తాడేప‌ల్లి: స్థానిక సంస్థల ఎన్నికల నామినేషన్ల సందర్భంగా ఆంధ్రప్రదేశ్‌లో పలు ప్రాంతాల్లో ఉద్రిక్త పరిస్థితులు నెలకొన్నాయి. వైయ‌స్ఆర్‌సీపీ అభ్యర్థులు నామినేషన్లు దాఖలు చేయకుండా అడ్డుకోవడం, నామినేషన్‌ పత్రాలను చించివేయడం, పార్టీ నేతలను నిర్బంధించడం, అభ్యర్థులపై దాడులు చేయడం వంటి ఘటనలు చోటుచేసుకున్నట్లు వైయ‌స్ఆర్‌సీపీ నేతలు ఆరోపిస్తున్నారు. కడప, పులివెందుల, తిరుపతి, పిడుగురాళ్ల, గురజాల, పుంగనూరు, రాయచోటి, ధర్మవరం, తాడిపత్రి, ఆళ్లగడ్డ, గుత్తి, దాచేపల్లి ప్రాంతాల్లో చోటుచేసుకున్న ఘటనలు ఎన్నికల ప్రక్రియలో భద్రత, స్వేచ్ఛపై ప్రశ్నలు లేవనెత్తుతున్నాయి. కడపలో నామినేషన్‌ కేంద్రాల వద్ద ఉద్రిక్తత కడప కార్పొరేషన్‌ పరిధిలోని గాంధీనగర్‌ నామినేషన్‌ కేంద్రం వద్ద ఇతర ప్రాంతాల నుంచి పెద్ద సంఖ్యలో టీడీపీ కార్యకర్తలు, నాయకులు చేరుకున్నారని వైయ‌స్ఆర్‌సీపీ వర్గాలు పేర్కొన్నాయి. వైయ‌స్ఆర్‌సీపీ అభ్యర్థులు నామినేషన్లు వేయకుండా అడ్డుకునేందుకు వారిని మోహరించారని ఆరోపించాయి. కోటిరెడ్డి కళాశాల వద్ద వైయ‌స్ఆర్‌సీపీ అభ్యర్థి త్యాగరాజుపై దాడి చేసి, ఆయన నామినేషన్‌ పత్రాలను చించివేసినట్లు వెల్లడించాయి. నామినేషన్‌ ప్రక్రియకు ఆటంకాలు ఎదురవుతున్న సమయంలో పోలీసులు ఏకపక్షంగా వ్యవహరిస్తున్నారని వైయ‌స్ఆర్‌సీపీ నేతలు అభ్యంతరం వ్యక్తం చేశారు. నామినేషన్‌ కేంద్రాల వద్ద పోలీసుల కంటే టీడీపీ కార్యకర్తలే అధిక సంఖ్యలో కనిపిస్తున్నారని, నామినేషన్‌ పత్రాలను చించివేస్తున్నా పోలీసులు తగిన చర్యలు తీసుకోవడం లేదని ఆరోపించారు. ఏఆర్వో చేతిలో ఉన్న నామినేషన్‌ పత్రాలను సైతం చించివేసిన ఘటనపై చర్యలు తీసుకోవాలని కోరారు. వైయ‌స్ఆర్‌సీపీ ముఖ్య నేతలకు గృహ నిర్బంధం కడప జిల్లా పార్టీ కార్యాలయంలో వైయ‌స్ఆర్‌సీపీ జిల్లా అధ్యక్షుడు రవీంద్రనాథ్‌రెడ్డి, మాజీ ఉప ముఖ్యమంత్రి అంజాద్‌ బాషాను హౌస్‌ అరెస్ట్‌లో ఉంచినట్లు పార్టీ వర్గాలు తెలిపాయి. ఎమ్మెల్సీ రామచంద్రారెడ్డి, మాజీ మేయర్‌ సురేష్‌బాబు, పాక సురేష్‌లను కూడా గృహ నిర్బంధంలో ఉంచినట్లు పేర్కొన్నాయి. పార్టీ కార్యాలయంలో ఉన్న కార్యకర్తలను పోలీసులు బయటకు పంపించారని, ముఖ్య నేతలు కార్యాలయం నుంచి బయటకు వెళ్లకూడదని ఆంక్షలు విధించారని తెలిపాయి. వైయ‌స్ఆర్‌ జిల్లావ్యాప్తంగా పలువురు వైయ‌స్ఆర్‌సీపీ నేతలకు బీఎన్‌ఎస్‌ఎస్‌ సెక్షన్‌ 163 కింద పోలీసులు నోటీసులు జారీ చేశారు. ర్యాలీలు నిర్వహించవద్దని, కార్యకర్తలను గుంపులుగా ఉంచవద్దని ఆదేశించారు. పులివెందులలో కడప ఎంపీ వైఎస్‌ అవినాష్‌రెడ్డికి, కడపలో