్ష సమావేశానికి సంబంధించి, మేము ఇప్పటికే 23.06.2026 న మీ కార్యాలయానికి సమర్పించిన ఫిర్యాదుకు కొనసాగింపుగా ఈ లేఖ రాస్తున్నాను. ఆ సమావేశంలో మంత్రి పొంగూరు నారాయణ, ప్రజాప్రతినిధులు, సీనియర్ అధికారులు పాల్గొని, బూత్ స్థాయి అధికారులు (BLOs), ఇతరులతో కలిసి SIR కార్యక్రమం అమలును సమీక్షించారు.

ఎన్నికల జాబితాల సవరణ ప్రక్రియకు సంబంధించి ఉన్న అధికారులతో సంబంధం ఉన్న అంశాలపై మేం గతంలోనే ఆందోళన వ్యక్తం చేశాం. ఎన్నికల కమిషన్ నిర్వహిస్తున్న ఒక అధికారిక ప్రక్రియను సమీక్షించే సందర్భంలో రాజకీయ కార్యనిర్వాహకులు పాల్గొనడం వల్ల, ఎన్నికల జాబితాల సవరణ ప్రక్రియ యొక్క తటస్థత, స్వతంత్రత, విశ్వసనీయత దెబ్బతింటుందని, అందుకే ఎన్నికల కమిషన్ తక్షణమే జోక్యం చేసుకోవాలని కోరాం. అయితే మా గత ఫిర్యాదుపై తగిన చర్యలు తీసుకునేలోపే, ఇదే తరహాలో మరో ఘటన వెలుగులోకి వచ్చింది. అనుబంధంగా సమర్పించిన ఆడియో రికార్డింగులు, 24-06-2026న మంత్రి పొంగూరు నారాయణ నిర్వహించిన టెలికాన్ఫరెన్స్‌లో, తెలుగుదేశం పార్టీకి చెందిన బూత్ లెవల్ ఏజెంట్ల (BLAలు)తో అదే ఎన్నికల నమోదు అధికారి (ERO) నిరంతరం పాల్గొన్నట్లు ఉన్న ఆడియో రికార్డులు సమర్పిస్తున్నాం.

మేం గతంలో చేసిన ఫిర్యాదు తర్వాత, వెంటనే ఇలాంటి ఘటనలు పునరావృతం కావడం వల్ల, ప్రత్యేక ఓటర్ల జాబితాల సవరణ కార్యక్రమం (SIR)లో రాజకీయ జోక్యం కొనసాగుతూనే ఉందని, ఇవి వేరు వేరు ఘటనలు కావని తీవ్ర అనుమానాలు కలుగుతున్నాయి. కాబట్టి సమయానికి ఈసీ జోక్యం చేసుకోకపోవడం వల్ల, రాజకీయ నేతలు ఎన్నికల కమిషన్ నిర్వహిస్తున్న ప్రక్రియలో భాగంగా ఎన్నికల అధికారులతో నిరంతరం సంప్రదింపులు కొనసాగిస్తున్నారనే భయాందోళన సహజంగా ఏర్పడుతోంది.
ప్రజాప్రాతినిధ్య చట్టం, 1950 ప్రకారం ఎన్నికల నమోదు అధికారి (ERO) ఒక చట్టబద్ధమైన హోదాలో పనిచేస్తూ, పూర్తి రాజకీయ తటస్థత, సంస్థాగత స్వతంత్రత, నిష్పాక్షికతతో తన బాధ్యతలు నిర్వర్తించాల్సి ఉంటుంది. ప్రస్తుతం ప్రజాబాహుళ్యంలో లభ్యమవుతున్న సమాచారం, ఈ చట్టబద్ధమైన బాధ్యతల నిర్వహణపై తీవ్రమైన సందేహాలు కలిగిస్తోంది. దీనిపై తక్షణమే స్వతంత్ర విచారణ జరపాల్సిన అవసరం ఉందని స్పష్టంగా సూచిస్తోంది.

