హక్కుల కోసం గళమెత్తితే చంపేస్తారా?

గుంటూరు: హక్కుల కోసం న్యాయంగా గళమెత్తిన ముస్లింలను చంపేస్తామంటూ ప్రభుత్వం బెదిరింపులకు దిగుతుందని వైయస్‌ఆర్‌ కాంగ్రెస్‌ పార్టీ అధికార ప్రతినిధి కొలుసు పార్ధసారథి ధ్వజమెత్తారు. టీడీపీ ముస్లింలతో నిర్వహించిన సమ్మేళనంలో తమ సమస్యలు పరిష్కరించాలని కోరిన నంద్యాల ముస్లిం యువకులను అక్రమంగా నిర్భందించి వివిధ ప్రాంతాల పోలీస్‌స్టేషన్లకు తిప్పుతూ వారిపై దాడి చేయడం ఎంత వరకు సమంజసం అని ప్రశ్నించారు. సంబంధం లేని సెక్షన్‌లు విధించి యువకులను చిత్రహింసలకు గురిచేశారని మండిపడ్డారు. ఇదంతా చంద్రబాబు కనుసన్నల్లోనే జరిగిందన్నారు. నాలుగు సంవత్సరాలు బీజేపీతో అంటకాగిన చంద్రబాబు ఒళ్లంతా అదే భావజాలంతో పని చేస్తున్నారన్నారు. ముస్లిం మైనార్టీలు, దళితుల వ్యతిరేక పరిపాలన సాగిస్తున్నాడన్నారు. దళితులు, ముస్లింలపై దాడులకు తెగబడుతున్న చంద్రబాబుకు ముఖ్యమంత్రిగా కొనసాగే అర్హత ఉందా..? రాష్ట్రంలోని మేధావులంతా ఆలోచించాలన్నారు.