విజయనగరం. శ్రీకాకుళం: రాష్ట్రంలో జరుగుతున్న స్థానిక సంస్థల ఎన్నికల ప్రక్రియలో శాంతిభద్రలకు విఘాతం కలగుతుండటంపై దేశంలోని అత్యున్నత న్యాయస్థానం చేసిన వ్యాఖ్యలు రాష్ట్ర ప్రభుత్వానికి చెంప పెట్టు వంటివి ఆని శాసన మండలిలో విపక్ష నేత, వైఎస్సార్ సీనియర్ నాయకులు బొత్స సత్యనారాయయణ ఆక్షేపించారు స్థానిక ఎన్నికల నిర్వహణలో కోర్టు జోక్యం చేసుకోవాల్సిన పరిస్థితి రావడం, రాష్ట్ర ప్రభుత్వ పనితీరుపై అనేక ప్రశ్నలు తలెత్తుతుండటం సిగ్గుచేటని ఆయన ఎద్దేవా చేశారు. విజయనగరంలోని జిల్లా వైఎస్సార్ సీపీ కార్యాయంలో ఆయన మాట్లాడుతూ, స్థానిక ఎన్నికల సందర్భంగా రాష్ట్రంలోని జరుగుతున్న పరిణామాలు, అధికార కూటమి పార్టీ సాగిస్తున్న అరాచకాలపై అత్యున్నత న్యాయస్థానం చేసిన సూచనలు, జారీ చేసిన ఆదేశాలను గౌరవించి ప్రభుత్వం తగు చర్యలు తీసుకోవాలని ఆయన డిమాండ్ చేసారు. సుప్రీంకోర్టు జోక్యం చేసుకున్న తర్వాత కూడా ఎన్నికల ప్రక్రియలో అవాంతరాలు ఎదురవుతుండటం రాష్ట్ర ప్రభుత్వ బరితెగింపునుకు నిదర్శనమని ఆయన మండిపడ్డారు. ఎన్నికలు స్వేచ్ఛగా, నిష్పక్షపాతంగా జరిగేలా చర్యలు తీసుకోవాలని, నామినేషన్ల దాఖలుకు అవసరమైన భద్రత కల్పించాలని, ఎన్నికల సంఘం తన అధికారాలను సమర్థంగా వినియోగించి, ప్రతి అభ్యర్థికి సమాన అవకాశాలు కల్పించేలా చూడాలని బొత్స సత్యనారాయణ డిమాండ్ చేశారు. సుప్రీంకోర్టు ఆదేశాలు, సూచనలకు సంబంధించి ఏవైనా గడువులు లేదా ప్రక్రియాపరమైన మార్గదర్శకాలు ఉంటే వాటిని యథాతథంగా పాటించాలని, ప్రజాస్వామ్య ప్రక్రియను ఎవరూ రాజకీయ ప్రయోజనాలకు అనుగుణంగా మార్చకూడదని ఆయన హితవు పలికారు. ఈ ప్రెస్ మీట్ ఆయన ఇంకా ఏం మాట్లాడరంటే... ఎలక్షన్ కమిషన్ ఇకైనైనా బాధ్యతగా వ్యవహరించాలి ఎలక్షన్ కమిషన్ బాధ్యత కేవలం ఎన్నికల షెడ్యూల్ ప్రకటించడం, నామినేషన్ల తేదీలు నిర్ణయించడం మాత్రమే కాదు. అభ్యర్థులు నిర్భయంగా నామినేషన్లు దాఖలు చేసుకునేలా చూడాలి. అవసరమైన పోలీసు భద్రత కల్పించాలి. ఎన్నికల నిబంధనలు ఉల్లంఘించిన వారిపై చర్యలు తీసుకోవాలి. నామినేషన్ల ప్రక్రియలో ఎక్కడైనా అడ్డంకులు ఎదురైతే వాటిని పరిశీలించి పరిష్కరించాలి. బాధితుల ఫిర్యాదులను