గుంతకల్: ఎన్నికల్లో పోటీ చేయడం ప్రతి అర్హుడి హక్కు. ఆ హక్కును అడ్డుకునే అధికారం ఎవరిచ్చారంటూ గుంతకల్‌లో వైయ‌స్ఆర్‌సీపీ నాయకులు ప్రశ్నిస్తున్నారు. స్థానిక సంస్థల ఎన్నికల నామినేషన్ల ప్రక్రియ చివరి రోజున మాజీ ఎమ్మెల్యే వై. వెంకటరామిరెడ్డి, వైయ‌స్ఆర్‌సీపీ అనంతపురం జిల్లా ఉపాధ్యక్షురాలు నైరుతి రెడ్డి, నియోజకవర్గ యువనేత మంజునాథ్ రెడ్డిలను పోలీసులు గృహ నిర్బంధం చేసినట్లు పార్టీ వర్గాలు వెల్లడించాయి. ఎంపీటీసీ అభ్యర్థులు నామినేషన్లు దాఖలు చేసేందుకు మాజీ ఎమ్మెల్యే వై. వెంకటరామిరెడ్డి క్యాంపు కార్యాలయానికి చేరుకోగా, టీడీపీ నాయకులు దౌర్జన్యానికి పాల్పడి దాడులకు ప్రయత్నించారని అభ్యర్థులు ఆరోపించారు. ఈ విషయం తెలుసుకున్న నైరుతి రెడ్డి ఎంపీడీవో కార్యాలయానికి చేరుకుని అభ్యర్థులతో కలిసి నామినేషన్లు దాఖలు చేయించేందుకు ప్రయత్నించారు. అయితే, నామినేషన్ పత్రాలను చించివేశారని, మరో సెట్ పత్రాలతో నామినేషన్లు వేసేందుకు ప్రయత్నించినా అధికారులు సహకరించలేదని అభ్యర్థులు ఆరోపించారు. అదే సమయంలో అక్కడికి చేరుకున్న టీడీపీ నాయకులు తమను బయటకు పంపించారని వారు పేర్కొన్నారు. నామినేషన్ల చివరి రోజే గృహ నిర్బంధమా? నామినేషన్ల ప్రక్రియ కీలక దశలో ఉండగా మాజీ ఎమ్మెల్యే వై. వెంకటరామిరెడ్డితో పాటు ఆయన కుటుంబ సభ్యులను కూడా పోలీసులు గృహ నిర్బంధం చేసినట్లు వైయ‌స్ఆర్‌సీపీ వర్గాలు తెలిపాయి. అభ్యర్థులు స్వేచ్ఛగా నామినేషన్లు దాఖలు చేసుకునేలా చూడాల్సిన అధికార యంత్రాంగమే అడ్డంకులు ఎదురుకాకుండా చర్యలు తీసుకోవాల్సి ఉండగా, ఇలాంటి పరిణామాలు ఎన్నికల పారదర్శకతపై ప్రశ్నలు లేవనెత్తుతున్నాయి. ఎన్నికల్లో పోటీ చేసే హక్కును కాపాడాలి ప్రజాస్వామ్యంలో అభ్యర్థులు స్వేచ్ఛగా నామినేషన్లు దాఖలు చేసుకునే హక్కును పరిరక్షించడం ఎన్నికల అధికారుల బాధ్యత. గుంతకల్‌లో చోటుచేసుకున్న ఘటనలపై సమగ్ర విచారణ జరిపి, నామినేషన్ పత్రాల చించివేత, అభ్యర్థులకు ఎదురైన అడ్డంకులు, నాయకుల గృహ నిర్బంధంపై తగిన చర్యలు తీసుకోవాలని వైయ‌స్ఆర్‌సీపీ శ్రేణులు కోరుతున్నాయి. ఎన్నికల ప్రక్రియ నిష్పక్షపాతంగా సాగేందుకు అధికారులు తక్షణమే జోక్యం చేసుకోవాలని విజ్ఞప్తి చేస్తున్నాయి.
