పుంగనూరు: పక్కా స్కెచ్ తోనే చంద్రబాబు దాడులకు ఉసిగొల్పాడ‌ని పుంగనూరు మీడియాతో రాష్ట్ర విద్యుత్, అటవీ, మైనింగ్ శాఖల మంత్రి పెద్దిరెడ్డి రామచంద్రారెడ్డి మండిప‌డ్డారు. పుంగనూరులో మంత్రి మీడియాతో మాట్లాడారు. – అంగళ్లు, పుంగనూరులో చంద్రబాబు ఒక పద్ధతి ప్రకారం, పక్కా స్కెచ్ తో తన పార్టీ కార్యకర్తలు, నాయకులతో దాడులు చేయించాడు. అంతా వారు ముందే ప్లాన్ చేసుకున్నట్లుగానే ఈ ఘటనకు కారణమయ్యాడు. – నిన్న రాత్రి 10.30 గంటలకు టీడీపీ నేతలు ఇక్కడ మీడియాకు పుంగనూరు పట్టణానికి చంద్రబాబు రావడం లేదని, బైపాస్‌ మీదుగా వెళ్తున్నామని సమాచారం అందించారు. – పోలీసులకు కూడా పుంగనూరుకు రావడంలేదనే చెప్పారు. – వైఎస్‌ఆర్‌సీపీ కార్యకర్తలు చంద్రబాబు పాలనలో తమకు జరిగిన అన్యాయం పట్ల నిరసన కార్యక్రమం పెట్టుకుని.. ఆయన కోసం ఉదయం 10.30 వరకు ఎదురుచూశారు. కానీ, ఆయన ఇటువైపు రావడంలేదని తెలిసి వారంతా వెళ్లిపోయారు. – ఆ తర్వాత చంద్రబాబు పనిగట్టుకుని .. కావాలని రెచ్చగొట్టడానికి పుంగనూరుకు వచ్చాడు. శాంతిభద్రతల సమస్యలు ఉత్పన్నం కాకూడదని పోలీసులు చంద్రబాబు వాహనాన్ని అడ్డుకున్నారు. – కానీ, ఈరోజు కావాలనే పనిగట్టుకుని ఆలస్యంగా పుంగనూరు వైపు వచ్చి ప్రజలను రెచ్చగొట్టారు. పోలీసులు కూడా సమాచారం లేకుండా ఎలా వస్తారని అడిగినందుకు వాళ్లను రక్తాలు కారేటట్టు కొట్టారు. – పోలీసుల్ని కర్రలతో, రాడ్లతో కొట్టారు. రాళ్లు విసిరి పోలీసుల తలలు పగులకొట్టారు. వారి జీపులు, వాహనాలను కూడా టీడీపీ వారు దాడులు చేసి ధ్వంసం చేసి తగులబెట్టారు. – పుంగనూరు, అంగళ్లులో ఏనాడూ ఇలాంటి ఘటనలు జరగలేదు. కిరాయి గుండాల్ని తెచ్చుకుని.. కార్లలో గన్‌లను పెట్టుకుని వచ్చారు. ఆ గన్‌లున్న కార్లను కూడా పోలీసులు స్వాధీనం చేసుకున్నారు. – ఇలా జరుగుతుందని తెలిసుంటే.. పుంగనూరు, అంగళ్లు ప్రజలు అప్రమత్తంగా ఉండేవారు. కానీ, మేం పుంగనూరుకు రావడంలేదని చెప్పి, ప్రజలను తప్పుదారిపట్టించి.. మరలా ప్లాన్ ప్రకారం చంద్రబాబు ఇటు వచ్చారు. – పుంగనూరు పుడింగా.. నీ తాత జాగీరా..? అని నన్ను ఏ మాటంటే ఆ మాట అన్నాడు. అయినా.. ఆయన మాటలకు నేనేమీ స్పందించను. చంద్రబాబు విజ్ఞతకే వదిలేస్తున్నాను. – చంద్రబాబు పెద్ద శాంతికాముకుడని చెప్పుకోవడం కాదు...మరి, ఇలాంటి ఘటనల్ని రెచ్చగొట్టి చేయించిన వారిని ఏమనాలి..? ఈరోజు ఆయన ప్రదర్శించిన రౌడీయిజంపై ఎలాంటి చర్యలు తీసుకోవాలి. – చంద్రబాబు దిగజారి వీధిరౌడీలా మాట్లాడటం అలవాటే. అతని ప్రవర్తనను ఈరోజు ప్రత్యక్షంగా ప్రజలు చూశారు. – ఆయనకు మతిస్థిమితం లేదు. విపరీతమైన ఫ్రస్టేషన్‌తో ఊగిపోతూ శాంతిభద్రతల సమస్యల్ని సృష్టిస్తున్నాడు. ఈ వయసులో చంద్రబాబు ఇలాంటి దుర్మార్గమైన పనులు చేయిస్తాడని ఎవరూ అనుకోరు. – సీనియర్‌ రాజకీయవేత్తనని చెప్పుకుంటూ నోటికి పలకరాని భాష మాట్లాడుతూ మమ్మల్ని బూతులు తిట్టాల్సిన పనేంటి..? –చంద్రబాబు ఇంత హింసాత్మక ఘటనలకు ఉసిగొల్పుతాడని అనుకుంటే రాష్ట్రవ్యాప్తంగా చంద్రబాబును తిరగనిచ్చేవారు కాదు. – ఈరోజు ఘటనలను పూర్తిగా చంద్రబాబునే కారకుడు కనుక.. ఈ దాడుల్లో కేసుల్లో ప్రధాన ముద్దాయి చంద్రబాబే.