జిల్లా అధ్యక్షుడు రవీంద్రనాథ్‌రెడ్డి, మేయర్‌ అభ్యర్థిని బండి దీప్తిరెడ్డికి నోటీసులు అందజేసినట్లు సమాచారం. మరోవైపు నామినేషన్‌ కేంద్రాల వద్ద పెద్ద సంఖ్యలో మోహరించిన టీడీపీ కార్యకర్తలపై పోలీసులు తగిన చర్యలు తీసుకోవడం లేదని వైయ‌స్ఆర్‌సీపీ నేతలు అభ్యంతరం వ్యక్తం చేశారు. తమ అభ్యర్థులు స్వేచ్ఛగా నామినేషన్లు దాఖలు చేసుకునేలా రక్షణ కల్పించాలని కోరారు. పులివెందులలో ఎంపీ అవినాష్‌రెడ్డికి నోటీసులు పులివెందులలో ర్యాలీలు, ధర్నాలు నిర్వహించవద్దంటూ 144 సెక్షన్‌ అమలును ప్రస్తావిస్తూ కడప ఎంపీ వైఎస్‌ అవినాష్‌రెడ్డికి పోలీసులు నోటీసులు జారీ చేశారు. అర్బన్‌ సీఐ పురుషోత్తంరాజు ఈ నోటీసులు అందజేసినట్లు పార్టీ వర్గాలు తెలిపాయి. ఇదే సమయంలో ఇతర ప్రాంతాల నుంచి టీడీపీ కార్యకర్తలను తరలించి నామినేషన్‌ కేంద్రాల వద్ద మోహరిస్తున్నా పోలీసులు పట్టించుకోవడం లేదని వైయ‌స్ఆర్‌సీపీ నేతలు ఆరోపించారు. తిరుపతిలో భూమన, అభినయ్‌రెడ్డిపై కేసు తిరుపతిలో భూమన కరుణాకర్‌రెడ్డి, అభినయ్‌రెడ్డిపై కేసు నమోదైంది. తిరుపతి ఈస్ట్‌ పోలీస్‌స్టేషన్‌లో కేసు నమోదు చేసినట్లు సమాచారం. సంజయ్‌గాంధీ కాలనీలోని తొమ్మిదో వార్డు సచివాలయం వద్ద నామినేషన్ల దాఖలు సందర్భంగా విధులకు ఆటంకం కలిగించారంటూ హెడ్‌ కానిస్టేబుల్‌ వినోద్‌కుమార్‌ ఫిర్యాదు చేసినట్లు పేర్కొన్నారు. అయితే వైయ‌స్ఆర్‌సీపీ అభ్యర్థుల నామినేషన్లను అడ్డుకున్న టీడీపీ నాయకులపై కేసులు నమోదు చేయకపోవడంపై పార్టీ నేతలు అభ్యంతరం వ్యక్తం చేశారు. పుంగనూరులో ఎంపీ మిథున్‌రెడ్డిపై దాడి పుంగనూరులో వైయ‌స్ఆర్‌సీపీ ఎంపీ మిథున్‌రెడ్డిపై హత్యాయత్నం జరిగిందని పార్టీ నేతలు ఆరోపించారు. రాళ్లు, రాడ్లు, కర్రలతో ముందస్తు ప్రణాళిక ప్రకారం దాడికి పాల్పడ్డారని పేర్కొన్నారు. పోలీసులు చివరి క్షణంలో గాల్లోకి కాల్పులు జరిపారని తెలిపారు. స్థానిక ఎన్నికల్లో వైయ‌స్ఆర్‌సీపీ అభ్యర్థులను నామినేషన్లు వేయకుండా అడ్డుకునేందుకు రాష్ట్రవ్యాప్తంగా దాడులు, బెదిరింపులు జరుగుతున్నాయని పార్టీ నేతలు ఆరోపించారు. పులివెందులలో వైయ‌స్ఆర్‌సీపీ నేత చికెన్‌ సెంటర్‌కు నిప్పు పులివెందులలో వైయ‌స్ఆర్‌సీపీ నేతకు చెందిన చికెన్‌ సెంటర్‌కు శుక్రవారం అర్ధరాత్రి నిప్పు పెట్టినట్లు సమాచారం. శనివారం ఉదయం సంఘటన స్థలాన్ని కడప ఎంపీ వైఎస్‌ అవినాష్‌రెడ్డి, మున్సిపల్‌ ఇన్‌ఛార్జ్‌లు వైఎస్‌ మనోహర్‌రెడ్డి, దుష్యంత్‌రెడ్డి పరిశీలించారు. ఘటనకు బాధ్యులైన వారిపై చర్యలు తీసుకోవాలని పార్టీ నేతలు కోరారు. పిడుగురాళ్లలో అభ్యర్థుల అరెస్టులు