నిర్లక్ష్యం చేయకూడదు. ఎన్నికల ప్రక్రియలో పాల్గొనే ప్రతి ఒక్కరికీ న్యాయం జరిగేలా ఎన్నికల సంఘం వ్యవహరించాలి. సుప్రీంకోర్టు జోక్యం చేసుకున్నప్పటికీ సమస్యలు కొనసాగుతున్నాయనే ఆరోపణలు రావడం వ్యవస్థలోని లోపాలను పరిశీలించాల్సిన అవసరాన్ని తెలియజేస్తోంది. ఎన్నికల సంఘం, పోలీసు శాఖ, జిల్లాల యంత్రాంగం సమన్వయంతో వ్యవహరించి ఎన్నికలు సజావుగా జరిగేలా చూడాలి. రాష్ట్రంలో జరుగుతున్న స్థానిక సంస్థల ఎన్నికల ప్రక్రియను చూస్తుంటే ప్రజాస్వామ్యం ఏ దిశగా వెళ్తోందో అర్థం కాని పరిస్థితి నెలకొంది. నిష్పక్షపాతంగా ఎన్నికలు నిర్వహించాల్సిన ఎన్నికల సంఘం, ఎన్నికల ప్రక్రియను పర్యవేక్షించాల్సిన అధికారులు తమ బాధ్యతలను సక్రమంగా నిర్వర్తించాలి. ఎన్నికల్లో పోటీ చేయాలనుకునే అభ్యర్థులకు ఎలాంటి భయాలు, ఒత్తిళ్లు లేకుండా నామినేషన్లు దాఖలు చేసుకునే అవకాశం కల్పించాలి. కానీ రాష్ట్రంలో జరుగుతున్న పరిణామాలు అందుకు భిన్నంగా ఉన్నాయి. ప్రజాస్వామ్యంలో ఎన్నికలు అనేవి ప్రజలు తమ అభిప్రాయాన్ని స్వేచ్ఛగా వ్యక్తం చేసే ప్రక్రియ. అధికారంలో ఉన్న పార్టీకి అనుకూలంగా మాత్రమే ఎన్నికల ప్రక్రియ సాగితే ప్రజాస్వామ్యానికి అర్థం ఏముంటుంది? ప్రతిపక్ష పార్టీల అభ్యర్థులు నామినేషన్లు వేయకుండా అడ్డంకులు సృష్టించడం, దాడులు జరుగుతున్నాయని ఆరోపణలు రావడం, బాధితులకు రక్షణ కల్పించాల్సిన పోలీసులపైనే ప్రశ్నలు తలెత్తడం అత్యంత దురదృష్టకరం. ప్రభుత్వం సమాధానం చెప్పాలి ప్రజాస్వామ్యాన్ని కాపాడతామని, తప్పు జరిగితే ప్రశ్నిస్తామని చెప్పే కూటమి నాయకులు ఇప్పుడు రాష్ట్రంలో జరుగుతున్న పరిణామాలపై సమాధానం చెప్పాలి. ప్రతిపక్షం ఎన్నికల్లో పోటీ చేయకుండా అడ్డంకులు సృష్టించాల్సిన అవసరం ఏమిటి? నామినేషన్లు వేసేందుకు వచ్చిన అభ్యర్థులను అడ్డుకోవాల్సిన పరిస్థితి ఎందుకు వచ్చింది? ప్రజల తీర్పుపై నమ్మకం ఉంటే ఎన్నికల్లో స్వేచ్ఛగా పోటీ చేయనివ్వాలి కదా? ఇప్పుడు కూడా ఎన్నికలు ప్రజాస్వామ్యబద్ధంగా జరగాలి. ప్రభుత్వంపై ప్రజలకు విశ్వాసం ఉంటే, తమ పాలనపై నమ్మకం ఉంటే, ప్రతిపక్ష అభ్యర్థులను చూసి భయపడాల్సిన అవసరం ఏముంది? ప్రజాస్వామ్యం అనేది అధికారంలో