<strong>అధికారం ఉందన్న అహంకారంతో ..</strong><strong>టీడీపీ ఇష్టారాజ్యంగా వ్యవహరిస్తోంది</strong><strong>ఇంత కక్షపూరిత ప్రభుత్వం దేశంలో ఎక్కడా లేదు</strong><strong>రోజాను కావాలనే సభకు రానీయకుండా..</strong><strong>చేసేందుకు కుట్ర చేస్తున్నారు</strong><br/>హైదరాబాద్ః ప్రతిపక్షం లేకుండా అధికార టీడీపీ సభను నిర్వహించుకోవడం సిగ్గుచేటని వైఎస్సార్సీపీ ఎమ్మెల్యే రాచమల్లు శివప్రసాద్ రెడ్డి మండిపడ్డారు. ప్ర‌జాస్వామ్యానికి పూర్తిగా పాతరేస్తూ, అధికారం ఉందన్న అహకారంతో టీడీపీ సభ్యులు ఇష్టమొచ్చిన‌ట్లు వ్య‌వ‌హరిస్తున్నార‌ని రాచమల్లు ఫైరయ్యారు. ప్ర‌జ‌లు ఐదేళ్లు అధికారం క‌ట్ట‌బెట్టార‌ు. ఈ ఐదేళ్లలో ఇష్టానుసారం ప్ర‌వ‌ర్తిస్తాం. తాము చేసిందే శాసనం, అది జ‌రిగి తీరాల్సిందేన‌న్న నిరంకుశ వైఖ‌రితో అధికార ప్రభుత్వం వ్యవహరిస్తోందని రాచమల్లు ఆగ్రహం వ్యక్తం చేశారు. లోటస్ పాండ్ లో వైఎస్సార్ సీపీ శాసనసభాపక్షం సమావేశానికి ముందు ఆయన మీడియాతో మాట్లాడారు. <br/>ప్ర‌జ‌ల స‌మ‌స్య‌ల ప‌రిష్కారంగానీ, న్యాయ‌స్థానాల ప‌ట్ల గౌర‌వం గానీ, ప్ర‌తిప‌క్ష స‌భ్యుల స‌త్‌విమ‌ర్శ‌ను స‌హృద‌యంతో స్వీక‌రించే త‌త్వంగానీ ప్రభుత్వానికి ఏమాత్రం లేవని శివప్రసాద్ రెడ్డి విమ‌ర్శించారు. ఏడాదిపాటి సస్పెండ్ చేయడం అన్యాయమని ఓ ఎమ్మెల్యే...చట్ట‌బ‌ద్ధంగా న్యాయ‌స్థానాన్ని ఆశ్ర‌యిస్తే, న్యాయ‌స్థానం ఆ స‌స్పెన్ష‌న్‌ను ర‌ద్దు చేస్తూ తీర్పునిచ్చింద‌న్నారు. ఆ తీర్పును తీసుకొని రోజా అసెంబ్లీకి వస్తే మార్ష‌ల్‌తో అసెంబ్లీలోకి రానివ్వ‌కుండా అడ్డుకోవ‌డం చ‌ట్ట‌ాల‌ను అవ‌మానించడమేనని రాచమల్లు ప్రభుత్వంపై నిప్పులు చెరిగారు. <br/>ఓ ప‌థ‌కం ప్ర‌కారమే ప్రివిలెజ్ క‌మిటీలో వైఎస్సార్సీపీ ఎమ్మెల్యేలు కొడాలి నాని, ఆర్కే రోజాల పేర్లు చేర్చి , వారిపై చ‌ర్యలు తీసుకునేందుకు రంగం సిద్ధం చేశారని శివప్రసాద్ రెడ్డి ప్రభుత్వ తీరును ఎండగట్టారు. దానిలో భాగంగానే అసెంబ్లీలో స్వ‌ల్ప‌కాలిక వ్య‌వ‌ధిలో చ‌ర్చ నిర్వ‌హించి, ఓ తీర్మానం చేసి కోర్టుకు పంపాలని చూస్తున్నారని.. రోజా తిరిగి శాస‌న‌స‌భ‌కు రాకుండా చేసేందుకు కుట్ర‌లు ప‌న్నుతున్నార‌ని శివప్రసాద్ రెడ్డి తెలిపారు. ఓ మహిళా శాస‌న‌స‌భ్యురాలు సభకు రానివ్వ‌కుండా ఇంత కక్షపూరితంగా వ్యవహరిస్తున్న ప్రభుత్వం...భార‌త‌దేశంలోనే లేదన్నారు. రాష్ట్రంలోని మ‌హిళ‌లు ఇప్ప‌టికే టీడీపీ తీరు ప‌ట్ల తీవ్ర ఆగ్ర‌హంతో ఉన్నార‌ని, టీడీపీ సర్కారుకు నూకలు చెల్లాయని శివప్రసాద్ రెడ్డి అన్నారు.
