తాడేప‌ల్లి: ఎరువుల ధరలు పెంచి సబ్సిడీ పెంచామని చెప్పడం ద్వారా రైతులపై పడుతున్న అదనపు భారాన్ని దాచలేరని వైయ‌స్ఆర్‌సీపీ జనరల్‌ సెక్రటరీ, మాజీ వ్యవసాయ మిషన్‌ వైస్‌ చైర్మన్‌ ఎం.వి.ఎస్. నాగిరెడ్డి స్పష్టం చేశారు. కాంప్లెక్స్‌ ఎరువుల బస్తాపై రూ.385 నుంచి రూ.600 వరకు అదనపు భారం పడుతున్నప్పుడు రైతుకు నిజంగా మేలు జరిగిందని ఎలా చెబుతారని ప్రశ్నించారు. కేంద్ర ప్రభుత్వం రబీ 2026–27 సీజన్‌కు ఫాస్ఫాటిక్‌, పొటాషిక్‌ ఎరువులపై రూ.62,370.02 కోట్ల సబ్సిడీ అంచనాను ప్రకటించింది. గత రబీ సీజన్‌లోని రూ.37,952.29 కోట్లతో పోలిస్తే ఈసారి సుమారు రూ.24,417.73 కోట్ల మేర ఎక్కువగా ఉంది. ఎరువులు రైతులకు అందుబాటు ధరల్లో లభించేలా చూడటమే ఈ సబ్సిడీ ఉద్దేశమని కేంద్రం పేర్కొంది. అయితే మరోవైపు రైతులు కొనుగోలు చేస్తున్న కాంప్లెక్స్‌ ఎరువుల ధరలు పెరుగుతున్నప్పుడు, సబ్సిడీ పెంపు వల్ల రైతుకు వాస్తవంగా ఎంత ఊరట లభిస్తుందన్నది కీలక ప్రశ్నగా మారిందని వైయ‌స్ఆర్‌సీపీ జనరల్‌ సెక్రటరీ, మాజీ వ్యవసాయ మిషన్‌ వైస్‌ చైర్మన్‌ ఎం.వి.ఎస్. నాగిరెడ్డి అన్నారు. రైతుల నుంచి అందిన ధరల వివరాలను ప్రస్తావిస్తూ, గత ఏడాదితో పోలిస్తే 16-20-0-13 రకం ఎరువుల బస్తాపై రూ.600, 12-32-16పై రూ.550, 10-26-26పై రూ.500, ఎస్‌ఎస్‌పీపై రూ.385 వరకు అదనపు భారం పడుతోందని తెలిపారు. పంట సాగుకు అవసరమైన ఎరువుల పరిమాణాన్ని బట్టి ఒక ఎకరాకు రైతు పెట్టుబడి మరింత పెరుగుతోందన్నారు. అయితే కంపెనీ, బ్రాండ్‌, ప్రాంతం, విక్రయ తేదీ ఆధారంగా ధరలు మారే అవకాశం ఉన్నందున వాస్తవ మార్కెట్‌ ధరలను ప్రభుత్వం అధికారికంగా పరిశీలించాలని సూచించారు. సబ్సిడీ పెరిగింది.. రైతు ఖర్చు తగ్గిందా? ఎరువుల సబ్సిడీ అంటే కేవలం కేంద్రం ప్రకటించే వేల కోట్ల రూపాయల సంఖ్య కాదని నాగిరెడ్డి పేర్కొన్నారు. రైతు పొలంలో ఎరువుల ఖర్చు తగ్గడం, సకాలంలో సరఫరా జరగడం, సాగు వ్యయం అదుపులో ఉండటమే సబ్సిడీ విధానం విజయానికి అసలు కొలమానం అన్నారు. అంతర్జాతీయ మార్కెట్‌లో ముడిపదార్థాల ధరలు పెరిగినప్పుడు ప్రభుత్వ మద్దతు అవసరమే అయినప్పటికీ, ఆ మద్దతు రైతు కొనుగోలు చేసే ఎరువుల ధరల్లో ప్రతిబింబించాల్సి ఉంటుందని స్పష్టం చేశారు. కేంద్ర ప్రభుత్వం కూడా రబీ 2026–27 సీజన్‌ కోసం ప్రకటించిన ఎన్‌బీఎస్‌ సబ్సిడీ అంతర్జాతీయ ఎరువులు, ముడిపదార్థాల ధరల ధోరణులను పరిగణనలోకి తీసుకుని