ఉన్నవారి ఇష్టానుసారం నడిచే వ్యవస్థ కాదు. రాజ్యాంగం, చట్టాలు, ఎన్నికల నియమావళి ప్రకారం నడవాలి. ప్రజలు తమకు నచ్చిన అభ్యర్థికి ఓటు వేసే స్వేచ్ఛ కలిగి ఉండాలి. ఆ స్వేచ్ఛను కాపాడటం ప్రభుత్వ ప్రధాన బాధ్యత. మా ప్రభుత్వం రాగానే అధికారుల తీరుపై న్యాయవిచారణ జరిపించి చర్యలు తీసుకుంటాం ఎన్నికల సమయంలో పోలీసుల పాత్ర అత్యంత కీలకం. శాంతిభద్రతలను పరిరక్షించడంతోపాటు, అభ్యర్థులు తమ నామినేషన్లు దాఖలు చేసుకునేందుకు రక్షణ కల్పించాలి. ఫిర్యాదులు వచ్చినప్పుడు నిష్పక్షపాతంగా విచారణ జరిపి చర్యలు తీసుకోవాలి. కానీ ఎన్నికల సమయంలో పోలీసుల వ్యవహారశైలిపై అనేక ప్రశ్నలు తలెత్తుతున్నాయి. దాడులకు పాల్పడిన వారిపై చర్యలు తీసుకున్నారా? బాధిత అభ్యర్థులకు రక్షణ కల్పించారా? నామినేషన్లు దాఖలు చేయకుండా అడ్డుకున్న ఘటనలపై ఎలాంటి నివేదికలు రూపొందించారు? ఈ అంశాలన్నింటికీ అధికారులు సమాధానం చెప్పాలి. ఎన్నికల ప్రక్రియలో జరిగినట్లు ఆరోపణలు వస్తున్న ఘటనలపై పూర్తి స్థాయి విచారణ జరగాలి. వాస్తవాలు వెలుగులోకి రావాలి. తప్పు చేసిన వారు ఏ స్థాయిలో ఉన్నా చట్టప్రకారం బాధ్యత వహించాలి. పోలీసు కానిస్టేబుల్ నుంచి ఉన్నతాధికారుల వరకు, ఎవరిపైనైనా ఆరోపణలు వచ్చినప్పుడు ఆధారాల ప్రకారం విచారణ జరగాలి. వైఎస్సార్‌సీపీ అధికారంలోకి వచ్చిన తర్వాత ఈ ఘటనలపై న్యాయపరమైన విచారణ జరిపించి, విచారణలో తప్పు చేసినట్లు నిర్ధారణ అయిన వారిపై చట్టప్రకారం చర్యలు తీసుకుంటామని స్పష్టం చేస్తున్నాం. ఇది రాజకీయ కక్ష సాధింపు కోసం కాదు. ప్రజాస్వామ్య వ్యవస్థపై ప్రజలకు నమ్మకం కల్పించేందుకు అవసరమైన బాధ్యత. ప్రజాక్షేత్రంలోనే తేల్చుకుంటాం..! వైఎస్సార్‌సీపీ ఎన్నికలను బహిష్కరించే పార్టీ కాదు. ప్రజాస్వామ్య ప్రక్రియలో పాల్గొని ప్రజల తరఫున పోరాడే పార్టీ. ఎన్ని అడ్డంకులు ఎదురైనా మా అభ్యర్థులు, కార్యకర్తలు ధైర్యంగా ఎన్నికల్లో పాల్గొంటారు. చట్టబద్ధమైన మార్గాల్లో పోరాటం కొనసాగిస్తాం. ఎన్నికల్లో పోటీ చేయడం ప్రతి అర్హుడైన అభ్యర్థికి ఉన్న హక్కు. ఆ హక్కును కాలరాయడానికి ఎవరూ ప్రయత్నించకూడదు. నామినేషన్ల ప్రక్రియ నుంచి ఓట్ల లెక్కింపు వరకు ప్రతి దశలోనూ పారదర్శకత ఉండాలి. ప్రజల తీర్పు స్వేచ్ఛగా వెలువడేలా ఎన్నికల సంఘం చర్యలు తీసుకోవాలి. మేము న్యాయస్థానాలను ఆశ్రయించాం. ఎన్నికల ప్రక్రియ సక్రమంగా సాగేందుకు అవసరమైన న్యాయపరమైన చర్యలు తీసుకుంటున్నాం. న్యాయస్థానాల ఆదేశాలు అమలయ్యే వరకు, మా అభ్యర్థులకు న్యాయం జరిగే వరకు పోరాటం కొనసాగిస్తాం. రాష్ట్రంలో జరుగుతున్న ఎన్నికల పరిణామాలను ప్రజలు నిశితంగా గమనించాలి. రాజకీయ పార్టీలు, ప్రజాప్రతినిధులు, అధికారులు తమ బాధ్యతలను సక్రమంగా నిర్వర్తిస్తున్నారా లేదా అన్నది ప్రశ్నించాలి. ఎన్నికలు అంటే కేవలం అధికారాన్ని దక్కించుకునే ప్రక్రియ కాదు. ప్రజల అభిప్రాయాన్ని గౌరవించే వ్యవస్థ. అభ్యర్థులు స్వేచ్ఛగా పోటీ చేయడం, ఓటర్లు నిర్భయంగా ఓటు వేయడం, ఎన్నికల సంఘం నిష్పక్షపాతంగా వ్యవహరించడం ప్రజాస్వామ్యానికి పునాదులు. ఈ పునాదులను బలహీనపరిచే చర్యలను ఎవరూ సమర్థించకూడదు. ప్రజాస్వామ్య పరిరక్షణ కోసం అన్ని రాజకీయ పార్టీలు, ప్రజాస్వామ్యవాదులు, ప్రజలు కలిసి నిలబడాలి. కలసి పోరాడి ప్రజాస్వామ్యాన్ని రాష్ట్రంలో పునరుద్దరించాలి. ప్రజాస్వామ్యాన్ని కాపాడుకుందాం.. స్వేచ్ఛాయుత ఎన్నికల కోసం కలిసి పోరాడుదాం. ప్రజల తీర్పే అంతిమ తీర్పుగా పరిగణించాలి అని బొత్స సత్యనారాయణ వ్యాఖ్యానించారు. చంద్రబాబుతో రాజ్యాంగ వ్యవస్థలకు గండం మాజీ మంత్రి ధర్మాన ప్రసాదరావు ధ్వజం శ్రీకాకుళం:రాష్ట్రంలో కూటమి ప్రభుత్వం అధికారంలోకి వచ్చిన తర్వాత రాజ్యాంగ వ్యవస్థల స్వతంత్రత ప్రశ్నార్థకంగా మారిందని, ప్రజాస్వామ్య విలువలకు విరుద్ధంగా పరిపాలన సాగుతోందని వైఎస్సార్‌సీపీ సీనియర్ నేత, మాజీ మంత్రి ధర్మాన ప్రసాదరావు ఆగ్రహం వ్యక్తం చేసారు. స్థానిక సంస్థల ఎన్నికల్లో నామినేషన్ల దాఖలుకు అడ్డంకులు ఎదురవుతున్నాయని వైఎస్సార్ కాంగ్రెస్ పార్టీ సుప్రీంకోర్టును ఆశ్రయించిన నేపథ్యంలో, న్యాయస్థానం వ్యక్తం చేసిన అభిప్రాయాలు రాష్ట్రంలో నెలకొన్న పరిస్థితుల తీవ్రతను తెలియజేస్తున్నాయని పేర్కొన్నారు. శ్రీకాకుళంలో స్థానికంగా క్యాంప్ కార్యాలయంలో ఆయన మీడియాతో మాట్లాడుతూ, సుప్రీంకోర్టు వ్యాఖ్యల నేపథ్యంలోనైనా చంద్రబాబు ప్రభుత్వం ఆత్మపరిశీలన