వైయస్ఆర్ జిల్లా: రాష్ట్ర రాజధానిగా మాజీ ముఖ్యమంత్రి వైయస్ జగన్ మోహన్ రెడ్డి గారు ప్రతిపాదించిన మావిగన్నే భవిష్యత్కు మార్గమని కడప ఎంపీ వైయస్ అవినాష్రెడ్డి పేర్కొన్నారు. ఏపీ పునర్విభజన చట్టంలో చేసిన చిన్న మార్పులను పెద్ద విషయంగా చూపిస్తూ కూటమి నేతలు సంబరాలు చేసుకోవడం ఆశ్చర్యకరమని ఎంపీ విమర్శించారు. 2013 పునర్విభజన చట్టంలోని సెక్షన్ 5(2) ప్రకారం 10 ఏళ్ల పాటు హైదరాబాద్ ఉమ్మడి రాజధానిగా ఉండి, అనంతరం ప్రత్యేక రాజధాని ఏర్పాటు చేయాలని పేర్కొన్నారని గుర్తు చేశారు. తాజాగా చట్టంలో “స్టేట్ క్యాపిటల్ @ అమరావతి” అని చేర్చిన మార్పుపైనే చంద్రబాబు, లోకేష్ సంబరాలు చేసుకోవడం అర్థరహితమని అన్నారు. అదే చట్టంలో ఉన్న కీలక అంశాలపై మాత్రం కూటమి నేతలు మౌనం పాటిస్తున్నారని ఆయన విమర్శించారు. కడపలో ఉక్కు కర్మాగారం, ఉత్తరాంధ్ర–రాయలసీమ వెనుకబడిన ప్రాంతాల అభివృద్ధి, ప్రత్యేక ప్రతిపత్తి వంటి హామీల గురించి ఎప్పుడైనా ప్రశ్నించారా అని నిలదీశారు. అమరావతిని రాజధానిగా ప్రకటించడం వల్ల ప్రజలకు పెద్దగా లాభం ఏమీ కలగలేదని, నాలుగు గ్రామాల పరిధిలో లక్ష ఎకరాల భూసేకరణకు ప్రయత్నించడం సమంజసం కాదన్నారు. ఇప్పటికే 50 వేల ఎకరాలు సేకరించగా, లక్ష ఎకరాల అభివృద్ధికి సుమారు రూ.2 లక్షల కోట్లు అవసరమవుతాయని, ఇది సాధ్యమయ్యే అంశమా అని ప్రశ్నించారు. రాష్ట్రంలోని 175 నియోజకవర్గాల ప్రజలపై భారీ అప్పులు మోపి ఒకే ప్రాంత అభివృద్ధి చేయడం సరికాదని అభిప్రాయపడ్డారు. ఈ నేపథ్యంలో వైయస్ఆర్సీపీ ప్రతిపాదిస్తున్న “మావిగన్” మోడల్నే రాష్ట్ర భవిష్యత్తుకు అనుకూలమని అవినాష్ రెడ్డి వివరించారు. మచిలీపట్నం పోర్టు, గన్నవరం అంతర్జాతీయ విమానాశ్రయం, విజయవాడ–గుంటూరు మధ్య పెరుగుతున్న అభివృద్ధి, జాతీయ రహదారులతో అనుసంధానం—all కలిపి ఒక క్లస్టర్గా అభివృద్ధి చేస్తే రాష్ట్రానికి పెద్ద ప్రయోజనం ఉంటుందని తెలిపారు. దీనికి “మావిగన్” అనే పేరే కాకుండా ఏ పేరైనా పెట్టుకోవచ్చని, కానీ ఈ మోడల్తో తక్కువ ఖర్చులో సమర్థవంతమైన రాజధాని నిర్మాణం సాధ్యమని చెప్పారు. లక్షల కోట్ల అవసరం లేకుండా కేవలం రూ.20 వేల కోట్లతోనే, అంటే సుమారు 10 శాతం నిధులతో అద్భుతమైన రాజధాని నిర్మించవచ్చని, అలాగే భారీ ఎత్తున పెట్టుబడులను ఆకర్షించే అవకాశం ఉందని ఎంపీ అవినాష్ రెడ్డి స్పష్టం చేశారు.