పిడుగురాళ్ల మున్సిపల్‌ కార్యాలయంలో నామినేషన్లు దాఖలు చేసేందుకు సిద్ధమైన వైయ‌స్ఆర్‌సీపీ అభ్యర్థులు గుర్రం అప్పిరెడ్డి, నంద్యాల బాబు, కందుకూరు శీను, ఈర్ల శివ, మంద ఆనంద్‌, వేముల కిరణ్‌, ఓర్సు దుర్గాప్రసాద్‌, చల్లా శివారెడ్డిలను పోలీసులు అర్ధరాత్రి అదుపులోకి తీసుకున్నట్లు పార్టీ వర్గాలు తెలిపాయి. వైయ‌స్ఆర్‌సీపీ నాయకులు అల్లు పిచ్చిరెడ్డి, మంద సుధీర్‌, కణాల శ్రీనివాస్‌రెడ్డిలను కూడా అదుపులోకి తీసుకున్నట్లు పేర్కొన్నాయి. మరోవైపు అభ్యర్థులు నామినేషన్లు దాఖలు చేయకుండా పిడుగురాళ్ల మున్సిపల్‌ కార్యాలయానికి తాళాలు వేసినట్లు పార్టీ నేతలు ఆరోపించారు. గురజాలలో చైర్మన్‌ అభ్యర్థి సహా ముగ్గురు నేతలను తీసుకెళ్లిన పోలీసులు గురజాల నగర పంచాయతీకి నామినేషన్లు దాఖలు చేయడానికి సిద్ధమైన చైర్మన్‌ అభ్యర్థి పోలు వీరారెడ్డితో పాటు కీలక నేతలు యనుమల మురళీధర్‌రెడ్డి, కొమ్మినేని వెంకటేశ్వర్లను పోలీసులు బలవంతంగా వాహనంలో ఎక్కించుకుని తీసుకెళ్లినట్లు వైయ‌స్ఆర్‌సీపీ వర్గాలు తెలిపాయి. పోలీస్‌ స్టేషన్‌కు వచ్చి మాట్లాడాలని గురజాల టౌన్‌ సీఐ మురళీ చెప్పిన అనంతరం, స్టేషన్‌ బయట నుంచి ప్రైవేట్‌ వాహనంలో వారిని తీసుకెళ్లినట్లు పేర్కొన్నాయి. నామినేషన్ల సమయంలో అభ్యర్థులను నిర్బంధించడం ఎన్నికల స్వేచ్ఛకు ఆటంకమని పార్టీ నేతలు అభ్యంతరం వ్యక్తం చేశారు. పల్నాడులో కాసు మహేష్‌రెడ్డి హౌస్‌ అరెస్ట్‌ పల్నాడు జిల్లాలో వైయ‌స్ఆర్‌సీపీ అభ్యర్థులను అక్రమంగా అరెస్టు చేస్తున్నారని మాజీ ఎమ్మెల్యే కాసు మహేష్‌రెడ్డి ఆగ్రహం వ్యక్తం చేశారు. తనను కూడా హౌస్‌ అరెస్ట్‌ చేశారని తెలిపారు. టీడీపీ అరాచకాలపై న్యాయస్థానంలో పోరాడతామని స్పష్టం చేశారు. పిడుగురాళ్లతో పాటు పల్నాడులోని ఇతర ప్రాంతాల్లోనూ నామినేషన్ల ప్రక్రియకు ఆటంకాలు కలిగిస్తున్నారని వైయ‌స్ఆర్‌సీపీ నేతలు ఆరోపించారు. రాయచోటిలో పార్టీ కార్యాలయంపై దాడి రాయచోటిలో వైయ‌స్ఆర్‌సీపీ కార్యాలయంపై దాడి చేసి, వాహనాలకు నిప్పు పెట్టినట్లు పార్టీ వర్గాలు తెలిపాయి. ఈ ఘటనలు స్థానిక ఎన్నికల సమయంలో తీవ్ర ఉద్రిక్తతలకు దారితీశాయని పేర్కొన్నాయి. ఎన్నికల ప్రక్రియలో పాల్గొంటున్న పార్టీ నాయకులు, కార్యకర్తలకు రక్షణ కల్పించాల్సిన బాధ్యత పోలీసులపై ఉందని వైయ‌స్ఆర్‌సీపీ నేతలు స్పష్టం చేశారు. ధర్మవరంలో నామినేషన్లకు వెళ్తున్న వారిపై రాళ్ల దాడి ధర్మవరంలో నామినేషన్లు దాఖలు చేసేందుకు వెళ్తున్న వైయ‌స్ఆర్‌సీపీ శ్రేణులపై రాళ్ల దాడి జరిగినట్లు పార్టీ వర్గాలు తెలిపాయి. కూటమి నాయకులు నామినేషన్‌ పత్రాలను