అనకాపల్లి: యలమంచిలి నియోజకవర్గాన్ని నూతనంగా ప్రతిపాదిస్తున్న నక్కపల్లి రెవెన్యూ డివిజన్‌లో కలపకుండా, ప్రస్తుతం ఉన్నట్లుగా అనకాపల్లి రెవెన్యూ డివిజన్‌లోనే కొనసాగించాలని వైయ‌స్ఆర్‌ కాంగ్రెస్ పార్టీ నాయకులు డిమాండ్ చేశారు. మాజీ ప్రభుత్వ విప్, యలమంచిలి నియోజకవర్గ సమన్వయకర్త కరణం ధర్మ శ్రీ , వైయ‌స్ఆర్‌సీపీ అనకాపల్లి పార్లమెంట్ నియోజకవర్గ సమన్వయకర్త, అరకు పార్లమెంట్ పరిశీలకులు బొడ్డేడ ప్రసాద్ శుక్ర‌వారం మీడియాతో మాట్లాడారు. ఈ సంద‌ర్భంగా వారు మాట్లాడుతూ…“యలమంచిలి నియోజకవర్గ ప్రజలకు అనకాపల్లి రెవెన్యూ డివిజన్ దగ్గరగా, సులభంగా అందుబాటులో ఉంటుంది. ఏ వర్గానికైనా సేవలు పొందేందుకు అనువైనది అనకాపల్లే. గతంలో ఎలా అయితే ఈ ప్రాంతాన్ని అనకాపల్లి డివిజన్‌లో కొనసాగించారో, ఇప్పటికీ అదే విధంగా కొనసాగించాలని మా డిమాండ్,” అని పేర్కొన్నారు. అలాగే, నక్కపల్లి రెవెన్యూ డివిజన్‌కు యలమంచిలి నియోజకవర్గాన్ని చేర్చడం ప్రజలకు అసౌకర్యం కలిగిస్తుందని చెప్పారు. ప్రభుత్వాన్ని ఈ నిర్ణయంపై మళ్లీ ఆలోచించాలని కోరుతూ ప్రజల అభిప్రాయాన్నే తమ డిమాండ్‌కు బలంగా పేర్కొన్నారు. “ప్రజలకు అనువైనది – అభివృద్ధికి దోహదపడేది – అందరికీ చేరువలో ఉన్నది అనకాపల్లి రెవెన్యూ డివిజన్ మాత్రమే. అందుకే యలమంచిలి నియోజకవర్గాన్ని అనకాపల్లిలోనే కొనసాగించాలి,” అని వారు పునరుద్ఘాటించారు.
