విజయవాడ: మున్సిపల్‌ ఎన్నికల్లో రిగ్గింగ్, దొంగ ఓట్లు, పోలింగ్ కేంద్రాల్లో దాడులు జరిగినట్లు ఆధారాలతో సహా ఫిర్యాదు చేసినా రాష్ట్ర ఎన్నికల కమిషన్‌ (ఎస్‌ఈసీ) ఎందుకు చర్యలు తీసుకోవడం లేదని వైయస్‌ఆర్‌సీపీ నేతలు నిలదీశారు. కళ్లముందే వాస్తవాలు కనిపిస్తున్నా వాటిని పట్టించుకోకుండా కలెక్టర్లు ఇచ్చే నివేదికలే ముఖ్యమని ఎస్‌ఈసీ చెప్పడం దారుణమని వారు మండిపడ్డారు. అక్రమాలపై సమర్పించిన ఆధారాలను పక్కన పెట్టి, ఫిర్యాదులను నిర్లక్ష్యం చేయడం ఎన్నికల కమిషన్‌ నిష్పక్షపాత వైఖరిపై సందేహాలు వ్యక్తమవుతున్నాయని తెలిపారు. విజయవాడలో రాష్ట్ర ఎన్నికల కమిషనర్‌ను కలిసి మున్సిపల్‌ ఎన్నికల పోలింగ్‌లో చోటు చేసుకున్న అక్రమాలు, దౌర్జన్యాలపై వినతిపత్రం సమర్పించిన అనంతరం ఎమ్మెల్సీ లేళ్ల అప్పిరెడ్డి, మాజీ ఎమ్మెల్యే టీజేఆర్‌ సుధాకర్‌బాబు, వైయస్‌ఆర్‌సీపీ లీగల్‌ సెల్ రాష్ట్ర అధ్యక్షుడు ఎం.మనోహర్‌రెడ్డి మీడియాతో మాట్లాడారు. ఎన్నికల నిర్వహణలో అవకతవకలు, పోలీసుల ఏకపక్ష వైఖరి, పోలింగ్ కేంద్రాల్లో దాడులు, దొంగ ఓట్ల వ్యవహారాలను వారు వివరించారు. రాబోయే జెడ్పీటీసీ, ఎంపీటీసీ ఎన్నికల్లో ప్రతి పోలింగ్ కేంద్రంలో సీసీ కెమెరాలు, వెబ్‌కాస్టింగ్‌ ఏర్పాటు చేసి ఎన్నికల ప్రక్రియను పారదర్శకంగా నిర్వహించాలని కోరారు. మీడియా సమావేశంలో వైయస్‌ఆర్‌సీపీ నేతలు ఏమన్నారంటే.. ఎన్నికల అక్రమాలపై ఆధారాలతో ఫిర్యాదు చేసినా చర్యలు శూన్యం :లేళ్ల అప్పిరెడ్డి, ఎమ్మెల్సీ నామినేషన్ల దశ నుంచి పోలింగ్, కౌంటింగ్‌ వరకు అడుగడుగునా ప్రజాస్వామ్యానికి విఘాతం కలిగించే ఘటనలు చోటు చేసుకున్నాయి. పులివెందులలో 80 పోలింగ్ బూత్‌లకు గాను 70 బూత్‌ల నుంచి ఏజెంట్లను బయటకు పంపి రిగ్గింగ్ చేసిన పరిస్థితులపై మాజీ సీఎం జగన్‌గారు స్వయంగా ఆర్‌ఓ కార్యాలయం ఎదుట నిరసన తెలిపారు. కడప, కర్నూలు, జమ్మలమడుగు, తిరుపతి, మాచర్ల, చిలకలూరిపేట సహా పలు ప్రాంతాల్లో జరిగిన అక్రమాలపై ఆధారాలతో సహా ఎన్నికల సంఘానికి ఫిర్యాదు చేసినా చర్యలు తీసుకోలేదు. ఎన్నికల సంఘం తన రాజ్యాంగబద్ధమైన బాధ్యతను నిర్వర్తించకుండా వ్యవహరిస్తే, దానిపైనా న్యాయపోరాటం చేయడానికి వైయస్‌ఆర్‌సీపీ సిద్ధంగా ఉంది. జెడ్పీటీసీ, ఎంపీటీసీ ఎన్నికల్లో ప్రతి బూత్‌లో వెబ్‌కాస్టింగ్‌ తప్పనిసరి: 5వ తేదీన జరగనున్న జెడ్పీటీసీ, ఎంపీటీసీ ఎన్నికల్లో సుప్రీంకోర్టు ఆదేశాల ప్రకారం ప్రతి పోలింగ్ బూత్‌లో సీసీ కెమెరాలు, వెబ్‌కాస్టింగ్‌ ఏర్పాటు చేయాలి. కొన్ని బూత్‌లకే