హోదా కోసం వందసార్లైనా బల్లలు ఎక్కుతాం

ప్రత్యేకహోదాను కాదని ముఖ్యమంత్రి ప్యాకేజీని స్వాగతించిన ఘటన మీద యావత్ రాష్ట్ర ప్రజానీక ఆందోళన చెందిందని, హోదా రాకపోతే తమ పరిస్థితి ఏంటని ప్రజలు ఆందోళనకు గురయ్యారని తెలిపారు. ప్రత్యేకహోదాపై చర్చకు తాము సిద్ధపడితే ప్రభుత్వం పారిపోవడం వల్లే సభను స్తంభింపజేసేందుకు బల్లలు ఎక్కామనివారు స్పష్టం చేశారు. హోదా కోసం ఏ త్యాగానికైనా తాము సిద్ధమని అన్నారు.   తమ హక్కులకు భంగం వాటిల్లితే ప్రివిలేజ్ కమిటీలో చర్చించి చర్యలు తీసుకోవాల్సిన పరిస్థితుల్లో..తమనే దోషులుగా ప్రభుత్వం చిత్రీకరించడం బాధాకరమన్నారు. ప్రత్యేకహోదా వస్తేనే రాష్ట్రం అభివృద్ధి చెందుతుంది, ఉపాధి లభిస్తుందని ప్రజలు భావిస్తున్నదున వారి గొంతుక వినిపించాల్సిన బాధ్యత ప్రధాన ప్రతిపక్షంగా తమపై ఉందని ఎమ్మెల్యేలు అన్నారు. అవసరమైతే ఎంపీలతో రిజైన్ చేయించి ఎన్నికలకు వెళ్తామని తమ నాయకుడు వైయస్ జగన్ ఇప్పటికే చెప్పారని గుర్తు చేశారు. ప్రత్యేకహోదా విషయంలో పోరాడేందుకు  మా నాయకుడు, పార్టీ సభ్యులమంతా సిద్దంగా ఉన్నామని, తమకు ప్రజలు అండగా ఉన్నారని తెలియజేశారు. ప్రజల హక్కును కాదనే ధైర్యం బాబుకు ఎవరిచ్చారని, ఏకపక్షంగా ప్యాకేజీని ఎలా స్వాగతిస్తారని ప్రశ్నించారు. ఓటుకు నోటు కేసులో రాజీపడినప్పుడే బాబు దిగజారుడుతనం బయటపడిందన్నారు. కనీసం ఇప్పటికైనా నైతికను బయటపెట్టుకోవాలని, ప్రత్యేకహోదా కోసం కేంద్రంతో మాట్లాడేందుకు ముందుకు రావాలని ప్రభుత్వానికి హితవు పలికారు.