విజయవాడ: వైయస్ఆర్ కాంగ్రెస్ పార్టీ నేత జోగి రమేష్ను మాజీ ఎమ్మెల్యే కేతిరెడ్డి పరామర్శించారు. ఈ సందర్భంగా ఆయన మాట్లాడుతూ, జోగి రమేష్పై నమోదు చేసిన కేసులు పూర్తిగా తప్పుడు కేసులేనని, రాజకీయ కక్ష సాధింపులో భాగంగానే ఆయన్ను జైలుకు పంపారని ఆరోపించారు. వైయస్ఆర్సీపీ నేతలు కేసులకు భయపడే రోజులు పోయాయని కేతిరెడ్డి స్పష్టం చేశారు. అధికార దుర్వినియోగంతో ఎంతమంది మీద ఎంతమంది కేసులు పెట్టినా, అంత ఉత్సాహంగా ప్రజల పక్షాన పోరాటం చేస్తామని ఆయన ధీమా వ్యక్తం చేశారు. అక్రమ కేసులతో ప్రతిపక్షాన్ని అణచివేయాలన్న ప్రయత్నాలు ఫలించవని హెచ్చరించారు. ఈ సందర్భంగా మాజీ ముఖ్యమంత్రి చంద్రబాబు నాయుడిపై ఉన్న కేసులను ఎందుకు తొలగిస్తున్నారన్న ప్రశ్నను కేతిరెడ్డి లేవనెత్తారు. కేసులు తొలగించడం ద్వారా సాక్షులను ప్రభావితం చేయడం కాదా అని ప్రశ్నించారు. ఒకవైపు ప్రతిపక్ష నేతలపై వరుస కేసులు, మరోవైపు అధికార పార్టీ నేతలపై కేసులు ఎత్తివేయడం ద్వంద్వ వైఖరికి నిదర్శనమని మండిపడ్డారు. తనపై భూ ఆక్రమణ ఆరోపణలు చేస్తున్న వారిపై కూడా కేతిరెడ్డి ఘాటుగా స్పందించారు. దమ్ముంటే ఆరోపణలకు ఆధారాలు చూపించాలని సవాల్ విసిరారు. నిరాధార ఆరోపణలతో వైయస్ఆర్సీపీ నేతల ప్రతిష్ఠను దిగజార్చే ప్రయత్నాలు సాగుతున్నాయని ఆయన ఆరోపించారు. ప్రజాస్వామ్యాన్ని కాపాడే పోరాటంలో వైయస్ఆర్ కాంగ్రెస్ పార్టీ వెనకడుగు వేయదని, అక్రమ కేసులు, రాజకీయ వేధింపులకు భయపడకుండా ప్రజల తరఫున పోరాటం కొనసాగిస్తామని కేతిరెడ్డి స్పష్టం చేశారు.
