విజ‌య‌వాడ: జెడ్పీటీసీ, ఎంపీటీసీ ఎన్నికల నామినేషన్ల ప్రక్రియలోనూ మున్సిపల్‌ ఎన్నికల తరహాలోనే అభ్యర్థులకు అడ్డంకులు ఎదురవుతున్నాయని వైయ‌స్ఆర్‌సీపీ రాష్ట్ర ప్రధాన కార్యదర్శి, ఎమ్మెల్సీ లేళ్ల అప్పిరెడ్డి ధ్వ‌జ‌మెత్తారు. రాష్ట్రవ్యాప్తంగా పలు జిల్లాల్లో అభ్యర్థులను నామినేషన్లు వేయకుండా అడ్డుకోవడం, నామినేషన్‌ పత్రాలను చించివేయడం, మహిళలపై దాడులకు పాల్పడటం వంటి ఘటనలు చోటుచేసుకుంటున్నాయని పేర్కొన్నారు. ఎన్నికలు స్వేచ్ఛగా, నిష్పక్షపాతంగా జరిగేలా చర్యలు తీసుకోవాలని, శాంతిభద్రతలను కాపాడుతూ అభ్యర్థులకు రక్షణ కల్పించాలని కోరుతూ రాష్ట్ర ఎన్నికల కమిషనర్‌కు వైయ‌స్ఆర్‌సీపీ నేతలు వినతిపత్రం అందజేశారు. అనంతరం పార్టీ ప్రధాన కార్యదర్శి, ఎమ్మెల్సీ లేళ్ల అప్పిరెడ్డి, ఎమ్మెల్సీ కల్పలతారెడ్డి, మాజీ ఎమ్మెల్యే టీజేఆర్ సుధాకర్బాబు మీడియాతో మాట్లాడారు. మీడియాతో వారు ఏమ‌న్నారంటే.. మున్సిపల్‌ ఎన్నికల నాటి అరాచకాలే జెడ్పీటీసీ, ఎంపీటీసీ నామినేషన్లలోనూ పునరావృతం :లేళ్ల అప్పిరెడ్డి, ఎమ్మెల్సీ. “మున్సిపల్‌ ఎన్నికల సందర్భంగా ఎలాంటి అక్రమాలు, అప్రజాస్వామిక చర్యలు జరిగాయో, ఇప్పుడు జెడ్పీటీసీ, ఎంపీటీసీ నామినేషన్ల ప్రక్రియలోనూ అవే పునరావృతమవుతున్నాయి. కడపలో ఎంపీ వైఎస్‌ అవినాష్‌రెడ్డి, జిల్లా పార్టీ అధ్యక్షుడు రవీంద్రనాథ్‌రెడ్డి నేతృత్వంలో నామినేషన్లు వేసేందుకు వెళ్తున్న అభ్యర్థులను పోలీసులే అడ్డుకుంటున్నారు. నామినేషన్లు వేయడానికి కార్యాలయాల్లోకి వెళ్లేందుకు ప్రయత్నించిన మహిళా అభ్యర్థుల చేతుల్లోని పత్రాలను లాక్కొని చించివేస్తున్నారు. మదనపల్లిలో బారికేడ్లు ఏర్పాటు చేసి ఒక్క అభ్యర్థి కూడా నామినేషన్‌ వేయలేని పరిస్థితి కల్పించారు. అనంతపురం, చిత్తూరు, తిరుపతి, కర్నూలు, పల్నాడు జిల్లాల్లోనూ అభ్యర్థులపై దాడులు జరుగుతున్నాయి. కొందరు ఆస్పత్రుల్లో చికిత్స పొందుతున్నారు. ఎన్నికల సంఘానికి పలుమార్లు ఫిర్యాదు చేసినా న్యాయం జరగకపోవడంతోనే సుప్రీంకోర్టును ఆశ్రయించాల్సి వచ్చింది. అత్యున్నత న్యాయస్థానం జోక్యం చేసుకుని ప్రజాస్వామ్య పరిరక్షణకు తీర్పు ఇవ్వడం వైయ‌స్ఆర్‌సీపీ విజయంగా కాకుండా ప్రజాస్వామ్య విజయంగా భావిస్తున్నాం. ఎన్నికల సంఘం ఇప్పటికైనా కళ్లు