కృష్ణా జిల్లా: స్థానిక సంస్థల ఎన్నికల్లో వైయ‌స్ఆర్‌సీపీ అభ్యర్థుల విజయమే లక్ష్యంగా ప్రతి కార్యకర్త సమష్టిగా పనిచేయాలని వైయ‌స్ఆర్‌సీపీ జోన్‌–3 ప్రచార విభాగం అధ్యక్షురాలు మైలా రత్నకుమారి పిలుపునిచ్చారు. 2024 ఎన్నికల్లో ఇచ్చిన హామీలను అమలు చేయడంలో కూటమి ప్రభుత్వం విఫలమైందని, ప్రజలకు ఇచ్చిన హామీలు, ప్రస్తుత పాలనలో ఎదురవుతున్న సమస్యలను ప్రతి గ్రామంలో ప్రజలకు వివరించి ప్రభుత్వాన్ని నిలదీయాలని సూచించారు. కృష్ణా జిల్లా పెడన నియోజకవర్గంలోని కృత్తివెన్నులో నియోజకవర్గ సమన్వయకర్త ఉప్పాల రాము ఆధ్వర్యంలో నిర్వహించిన వైయ‌స్ఆర్‌సీపీ విస్తృతస్థాయి సమావేశంలో ఆమె మాట్లాడారు. - ఎన్నికల హామీల అమలులో కూటమి వైఫల్యం “కూటమి ప్రభుత్వం అధికారంలోకి వచ్చి దాదాపు రెండున్నరేళ్లు కావస్తున్నా ఎన్నికల మేనిఫెస్టోలో ప్రకటించిన హామీలను పూర్తిస్థాయిలో అమలు చేయడం లేదు. వైయ‌స్‌ జగన్‌మోహన్‌రెడ్డి గారి ప్రభుత్వంలో అమలు చేసిన అమ్మ ఒడి పథకానికి బదులుగా తల్లికి వందనం అని ప్రకటించారు. అయితే ఎంతమందికి పూర్తి స్థాయిలో లబ్ధి చేకూర్చారు? వాలంటీర్లను కొనసాగిస్తామని, నెలకు రూ.10 వేలు ఇస్తామని హామీ ఇచ్చి వారిని మోసం చేశారు. వైయ‌స్‌ జగన్‌ ప్రభుత్వం వాలంటీర్లకు ఇచ్చిన గుర్తింపు, గౌరవాన్ని ప్రజలకు వివరించాలి. కూటమి ప్రభుత్వం ఇచ్చిన హామీలు, వాటి అమలులో ఉన్న లోపాలను ప్రతి గ్రామంలో ప్రజలకు తెలియజేయాలి” అని మైలా రత్నకుమారి అన్నారు. - పెరిగిన ధరలు.. ప్రజల సమస్యలను గ్రామస్థాయిలో వివరించాలి “సామాన్య ప్రజలు నిత్యావసర వస్తువులు కొనుగోలు చేయాలంటే ఇబ్బందులు పడుతున్నారు. గ్రామాల్లో తాగునీరు సరిగా అందడం లేదు. మరోవైపు మద్యం విక్రయాలు విచ్చలవిడిగా సాగుతున్నాయి. గల్లీగల్లీలో మద్యం అమ్మకాలు, డోర్‌ డెలివరీ జరుగుతున్నాయి. ఇటీవల మద్యం సేవించిన అనంతరం జరిగిన ప్రమాదంలో ఇద్దరు ప్రాణాలు కోల్పోయిన ఘటన కూడా చోటుచేసుకుంది. ప్రజల జీవితాలను ప్రభావితం చేస్తున్న ఇలాంటి సమస్యలను ప్రతి గ్రామంలో ప్రజలకు వివరించాలి. మన దగ్గర ఉన్న సామాజిక మాధ్యమాలను సమర్థంగా ఉపయోగించుకుని స్థానికంగా జరుగుతున్న సమస్యలను ప్రజల ముందుకు తీసుకెళ్లాలి” అని మైలా రత్నకుమారి పిలుపునిచ్చారు. - ఇళ్ల స్థలాలు, పెన్షన్లు, సంక్షేమంపై ప్రజలకు సమాధానం చెప్పాలి “కొత్త పెన్షన్లు ఇస్తామని దరఖాస్తులు తీసుకున్నారు. కానీ పెన్షన్లు ఇచ్చారా? ఇళ్ల స్థలాలు ఇచ్చారా? ఇళ్లు నిర్మించి ఇచ్చారా? పేదలకు ఇంటి స్థలాలు, గృహ నిర్మాణం విషయంలో ఇచ్చిన హామీలను ఏ మేరకు అమలు చేశారో ప్రభుత్వం సమాధానం చెప్పాలి. పేదలకు అందాల్సిన సంక్షేమ ప్రయోజనాలు అందుతున్నాయా లేదా అన్నది ప్రతి గ్రామంలో చర్చకు తీసుకెళ్లాలి. కూటమి ప్రభుత్వం హామీలను అమలు చేయకుండా ప్రజలను మభ్యపెడుతున్న తీరును ప్రజలకు వివరించాలి” అని ఆమె అన్నారు. - ఆరోగ్యశ్రీ సేవల్లో అక్రమాలపై సమాధానం చెప్పాలి “ఆరోగ్యశ్రీ ఎంతోమంది ప్రాణాలను కాపాడిన పథకం. అలాంటి పథకం నిర్వహణలో ఇప్పుడు అక్రమాలు జరుగుతున్నాయనే ఆరోపణలు వస్తున్నాయి. జిల్లా కోఆర్డినేటర్‌ పోస్టుల నియామకాల్లో రూ.15 లక్షల నుంచి రూ.20 లక్షల వరకు బేరసారాలు జరుగుతున్నాయని ఆరోపణలు ఉన్నాయి. గుండె సంబంధిత వ్యాధులతో బాధపడుతున్న పేదలకు వైద్యం అందించే విషయంలో కూడా డబ్బులు వసూలు చేస్తున్నారనే ఆరోపణలు ఉన్నాయి. పేదలకు నాణ్యమైన వైద్యసేవలు అందాల్సిన ఆరోగ్యశ్రీలో ఇలాంటి పరిస్థితులు ఎందుకు వస్తున్నాయో ప్రభుత్వం సమాధానం చెప్పాలి. ఈ అంశాలను ప్రజల్లోకి తీసుకెళ్లాలి” అని మైలా రత్నకుమారి పేర్కొన్నారు. - ప్రలోభాలు, బెదిరింపులకు భయపడకుండా పోరాడాలి “స్థానిక సంస్థల ఎన్నికల్లో మన అభ్యర్థులను గెలిపించుకోవడానికి ప్రతి కార్యకర్త అండగా నిలవాలి. అభ్యర్థులను ప్రలోభాలకు గురిచేయడం, వారి కుటుంబ సభ్యులను బెదిరించడం, అవసరమైన సర్టిఫికెట్లు రాకుండా అడ్డుకోవడం, నామినేషన్లు ఉపసంహరించుకోవాలని ఒత్తిడి చేయడం వంటి కుట్రలకు పాల్పడే అవకాశం ఉంది. ఎన్ని కేసులు పెట్టినా, ఎన్ని ఇబ్బందులు సృష్టించినా మనం వెనక్కి తగ్గకూడదు. చంద్రబాబు నాయుడు రాజకీయంగా ఎలాంటి కుట్రలు, కుతంత్రాలకైనా పాల్పడవచ్చనే విషయాన్ని గుర్తుంచుకుని అప్రమత్తంగా ఉండాలి. ఉప్పాల రాము ఆధ్వర్యంలో అందరం కలిసికట్టుగా పోరాడితే కృత్తివెన్ను మండలంలో వైయ‌స్ఆర్‌సీపీ విజయకేతనం ఎగురవేయగలం” అని మైలా రత్నకుమారి స్పష్టం చేశారు. - స్థానిక ఎన్నికల్లో గెలుపే లక్ష్యంగా పనిచేయాలి “గత ఎన్నికల్లో ఎదురైన ఓటమి నుంచి మనం ఎన్నో పాఠాలు నేర్చుకున్నాం. వాటిని దృష్టిలో ఉంచుకుని పార్టీ శ్రేణులంతా సైనికుల్లా పనిచేయాలి. స్థానిక సంస్థల ఎన్నికల్లో మన అభ్యర్థులకు అండగా నిలిచి వారిని గెలిపించుకోవాలి. స్థానిక ఎన్నికల్లో పార్టీ బలోపేతం అయితేనే భవిష్యత్తులో ఉప్పాల రాము గారిని ఎమ్మెల్యేగా గెలిపించుకోవడంతో పాటు, వైయ‌స్‌ జగన్‌మోహన్‌రెడ్డి గారిని మళ్లీ ముఖ్యమంత్రిని చేసుకునే లక్ష్యాన్ని సాధించగలం. ప్రతి కార్యకర్త సమష్టిగా పనిచేసి పార్టీ విజయానికి కృషి చేయాలి. జై జగన్‌!” అని మైలా రత్నకుమారి పిలుపునిచ్చారు.