బలవంతంగా లాక్కొని చించివేశారని ఆరోపించాయి. ఈ దాడుల్లో 22 మంది గాయపడగా, వారిలో ఐదుగురికి తీవ్ర గాయాలైనట్లు పేర్కొన్నాయి. తాడిపత్రిలో హత్య బెదిరింపులు.. ఆళ్లగడ్డలో పత్రాల చించివేత తాడిపత్రిలో వైయ‌స్ఆర్‌సీపీ అభ్యర్థిని హత్య చేస్తామని బెదిరించినట్లు పార్టీ నేతలు వెల్లడించారు. ఆళ్లగడ్డలో నామినేషన్‌ పత్రాలను చించి అభ్యర్థుల ముఖాలపై విసిరేసినట్లు ఆరోపించారు. గుత్తిలో వైయ‌స్ఆర్‌సీపీ నేత సోదరుడు జలానిని కిడ్నాప్‌ చేసినట్లు పార్టీ వర్గాలు పేర్కొన్నాయి. దాచేపల్లిలో అభ్యర్థిని నిర్బంధించి హెచ్చరికలు జారీ చేసినట్లు తెలిపాయి. ఈ ఘటనలపై సమగ్ర విచారణ జరిపి బాధ్యులపై చర్యలు తీసుకోవాలని కోరాయి. తిరుపతిలో నామినేషన్లకు ఆటంకాలు తిరుపతిలో నామినేషన్ల దాఖలు సందర్భంగా పలుచోట్ల ఆటంకాలు ఎదురయ్యాయని వైయ‌స్ఆర్‌సీపీ నేతలు తెలిపారు. నామినేషన్లు దాఖలు చేసిన పత్రాలను కొందరు తీసుకెళ్లినట్లు ఆరోపించారు. అభ్యర్థులు తమ నామినేషన్లను సజావుగా దాఖలు చేసుకునేందుకు అవసరమైన భద్రత కల్పించాలని కోరారు. పోలీసుల చర్యలు అన్ని పార్టీలకు సమానంగా ఉండాలని స్పష్టం చేశారు. టీడీపీ మూకల దాడిలో సాక్షి సిబ్బందికి గాయాలు టీడీపీ కార్యకర్తల దౌర్జన్యాన్ని చిత్రీకరిస్తున్న సాక్షి కెమెరామెన్‌, రిపోర్టర్‌పై కూడా దాడి జరిగినట్లు సమాచారం. ఎన్నికల సమయంలో జరుగుతున్న ఘటనలను రికార్డు చేస్తున్న మీడియా సిబ్బందిపై దాడులు జరగడం పత్రికా స్వేచ్ఛ, జర్నలిస్టుల భద్రతపై ఆందోళన కలిగించే అంశమని వైయ‌స్ఆర్‌సీపీ వర్గాలు పేర్కొన్నాయి. ఎన్నికలను ఏకగ్రీవం చేసుకునేందుకు అధికార దుర్వినియోగమా? రాష్ట్రవ్యాప్తంగా పలుచోట్ల రాళ్లు, రాడ్లు, కర్రలతో దాడులు, నామినేషన్‌ పత్రాల చించివేత, అభ్యర్థుల నిర్బంధం, బెదిరింపులు చోటుచేసుకున్నట్లు వైయ‌స్ఆర్‌సీపీ నేతలు ఆరోపిస్తున్నారు. అధికార బలాన్ని ఉపయోగించి ఎన్నికలను ఏకగ్రీవం చేసుకోవాలనే ప్రయత్నాలు జరుగుతున్నాయని విమర్శిస్తున్నారు. కళ్లెదుటే దాడులు జరుగుతున్నా పోలీసులు ప్రేక్షక పాత్ర పోషిస్తున్నారని అభ్యంతరం వ్యక్తం చేస్తున్నారు. స్థానిక సంస్థల ఎన్నికల్లో ప్రతి అభ్యర్థికి నామినేషన్‌ దాఖలు చేసే అవకాశం కల్పించడం, ఓటర్లు స్వేచ్ఛగా తమ ప్రతినిధులను ఎన్నుకునేలా చూడడం ఎన్నికల వ్యవస్థకు కీలకం. కడప నుంచి పల్నాడు వరకు వెలుగుచూసినట్లు చెబుతున్న ఘటనలపై నిష్పక్షపాత విచారణ జరిపి, నామినేషన్‌ కేంద్రాల వద్ద భద్రత పెంచి, అభ్యర్థులు ఎలాంటి భయాందోళనలు లేకుండా ఎన్నికల ప్రక్రియలో పాల్గొనేలా చర్యలు తీసుకోవాల్సిన అవసరం ఉంది.