చేసుకోవాలని, ఎన్నికల సంఘం, పోలీస్ వ్యవస్థలు రాజ్యాంగబద్ధంగా, నిష్పక్షపాతంగా పనిచేసేలా చర్యలు తీసుకోవాలని ధర్మాన ప్రసాదరావు డిమాండ్ చేశారు. చంద్రబాబు నాయుడు అధికారంలో ఉన్న ప్రతిసారీ రాజ్యాంగ వ్యవస్థల స్వతంత్రతకు విఘాతం కలుగుతోందని వివరించారు. ప్రభుత్వం ప్రజాస్వామ్యబద్ధంగా పనిచేయాల్సింది పోయి, అధికారాన్ని ఉపయోగించి ప్రతిపక్షాలను అణచివేసే ప్రయత్నం చేస్తోందని ధ్వజమెత్తారు. ప్రజాస్వామ్యంలో ఎన్నికలు స్వేచ్ఛగా, నిష్పక్షపాతంగా జరగాల్సి ఉన్నా సరే, రాష్ట్రంలో నామినేషన్లు వేయడానికి కూడా అడ్డంకులు సృష్టించే పరిస్థితి ఎదురుకావడం చంద్రబాబు నిరంకుశత్వానికి పరాకాష్టగా అభివర్ణించారు. ఈ పరిస్థితుల్లో బాధితులు సుప్రీంకోర్టును ఆశ్రయించాల్సి రావడం రాష్ట్ర పరిపాలనలోని లోపాలను తెలియజేస్తోందని ధర్మాన ఆగ్రహం వ్యక్తం చేసారు. ఈ ప్రెస్ మీట్ లో ఆయన ఇంకా ఏం మాట్లాడరంటే... సుప్రీంకోర్టు జోక్యం చేసుకోవడం సిగ్గుచేటు ఎన్నికల ప్రక్రియలో సాధారణంగా న్యాయస్థానాల జోక్యం పరిమితంగా ఉంటుంది. అయితే ప్రజాస్వామ్య హక్కులకు భంగం కలిగినప్పుడు న్యాయస్థానాలు జోక్యం చేసుకోవాల్సిన పరిస్థితి ఏర్పడుతుంది. వైఎస్సార్‌సీపీ దాఖలు చేసిన పిటిషన్‌పై సుప్రీంకోర్టు ప్రాథమికంగా పరిశీలించదగిన అంశాలు ఉన్నాయని అభిప్రాయపడింది. నామినేషన్ల దాఖలుకు ఆటంకాలు ఎదురయ్యాయని పార్టీ సమర్పించిన ఆధారాలు, అభ్యర్థుల భద్రతకు సంబంధించిన అంశాలు న్యాయస్థానం దృష్టికి వెళ్లాయి. ఎన్నికల్లో పోటీ చేయాలంటే న్యాయస్థానాలను ఆశ్రయించాల్సిన పరిస్థితి ఎందుకు రావాలి? ప్రజాస్వామ్యంలో ప్రతి పౌరుడికి తనకు నచ్చిన అభ్యర్థిగా పోటీ చేసే హక్కు ఉంది. ఆ హక్కును కాపాడాల్సిన బాధ్యత ప్రభుత్వంపై, ఎన్నికల సంఘంపై, పోలీస్ వ్యవస్థపై ఉంది. ఎన్నికల సమయంలో పోలీస్ వ్యవస్థ నిష్పక్షపాతంగా వ్యవహరించడం అత్యంత కీలకం. అధికార పార్టీకి ఒక విధంగా, ప్రతిపక్ష పార్టీలకు మరో విధంగా వ్యవహరిస్తే ప్రజాస్వామ్యానికి ప్రమాదకరం. ఎన్నికల్లో పాల్గొనే వైఎస్సార్‌సీపీ అభ్యర్థులతో పాటు ఇతర పార్టీల అభ్యర్థులు, స్వతంత్ర అభ్యర్థులకు కూడా సమానమైన భద్రత కల్పించాలి. అభ్యర్థులకు