తెరిచి, స్వేచ్ఛగా నామినేషన్లు వేసే వాతావరణం కల్పించాలి. సుప్రీంకోర్టు ఆదేశాలు అమలు చేయాలి.. లేదంటే మరోసారి న్యాయపోరాటం సుప్రీంకోర్టు ఆదేశాలను రాష్ట్ర ఎన్నికల సంఘం నిష్పక్షపాతంగా అమలు చేయాలి. మున్సిపల్‌ ఎన్నికల్లో అక్రమాలకు పాల్పడిన పోలీసు, రెవెన్యూ అధికారులను రానున్న ఎన్నికల విధుల నుంచి తప్పించాలి. ఈ నెల 25వ తేదీ వరకు తుది జాబితా ప్రకటించకుండా నిలిపివేయాలన్న ఆదేశాలను కూడా పాటించాలి. సుప్రీంకోర్టు తీర్పును తమకు అనుకూలంగా వక్రీకరించి ప్రచారం చేస్తున్న అధికార పార్టీ తీరును ఎన్నికల సంఘం గమనించాలి. జెడ్పీటీసీ, ఎంపీటీసీ నామినేషన్ల విషయంలోనూ ఎన్నికల సంఘం న్యాయం చేయకపోతే మరోసారి సుప్రీంకోర్టు తలుపులు తడతాం. చట్టాన్ని పక్కనపెట్టి అధికార పార్టీకి అనుకూలంగా వ్యవహరించే పోలీసు, రెవెన్యూ అధికారులపై న్యాయపోరాటం చేస్తాం. వైయ‌స్ఆర్‌సీపీ అధికారంలోకి వచ్చిన తర్వాత ఈ ఘటనలపై చట్టానికి, న్యాయానికి లోబడి నిష్పక్షపాత విచారణ జరిపించి బాధ్యులను చట్టం ముందు నిలబెడతాం. మీది ఆరాటం.. మాది పోరాటం. ప్రజాస్వామ్య పరిరక్షణ కోసం వైయ‌స్ఆర్‌సీపీ పోరాటం ఎట్టి పరిస్థితుల్లోనూ ఆగదు. మరోసారి సుప్రీంకోర్టును ఆశ్రయించాల్సిన పరిస్థితి తీసుకురావద్దు” అని లేళ్ల అప్పిరెడ్డి రాష్ట్ర ఎన్నికల సంఘాన్ని హెచ్చరించారు. సుప్రీంకోర్టు ఆదేశాలను స్వాగతిస్తున్నాం : కల్పలతారెడ్డి, ఎమ్మెల్సీ “మున్సిపల్‌ ఎన్నికల్లో నామినేషన్లను అడ్డుకున్నట్లుగానే ప్రస్తుతం జెడ్పీటీసీ, ఎంపీటీసీ ఎన్నికల్లోనూ నామినేషన్ల ప్రక్రియకు అడ్డంకులు సృష్టిస్తున్నారు. కడప, అనంతపురం, నంద్యాల, కర్నూలు సహా పది జిల్లాలకు పైగా నామినేషన్లను అడ్డుకోవడం, పత్రాలను చించివేయడం, మహిళల పట్ల దురుసుగా వ్యవహరించడం జరుగుతోంది. ఈ పరిస్థితులపై రాష్ట్ర ఎన్నికల కమిషనర్ను కలిసి వినతిపత్రం అందజేశాం. ఎన్నికల సంఘం సకాలంలో స్పందించకపోవడం వల్లే సుప్రీంకోర్టు జోక్యం చేసుకోవాల్సి వచ్చింది. 