నిర్ణయించినట్లు పేర్కొంది. డీఏపీ, ఎన్‌పీకేఎస్‌ సహా 28 రకాల పి అండ్‌ కె ఎరువులకు సబ్సిడీ వర్తిస్తుందని తెలిపింది. అందువల్ల సబ్సిడీ మొత్తాన్ని ప్రకటించడం మాత్రమే కాకుండా, ఆ ప్రయోజనం రైతుకు ఏ ధరలో అందుతున్న ఎరువుల రూపంలో చేరుతోందో ప్రభుత్వం వెల్లడించాల్సిన అవసరం ఉందని నాగిరెడ్డి అన్నారు. పెరుగుతున్న సాగు వ్యయం రైతుకు మరింత భారమే విత్తనాలు, ఎరువులు, పురుగుమందులు, కూలీలు, సాగునీరు, యంత్రాల ఖర్చులు పెరుగుతున్న పరిస్థితుల్లో ఎరువుల ధరల పెరుగుదల రైతు పెట్టుబడి భారాన్ని మరింత పెంచుతుందని ఆయన అన్నారు. ఈ భారాన్ని పంట ధరల పెంపు ద్వారా మాత్రమే భర్తీ చేయడం వల్ల వినియోగదారులపై కూడా ప్రభావం పడే అవకాశం ఉందన్నారు. వ్యవసాయ ఉత్పత్తి వ్యయం పెరిగితే కనీస మద్దతు ధరలు, ప్రభుత్వ సేకరణ వ్యయం, ఆహార సబ్సిడీపై కూడా ప్రభావం పడుతుందని నాగిరెడ్డి వివరించారు. అందుకే రైతు పెట్టుబడి వ్యయాన్ని ప్రారంభ దశలోనే నియంత్రించడం ప్రభుత్వ వ్యవసాయ విధానంలో కీలక అంశంగా ఉండాలని పేర్కొన్నారు. కౌలురైతుల పరిస్థితిపై ప్రత్యేక దృష్టి అవసరం భూమి యాజమాన్యం లేకుండా వాస్తవంగా పంట సాగు చేస్తున్న కౌలురైతులు ఎరువుల ధరల పెరుగుదలతో మరింత ఇబ్బందులు ఎదుర్కొంటున్నారని నాగిరెడ్డి అన్నారు. ఒకవైపు భూమికి కౌలు చెల్లిస్తూ, మరోవైపు విత్తనాలు, ఎరువులు, పురుగుమందులు, కూలీల కోసం పెట్టుబడి సమకూర్చుకోవాల్సి వస్తోందన్నారు. ఎరువుల పంపిణీలో డిజిటల్‌ ధ్రువీకరణ, యాప్‌లకు సంబంధించిన సమస్యల వల్ల వాస్తవ సాగుదారులు ఇబ్బందులు పడకుండా చూడాలని సూచించారు. భూమి యజమానులతో పాటు నిజంగా పంట సాగు చేస్తున్న కౌలురైతులకు కూడా ఎరువుల సబ్సిడీ, పంట రుణాలు, బీమా, ఇన్‌పుట్‌ సబ్సిడీ వంటి ప్రయోజనాలు అందేలా విధానాలను రూపొందించాలని కోరారు. ఎరువుల కొరత, బ్లాక్‌మార్కెట్‌పై కఠిన చర్యలు ఎరువుల కృత్రిమ కొరత, అక్రమ నిల్వలు, అధిక ధరలకు విక్రయించడం వంటి సమస్యలను అరికట్టాలని నాగిరెడ్డి అన్నారు. రైతుకు అవసరమైన సమయంలో ఎరువు దొరకకపోతే సబ్సిడీ ప్రకటించినా ప్రయోజనం ఉండదన్నారు. ప్రతి ప్రాంతంలో ఎరువుల నిల్వలు, సరఫరా, విక్రయ ధరలపై సమర్థవంతమైన పర్యవేక్షణ ఉండాలని సూచించారు. అంతర్జాతీయ మార్కెట్‌లో ఎరువుల ధరల పరిస్థితులు మారుతూ ఉంటాయని తాజా మార్కెట్‌ విశ్లేషణలు కూడా సూచిస్తున్నాయి. అక్టోబర్‌లో కొన్ని ఫాస్ఫేట్‌, పొటాష్‌ ఉత్పత్తుల ధరలు తగ్గినప్పటికీ, ఉత్పత్తి వ్యయం, ముడిపదార్థాలు, సరఫరా పరిస్థితులు ఉత్పత్తిని బట్టి భిన్నంగా ఉన్నాయని నివేదికలు పేర్కొంటున్నాయి. రూ.62,370 కోట్ల సబ్సిడీపై పారదర్శకత అవసరం రబీ 2026–27కు రూ.62,370.02 కోట్ల సబ్సిడీ అంచనా గత సీజన్‌తో పోలిస్తే భారీగా పెరిగిందని నాగిరెడ్డి అన్నారు. అయితే ఇది రైతులకు నేరుగా అందించే నగదు ప్రయోజనం కాదని, పి అండ్‌ కె ఎరువులను అందుబాటు ధరల్లో ఉంచేందుకు ఎరువుల కంపెనీలకు వర్తించే సబ్సిడీ విధానంలో భాగమని స్పష్టం చేశారు. కేంద్రం కూడా సబ్సిడీని ఆమోదించిన రేట్ల ప్రకారం ఎరువుల కంపెనీలకు అందిస్తామని తెలిపింది. అందువల్ల ఈ సబ్సిడీ పెంపుతో రైతు కొనుగోలు ధర ఎంత మేరకు తగ్గిందో, పెరుగుతున్న మార్కెట్‌ ధరను ఎంతవరకు నియంత్రించగలిగిందో ప్రభుత్వం స్పష్టమైన లెక్కలతో ప్రజలకు వివరించాలని నాగిరెడ్డి కోరారు. C2+50 శాతం ప్రకారం మద్దతు ధర కల్పించాలి రైతుల సంక్షోభానికి శాశ్వత పరిష్కారం కోసం పెరుగుతున్న వ్యవసాయ ఉత్పత్తి వ్యయాన్ని పరిగణనలోకి తీసుకోవాలని నాగిరెడ్డి అన్నారు. డాక్టర్‌ స్వామినాథన్‌ కమిషన్‌ సిఫార్సుల ప్రకారం C2+50 శాతం ప్రాతిపదికన కనీస మద్దతు ధరలు కల్పించాల్సిన అవసరం ఉందని స్పష్టం చేశారు. రైతుకు కేవలం ఇన్‌పుట్‌ సబ్సిడీ మాత్రమే కాకుండా, పంటకు గిట్టుబాటు ధర కూడా లభించాల్సిందేనన్నారు. “రైతులకు కావాల్సింది సబ్సిడీ ప్రకటనల్లో కనిపించే వేల కోట్ల రూపాయల అంకెలు మాత్రమే కాదు. వాస్తవంగా పెరుగుతున్న సాగు వ్యయానికి అనుగుణంగా సరసమైన ధరలకు అందుబాటులో ఉండే ఎరువులు, సకాలంలో సరఫరా, పంటలకు గిట్టుబాటు ధరలు” అని నాగిరెడ్డి అన్నారు. రైతు పెట్టుబడి భారం తగ్గడమే అసలు లక్ష్యం రైతు పెట్టుబడి భారం తగ్గితేనే వ్యవసాయం నిలదొక్కుకుంటుందని నాగిరెడ్డి పేర్కొన్నారు. రైతుకు ఎరువులు అందుబాటు ధరల్లో లభించడం, సకాలంలో సరఫరా కావడం, కౌలురైతులకు కూడా ప్రభుత్వ ప్రయోజనాలు చేరడం, పంటలకు గిట్టుబాటు ధర కల్పించడం వంటి అంశాలను సమగ్ర వ్యవసాయ విధానంలో భాగం చేయాలని సూచించారు. “దేశానికి ఆహార భద్రతనిస్తున్న రైతును ఆదుకోవడం దయ కాదు.. ఇది ప్రభుత్వ బాధ్యత” అని ఎం.వి.ఎస్. నాగిరెడ్డి స్పష్టం చేశారు. రైతు పెట్టుబడి భారం తగ్గడంతో పాటు వినియోగదారుడికి ఆహారం అందుబాటు ధరల్లో లభించేలా కేంద్ర ప్రభుత్వం ఎరువుల సబ్సిడీ విధానాన్ని అమలు చేయాలని కోరారు.
