కళ్యాణదుర్గం: తెలుగుదేశం నాయకుడి వేధింపుల కారణంగా ఆత్మహత్యాయత్నానికి పాల్పడిన వడ్డే కాలనీకి చెందిన చంద్రకళ కుటుంబానికి సహాయం చేస్తానని ఇచ్చిన మాటను మాజీ పార్లమెంట్ సభ్యులు, కళ్యాణదుర్గం సమన్వయకర్త తలారి రంగయ్య నిలబెట్టుకున్నారు. వైయ‌స్ఆర్‌సీపీ ఎన్నారై విభాగం నాయకుల సహకారంతో సేకరించిన రూ.2,20,000 న‌గ‌దును ఈరోజు బాధితురాలి కుటుంబ సభ్యులకు అందజేశారు. ఘటన జరిగిన రోజే కుటుంబాన్ని పరామర్శించిన రంగయ్య, బాధితురాలికి పూర్తి స్థాయి అండగా ఉంటానని, వైద్య సహాయం నుంచి కుటుంబ భరోసా వరకు అన్ని బాధ్యతలనూ తీసుకుంటానని హామీ ఇచ్చారు. ఆ హామీ ప్రకారం పార్టీ అధినేత వైయ‌స్ జగన్ మోహన్ రెడ్డికి విషయం వివరించి, ఎన్నారైల సహకారంతో అత్యవసర ఆర్థిక సాయాన్ని అందించారు. ఈ సందర్భంగా తలారి రంగయ్య మాట్లాడుతూ, “కేవలం హామీలు ఇవ్వడం కాదు… బాధితుల కష్టసమయంలో అండగా నిలబడటం మన బాధ్యత. వైయ‌స్ జగన్ గారి ఆదేశాల మేరకు బాధితురాలికి వెంటనే ఆర్థిక సహాయం అందించాం. ఆమె పూర్తిగా కోలుకునే వరకు, న్యాయం జరిగే వరకు మేము అండగా ఉంటాం,” అని తెలిపారు. రంగయ్య హామీని నిలబెట్టుకోవడంపై బాధితురాలి కుటుంబ సభ్యులు, స్థానికులు హర్షం వ్యక్తం చేశారు. అలాగే, సహకరించిన ప్రతి ఒక్కరికీ రంగయ్య ప్రత్యేక కృతజ్ఞతలు తెలిపారు. “పార్టీ అధినేత వైయ‌స్ జగన్ మోహన్ రెడ్డికి, NRI గ్లోబ‌ల్‌ కో-ఆర్డినేటర్ ఆలూరు సాంబశివారెడ్డి, కే.నాగేశ్వర్ రెడ్డి, మా పార్టీ ఎన్నారై సోదరులకు హృదయపూర్వక ధన్యవాదాలు. సామాజిక బాధ్యతతో ముందుకు వస్తున్న ఎన్నారై దాతల సహాయం బాధితురాలికి పెద్ద ధైర్యాన్ని ఇస్తోంది,” అని రంగయ్య పేర్కొన్నారు. కార్యక్రమంలో నియోజకవర్గ పరిశీలకులు మహేంద్ర రెడ్డి, ఎన్నారైలు జస్వంత్ రెడ్డి, దీపక్ రెడ్డి, కౌన్సిలర్లు, మండల కన్వీనర్లు, ఎంపీపీలు, జెడ్పిటిసిలు సహా పలువురు పార్టీ శ్రేణులు పాల్గొన్నారు.
