తూర్పుగోదావరి జిల్లా: దేవరపల్లి మరోసారి రాష్ట్ర రాజకీయాల దృష్టిని ఆకర్షించింది. పొగాకు రైతుల సమస్యలపై గళం వినిపించేందుకు మాజీ ముఖ్యమంత్రి, వైయస్ఆర్సీపీ అధ్యక్షుడు వైయస్ జగన్మోహన్రెడ్డి చేపట్టిన దేవరపల్లి పర్యటనకు అపూర్వ ప్రజా స్పందన లభించింది. పోలీసులు పలు ఆంక్షలు విధించినప్పటికీ వేలాదిగా రైతులు, మహిళలు, యువత, పార్టీ నాయకులు, కార్యకర్తలు స్వచ్ఛందంగా తరలివచ్చి తమ అభిమానాన్ని చాటుకోవడం ప్రత్యేక ఆకర్షణగా నిలిచింది. ఒక నాయకుడి బలం అధికారంలో ఉండటమో, ప్రభుత్వ యంత్రాంగాన్ని వినియోగించుకోవడమో కాదని, ప్రజల హృదయాల్లో సంపాదించుకున్న స్థానం అని మరోసారి ఈ పర్యటన నిరూపించిందని రాజకీయ పరిశీలకులు అభిప్రాయపడుతున్నారు. రైతు సమస్యలపై పోరాటానికి దేవరపల్లి వేదిక టోబాకో బోర్డు పరిధిలోని పొగాకు రైతులు గత రెండేళ్లుగా గిట్టుబాటు ధరలు లేక తీవ్ర ఇబ్బందులు ఎదుర్కొంటున్న నేపథ్యంలో, వారి కష్టాలను స్వయంగా తెలుసుకుని ప్రభుత్వ దృష్టికి తీసుకెళ్లాలనే ఉద్దేశంతో వైయస్ జగన్ దేవరపల్లి పర్యటన చేపట్టారు. రైతులను ప్రత్యక్షంగా కలుసుకుని వారి సమస్యలను విన్న ఆయన, రైతులకు న్యాయం జరిగే వరకు అండగా నిలుస్తామని భరోసా ఇచ్చారు. పొగాకు యార్డును పరిశీలించి, రైతుల నుంచి నేరుగా వివరాలు తెలుసుకోవడం ద్వారా సమస్యలను ప్రభుత్వ దృష్టికి తీసుకెళ్లాలనే సంకల్పాన్ని ఆయన మరోసారి చాటిచెప్పారు. ఆంక్షలు పెరిగినా... జనస్పందన తగ్గలేదు వైయస్ జగన్ పర్యటన సందర్భంగా పోలీసులు భారీగా బారికేడ్లు ఏర్పాటు చేయడం, రాకపోకలపై నియంత్రణలు విధించడం, కట్టుదిట్టమైన భద్రతా ఏర్పాట్లు చేయడం వంటి చర్యలు చేపట్టారు. అయినప్పటికీ ప్రజల ఉత్సాహం ఏమాత్రం తగ్గలేదు. దేవరపల్లి వైపు వెళ్లే ప్రతి మార్గంలో వేలాది మంది జనం బారులు తీరి నిలబడగా, రోడ్లన్నీ జనసంద్రంగా మారాయి. రైతులు, మహిళలు, యువత, వృద్ధులు సైతం గంటల తరబడి వేచి ఉండి వైయస్ జగన్కు స్వాగతం పలికారు. ఆంక్షలు ఎంత కఠినంగా ఉన్నా ప్రజల అభిమానాన్ని అడ్డుకోలేమనే విషయాన్ని ఈ దృశ్యాలు మరోసారి స్పష్టం చేశాయి. ప్రత్యేక ఆకర్షణగా నిలిచిన అభిమాన ప్రదర్శనలు పర్యటనలో పలువురు అభిమానులు ప్రదర్శించిన ఫ్లెక్సీలు, పోస్టర్లు ప్రత్యేక ఆకర్షణగా నిలిచాయి. ముఖ్యంగా ఓ మహిళ చేతిలో కనిపించిన "ఆంధ్ర రాష్ట్రానికి ఒక్కడే రారాజు" అనే సందేశంతో కూడిన వైయస్ జగన్ చిత్రపటం అందరి దృష్టిని ఆకర్షించింది. ఆ ఫొటోతో మహిళలు, కార్యకర్తలు సెల్ఫీలు దిగేందుకు పోటీ పడటం అక్కడి ఉత్సాహభరిత వాతావరణానికి అద్దం పట్టింది. అదే సమయంలో "రాసిపెట్టుకోండి... 2029లో జగనే సీఎం", షవైయస్ జగన్ మా దేవుడు", "జననేత జగన్కు జై" అంటూ కార్యకర్తలు నినాదాలు చేస్తూ పర్యటనకు మరింత ఊపు తీసుకొచ్చారు. దేవరపల్లి వీధులన్నీ నినాదాలతో మారుమోగాయి. ప్రజలతో అనుబంధమే జగన్ బలం గత రెండేళ్లుగా వైయస్ జగన్ పర్యటనల సందర్భంగా ప్రభుత్వం పలు ఆంక్షలు విధిస్తోందని, నాయకులు, కార్యకర్తలను అడ్డుకునే ప్రయత్నాలు జరుగుతున్నాయని వైయస్ఆర్సీపీ నేతలు పేర్కొంటున్నారు. అయితే ప్రతి పర్యటనలోనూ ప్రజల స్పందన ఏమాత్రం తగ్గకపోవడం రాజకీయంగా చర్చనీయాంశంగా మారుతోంది. ప్రజల కష్టాల్లో భాగస్వామి కావడం, సమస్యలను ప్రత్యక్షంగా తెలుసుకోవడం, అధికారంలో లేకపోయినా ప్రజల మధ్యే ఉండడం వల్లే వైఎస్ జగన్పై ప్రజల్లో విశ్వాసం మరింత బలపడుతోందని రాజకీయ విశ్లేషకులు అభిప్రాయపడుతున్నారు. దేవరపల్లి ఇచ్చిన రాజకీయ సందేశం దేవరపల్లి పర్యటన కేవలం పొగాకు రైతుల సమస్యలకే పరిమితం కాలేదు. ప్రజలతో వైయస్ జగన్కు ఉన్న అనుబంధాన్ని, ఆయన పిలుపునకు ప్రజలు స్వచ్ఛందంగా స్పందిస్తున్న తీరు మరోసారి స్పష్టమైంది. బారికేడ్లు, ఆంక్షలు, నియంత్రణలు ఉన్నప్పటికీ ప్రజలు పెద్ద ఎత్తున తరలివచ్చిన దృశ్యాలు రాష్ట్రవ్యాప్తంగా చర్చకు దారితీశాయి. రైతుల సమస్యలపై పోరాడే నాయకుడిగా, ప్రజల మధ్య నడిచే నాయకుడిగా వైయస్ జగన్ తన రాజకీయ ప్రయాణాన్ని కొనసాగిస్తున్నారనే సందేశాన్ని దేవరపల్లి పర్యటన మరోసారి బలంగా వినిపించింది. తూర్పుగోదావరిలో కనిపించిన ఈ జనస్పందన వైయస్ఆర్సీపీకి గ్రామీణ స్థాయిలో ప్రజల మద్దతు ఇప్పటికీ బలంగా ఉందనే సంకేతాలను ఇచ్చిందని రాజకీయ వర్గాలు విశ్లేషిస్తున్నాయి.