వెబ్‌కాస్టింగ్‌ పరిమితం చేయకుండా అన్ని కేంద్రాల్లోనూ పారదర్శకంగా ఎన్నికలు నిర్వహించాలి. ఎక్కడైనా అక్రమాలు జరిగితే వెంటనే స్పందించి చర్యలు తీసుకోవాలి. ప్రజలు స్వేచ్ఛగా ఓటు వేసుకునే వాతావరణం కల్పించడం ఎన్నికల సంఘం బాధ్యత. ఎన్నికల సంఘం నిష్పక్షపాతంగా వ్యవహరించాలి. :టీజేఆర్‌ సుధాకర్‌బాబు, మాజీ ఎమ్మెల్యే రాష్ట్రంలో స్థానిక సంస్థల ఎన్నికలను ప్రజాస్వామ్యబద్ధంగా నిర్వహించాల్సిన ఎన్నికల సంఘం పక్షపాత ధోరణితో వ్యవహరిస్తోంది. నామినేషన్ల నుంచి పోలింగ్ వరకు అడుగడుగునా అడ్డంకులు సృష్టించారు. అర్హులైన అభ్యర్థులను పోటీకి దూరం చేయడం, మా పోలింగ్ ఏజెంట్లను బూత్‌ల నుంచి బయటకు లాగేయడం, దాడులకు పాల్పడటం వంటి ఘటనలు జరిగాయి. మేము ఆధారాలతో సహా ఫిర్యాదులు, పెన్‌డ్రైవ్‌లలో వీడియో సాక్ష్యాలు ఇచ్చినా ఎన్నికల సంఘం పట్టించుకోవడం లేదు. కలెక్టర్ల నివేదికలపైనే ఆధారపడుతూ బాధితుల ఫిర్యాదులను పక్కనపెట్టడం దారుణం. రాబోయే జెడ్పీటీసీ, ఎంపీటీసీ ఎన్నికల్లో ప్రతి పోలింగ్ బూత్‌లో సీసీ కెమెరాలు, వెబ్‌కాస్టింగ్‌ తప్పనిసరిగా ఏర్పాటు చేయాలి. సీసీ కెమెరాల ఫుటేజీ బయటపెడితే అక్రమాలు తేలిపోతాయి :ఎం.మనోహర్‌రెడ్డి, పార్టీ లీగల్‌ సెల్ రాష్ట్ర అధ్యక్షుడు. రాష్ట్రంలోని పలు ప్రాంతాల్లో బయట నుంచి రౌడీలను తీసుకొచ్చి దొంగ ఓట్లు వేయించడం, పోలింగ్ ఏజెంట్లను బయటకు పంపించడం వంటి ఘటనలు జరిగాయి. జమ్మలమడుగులో ఉదయం 11 గం.కే 60 శాతం పోలింగ్ ఎలా నమోదైందో ఎన్నికల సంఘం సమాధానం చెప్పాలి. సుప్రీంకోర్టు ఆదేశించినప్పటికీ సీసీ కెమెరాలు, వెబ్‌కాస్టింగ్‌ అన్ని కేంద్రాల్లో సక్రమంగా ఏర్పాటు చేయలేదు. నిన్నటి పోలింగ్‌కు సంబంధించిన సీసీ కెమెరాల ఫుటేజీని బయటపెడితే ఎక్కడ ఏజెంట్లను బయటకు పంపారు, ఎక్కడ దౌర్జన్యాలు జరిగాయి, ఎక్కడ రిగ్గింగ్ జరిగిందో స్పష్టమవుతుంది. రీ–పోలింగ్ కేంద్రాల్లోనూ అధికార పార్టీ నేతలు జోక్యం చేసుకుని దొంగ ఓట్లు వేయిస్తున్న ఘటనలు కనిపించాయి. రాబోయే జెడ్పీటీసీ, ఎంపీటీసీ ఎన్నికల్లో ఇలాంటి అక్రమాలు జరగకుండా ఎన్నికల సంఘం నిష్పక్షపాతంగా వ్యవహరించాలి. ఎస్ఈసీని క‌లిసిన వారిలో ఎమ్మెల్సీ రుహుల్లా, ఎంప్లాయిస్ అండ్ పెన్ష‌న‌ర్స్ విభాగం రాష్ట్ర అధ్యక్షుడు న‌ల‌మారు చంద్ర‌శేఖ‌ర్‌రెడ్డి, గ్రివెన్స్ సెల్ రాష్ట్ర అధ్యక్షుడు అంకంరెడ్డి నారాయ‌ణ‌రెడ్డి, ఎస్సీ సెల్ రాష్ట్ర వర్కింగ్ ప్రెసిడెంట్ యోహ‌న్ రాజు, బొందిలి విభాగం నాయ‌కుడు న‌రేంద్ర‌సింగ్‌, త‌దిత‌రులు ఉన్నారు.