రక్షణ కల్పించాల్సిన అవసరంపై సుప్రీంకోర్టు దృష్టి సారించినందున పోలీస్ అధికారులు తమ రాజ్యాంగబద్ధమైన బాధ్యతలను గుర్తుంచుకోవాలి. ఐపీఎస్ అధికారులైనా, ఇతర పోలీస్ అధికారులైనా రాజ్యాంగానికి, చట్టానికి లోబడి పనిచేయాలి. రాజకీయ నాయకుల ఆదేశాల కంటే చట్టమే వారికి మార్గదర్శకంగా ఉండాలి. ఎన్నికల సమయంలో ఏ అభ్యర్థికీ అన్యాయం జరగకుండా చూడటం వారి బాధ్యత. ఎస్ఈసీ స్వతంత్రంగా పని చేయాలి రాష్ట్ర ఎన్నికల కమిషన్ స్వతంత్రంగా పనిచేస్తూ ఎన్నికల ప్రక్రియలో ఎదురయ్యే ఫిర్యాదులను సకాలంలో పరిష్కరించాలి. నామినేషన్లు దాఖలు చేసుకునే స్వేచ్ఛకు ఆటంకం కలిగిందని రాజకీయ పార్టీలు, అభ్యర్థులు సమర్పించిన వినతులను నిర్లక్ష్యం చేయకూడదు. సమస్యలు ఎదురైన ప్రాంతాల్లో నిబంధనలకు అనుగుణంగా తగిన చర్యలు తీసుకోవాలి. సుప్రీంకోర్టు ఆదేశాలను గౌరవించాలి. ఎన్నికల ప్రక్రియలో లోపాలు ఉన్నాయనే ఫిర్యాదులు వచ్చినప్పుడు వాటిని నిష్పక్షపాతంగా పరిశీలించి, బాధితులకు న్యాయం చేయాల్సిన అవసరం ఉంది. సుప్రీంకోర్టు ఆదేశాలను తక్షణమే అమలు చేయాలి రాష్ట్రంలోని స్థానిక ఎన్నికల ప్రక్రియలో సుప్రీంకోర్టు జోక్యాన్ని వైఎస్సార్ కాంగ్రెస్ పార్టీ స్వాగతిస్తోంది. న్యాయస్థానం సూచించిన చర్యలను సంబంధిత అధికారులు అమలు చేసి, ఆ వివరాలను నిబంధనల ప్రకారం కోర్టుకు సమర్పించాలి. కూటమి ప్రభుత్వం ఇప్పటికైనా రాజకీయ కక్ష సాధింపు ధోరణిని విడనాడి, రాజ్యాంగ విలువలకు కట్టుబడి పనిచేయాలి. ఎలక్షన్ కమిషన్, పోలీస్ ఉన్నతాధికారులు తమ విధుల్లో నిష్పక్షపాతాన్ని నిరూపించుకోవాలి. సుప్రీంకోర్టు జోక్యం చేసుకునే పరిస్థితి వచ్చినప్పుడు పాలకులు తమ పరిపాలనపై ఆత్మపరిశీలన చేసుకోవాలి. రాజ్యాంగ వ్యవస్థల గౌరవాన్ని కాపాడాలి. ఎన్నికలు స్వేచ్ఛగా, నిష్పక్షపాతంగా జరిగేలా చూడాలి. ప్రజాస్వామ్య హక్కులను కాపాడటమే ప్రభుత్వానికి నిజమైన బాధ్యత. నామినేషన్ల దాఖలులో ఎదురైన సమస్యలను నిబంధనల ప్రకారం పరిష్కరించాలి. అన్ని పార్టీల అభ్యర్థులకు సమాన భద్రత కల్పించాలి. ఎన్నికల సంఘం, పోలీస్ వ్యవస్థలు రాజకీయ ఒత్తిళ్లకు అతీతంగా పనిచేసేలా చర్యలు తీసుకోవాలి అని ధర్మాన ప్రసాదరావు కోరారు.