19 మున్సిపాలిటీల్లో నామినేషన్లను స్వీకరించాలని, అభ్యర్థులకు 45 గంటల గడువు కల్పించాలని, ఈ నెల 25వ తేదీ వరకు తుది జాబితాను ప్రకటించకూడదని, నామినేషన్లు వేసేందుకు వెళ్లే అభ్యర్థులకు రక్షణ కల్పించాలని సుప్రీంకోర్టు ఆదేశాలు ఇచ్చింది. ఈ ఆదేశాలను స్వాగతిస్తున్నాం. జెడ్పీటీసీ, ఎంపీటీసీ ఎన్నికల్లోనూ అభ్యర్థులకు స్వేచ్ఛగా నామినేషన్లు వేసే అవకాశం కల్పించాలి. సుప్రీంకోర్టు మార్గదర్శకాలను ఎన్నికల సంఘం అమలు చేయకపోతే వైయ‌స్ఆర్‌సీపీ మరోసారి న్యాయపోరాటం చేస్తుంది” అని ఎమ్మెల్సీ కల్పలతారెడ్డి స్పష్టం చేశారు. సుప్రీంకోర్టు తీర్పు ప్రజాస్వామ్య పరిరక్షణలో చారిత్రాత్మకం : టీజేఆర్ సుధాకర్బాబు, మాజీ ఎమ్మెల్యే. “సుప్రీంకోర్టు ఇచ్చిన తీర్పు భారత ప్రజాస్వామ్య చరిత్రలో చారిత్రాత్మక ఘట్టం. 19 మున్సిపాలిటీల్లో వైయ‌స్ఆర్‌సీపీ అభ్యర్థులను నామినేషన్లు వేయకుండా అడ్డుకున్నారు. పిడుగురాళ్ల, గురజాల వంటి ప్రాంతాల్లో ఒక్క వార్డులో కూడా నామినేషన్‌ వేయనివ్వలేదు. పలు మున్సిపాలిటీల్లో పరిమిత సంఖ్యలోనే నామినేషన్లు దాఖలు చేయగలిగాం. పోలీసు వ్యవస్థ వైఫల్యం, ఎన్నికల ప్రక్రియలో జరిగిన అక్రమాలకు సుప్రీంకోర్టు తీర్పు అద్దం పట్టింది. ఈ పరిస్థితులకు ముఖ్యమంత్రి చంద్రబాబు నాయుడు నైతిక బాధ్యత వహించి, ఎన్నికల ప్రక్రియ పూర్తయ్యే వరకు రాజీనామా చేయాలి. డీజీపీ, హోంమంత్రి కూడా రాజీనామా చేయాలి. శాంతిభద్రతలను కాపాడటంలో విఫలమైన పోలీసు అధికారులను ఎన్నికల విధుల నుంచి తప్పించాలి. చిత్తూరులో మాజీ ఉపముఖ్యమంత్రి నారాయణస్వామి కారుపై దాడి జరిగినా ప్రభుత్వం స్పందించకపోవడం దారుణం. ప్రతిపక్ష నాయకులు, అభ్యర్థులకు రక్షణ కల్పించాల్సిన బాధ్యత ప్రభుత్వంపై ఉంది. వైయ‌స్ఆర్‌సీపీ అభ్యర్థులను స్వేచ్ఛగా నామినేషన్లు వేసి ఎన్నికల్లో పోటీ చేయనివ్వాలి. ప్రజలే తమ తీర్పును వెల్లడించే అవకాశం కల్పించాలి. సుప్రీంకోర్టు ఆదేశాలను ఎన్నికల సంఘం తక్షణమే అమలు చేసి ప్రజాస్వామ్యాన్ని పరిరక్షించాలి” అని టీజేఆర్ సుధాకర్బాబు తేల్చి చెప్పారు. ప్రధాన ఎన్నికల కమిషనర్ను క‌లిసిన వారిలో వైయ‌స్ఆర్‌సీపీ లీగ‌ల్ సెల్ రాష్ట్ర అధ్యక్షుడు ఎం.మ‌నోహ‌ర్‌రెడ్డి, పార్టీ ఎంప్లాయిస్ అండ్ పెన్ష‌న‌ర్స్ విభాగం రాష్ట్ర అధ్యక్షుడు న‌ల‌మారు చంద్ర‌శేఖ‌ర్‌రెడ్డి, గ్రివెన్స్ సెల్ రాష్ట్ర అధ్యక్షుడు అంకంరెడ్డి నారాయ‌ణ‌మూర్తి, ఎస్సీ సెల్ రాష్ట్ర వ‌ర్కింగ్ ప్రెసిడెంట్ యోహ‌న్ రాజు, బొందిలి విభాగం నాయ‌కుడు నరేంద్ర‌సింగ్ త‌దిత‌రులు ఉన్నారు.
