దుబాయ్ ఖైదీల కుటుంబాలకు విజయమ్మ భరోసా

హైదరాబాద్‌ : దుబాయ్‌లో జైళ్ళలో గత ఎనిమిదేళ్ళుగా మగ్గిపోతున్న మన రాష్ట్రానికి చెందిన ఖైదీలను విడిపించేందుకు ప్రయత్నం చేస్తానని వైయస్‌ఆర్ కాంగ్రె‌స్‌ పార్టీ గౌరవ అధ్యక్షురాలు శ్రీమతి వైయస్ విజయమ్మ వారి కుటుంబ సభ్యులకు హామీ ఇచ్చారు. కరీంనగ‌ర్ జిల్లా పెద్దూరు, చందుర్తి, కోనరావుపేట, నిజామాబా‌ద్ జిల్లా మానాలకు చెందిన ఆరుగురు బతుకుదెరువు కోసం దుబాయ్ వెళ్ళారు. అయితే, ఊహించని పరిస్థితుల్లో ‌2005లో వారంతా ఒక హత్య కేసులో ఇరుక్కుని దుబాయ్ జైలు‌ పాలయ్యారు. దుబాయ్ జై‌లులో మగ్గిపోతున్న తమ వారిని విడుదల చేయించాలంటూ వారి కుటుంబ సభ్యులు పలువురు ఎంపిలు, ఎమ్మెల్యేల చుట్టూ తిరిగినా ఫలితం లేకపోయింది. ఈ నేపథ్యంలో ఖైదీల భార్యలు, ఇతర కుటుంబ సభ్యులు మంగళవారంనాడు శ్రీమతి విజయమ్మను ఆమె నివాసంలో కలిశారు.