బొబ్బిలి: పదవీకాలం పూర్తి చేసుకున్న సర్పంచ్లకు నిర్వహించిన ఆత్మీయ సన్మాన కార్యక్రమంలో ఉమ్మడి విజయనగరం జిల్లా పరిషత్ చైర్మన్, వైయస్ఆర్ కాంగ్రెస్ పార్టీ జిల్లా అధ్యక్షుడు మజ్జి శ్రీనివాసరావు (చిన్నశ్రీను) ప్రజల విశ్వాసమే నిజమైన పదవని పేర్కొన్నారు. మాజీ ఎమ్మెల్యే శంబంగి చిన్న అప్పల నాయుడు అధ్యక్షతన జరిగిన ఈ కార్యక్రమంలో సర్పంచ్ల సేవలను కొనియాడుతూ, గ్రామాభివృద్ధిలో వారి పాత్ర కీలకమని ఆయన అన్నారు. విపత్కర పరిస్థితుల్లో కూడా ప్రజలకు సేవ చేసిన సర్పంచ్లను అభినందిస్తూ, ప్రస్తుత పాలకుల వైఖరి వల్ల స్థానిక సంస్థలు ఇబ్బందులు ఎదుర్కొంటున్నాయని విమర్శించారు. ప్రజల నమ్మకాన్ని నిలబెట్టేలా ముందుకు సాగాలని, ఎన్నికలు వచ్చే వరకు ప్రజాసేవలో చురుకుగా ఉండాలని పిలుపునిచ్చారు. గతంలో వైయస్ జగన్ ప్రభుత్వం గ్రామాలకు ఇచ్చిన ప్రాధాన్యతను గుర్తు చేస్తూ, అదే విధానాలను మళ్లీ తీసుకురావడానికి అందరూ కలిసికట్టుగా కృషి చేయాలని కోరారు. ఈ కార్యక్రమంలో మాజీ ఎంపీ బెల్లాన చంద్రశేఖర్, నియోజకవర్గ పరిశీలకుడు తదితరులు పాల్గొన్నారు.