మేం ఈ లేఖకు అనుబంధంగా సమర్పించిన ఒక ఆడియో రికార్డింగ్‌లో, మై టీడీపీ యాప్ లో గత ఎన్నికల ఓటర్ల జాబితాల ఆధారంగా బూత్ వారీగా ఓటర్ల సమాచారం అందుబాటులో ఉంటుందని కమిషనర్ వివరిస్తున్నట్లు వినిపిస్తోంది. దీని ద్వారా ఓటర్లను సులభంగా గుర్తించడం, బూత్ వారీగా పంపిణీ చేయడం మరియు ధృవీకరణ చేయడం సులభమవుతుందని ఆయన పేర్కొన్నారు. అలాగే మై టీడీపీ యాప్ అందుబాటులోకి వచ్చిన తరువాత, రాజకీయ కార్యకర్తలకు బూత్ వారీగా ఓటర్ల గుర్తింపు మరింత సులభమైందని కూడా ఆయన తెలిపారు. ఈ సంభాషణ ద్వారా, బూత్ స్థాయి రాజకీయ ప్రతినిధులు ఈ యాప్‌ను ఉపయోగించి వెంటనే ఓటర్లను గుర్తించి, కొనసాగుతున్న SIR ప్రక్రియలో ఆ సమాచారాన్ని వినియోగిస్తున్నట్లు స్పష్టమవుతోంది.

మరొక ఆడియో రికార్డింగ్‌లో, కమిషనర్ కేవలం తెలుగుదేశం పార్టీకి చెందిన బూత్ లెవల్ ఏజెంట్లను మాత్రమే ఉద్దేశించి మాట్లాడుతూ, SIR ప్రక్రియను పూర్తి చేయాలని వారిని ప్రోత్సహిస్తున్నట్లు వినిపిస్తోంది. ఈ సంభాషణలోని అంశాలు, ఎన్నికల జాబితాల సవరణ ప్రక్రియను సులభతరం చేయాల్సిన బాధ్యతను ఒకే గుర్తింపు పొందిన రాజకీయ పార్టీ ప్రతినిధులతో మాత్రమే చర్చిస్తున్నట్లుగా భావన కలిగిస్తున్నాయి. ఇలాంటి వ్యవహారం, ఎన్నికల అధికారులు పూర్తి తటస్థతను పాటిస్తూ, అన్ని గుర్తింపు పొందిన రాజకీయ పార్టీలకు సమాన దూరం పాటించాల్సిన బాధ్యతకు పూర్తిగా విరుద్ధంగా ఉంది. మేము  23.06.2026 తేదీన ఇప్పటికే సమర్పించిన ఫిర్యాదు ఉన్నప్పటికీ, ఈ ఘటనలు పదేపదే పునరావృతం కావడం ద్వారా, ఎన్నికల కమిషన్ తక్షణమే జోక్యం చేసుకోవాల్సిన అవసరం ఉందని అర్థమవుతోంది. 

కాబట్టి నెల్లూరు ఈఆర్వో వై.ఓ.నందన్ ప్రవర్తనపై స్వతంత్ర విచారణను ఆదేశించడమే కాకుండా, ఆ విచారణ పూర్తయ్యే వరకు ఆయనను అన్ని ఎన్నికల సంబంధిత విధుల నుంచి తక్షణమే తప్పించాలని, అలాగే కొనసాగుతున్న ప్రత్యేక సవరణ కార్యక్రమం (SIR) సమయంలో ఎన్నికల అధికారులు మై టీడీపీ వినియోగంపై రాష్ట్రవ్యాప్తంగా సమగ్ర విచారణ నిర్వహించాలని కోరుతున్నాం.
అదేవిధంగా, భారత ఎన్నికల కమిషన్ అధికారికంగా అనుమతించిన వ్యవస్థలు, అప్లికేషన్ల ద్వారానే ఎన్నికల జాబితాల సవరణ ప్రక్రియ కఠినంగా నిర్వహించబడేలా, ఎటువంటి రాజకీయ ప్రభావం లేదా అనుబంధం లేకుండా, తగిన ఆదేశాలు జారీ చేయాలని కూడా మనవి చేస్తున్నాం.