రాష్ట్రంలో ప్రభుత్వం ఉందా?: రఘురామిరెడ్డి

రాజుపాళెం: ప్రస్తుత పరిస్థితులను చూస్తుంటే రాష్ట్రంలో అసలు ప్రభుత్వం ఉందా అనే అనుమానం కలుగుతోందని వైయస్ఆర్‌ సీపీ రాష్ట్ర క్రమశిక్షణ కమిటీ సభ్యుడు, మాజీ ఎమ్మెల్యే రఘురామిరెడ్డి పేర్కొన్నారు. మండల పరిధిలోని రాజోలి ఆనకట్టను ఆయన పరిశీలించారు. ఈ సందర్భంగా విలేకరులతో మాట్లాడుతూ రైతుల సమస్యలు ప్రభుత్వానికి పట్టలేదని విమర్శించారు. విద్యుత్, సాగునీరు, రైతుల పరిస్థితిపై అసెంబ్లీలో చర్చించకపోవడం దారుణమన్నారు. ప్రధాన ప్రతిపక్షమైన టీడీపీ సమస్యలను సభ దృష్టికి తీసుకురావాల్సిందిపోయి కాంగ్రెస్‌తో లోపాయికారి ఒప్పందం చేసుకుని అసెంబ్లీ సమావేశాలను జరగనీయకుండా అడ్డుకుందన్నారు. వర్షం పడక జిల్లాలో తీవ్ర కరువు పరిస్థితులు నెలకొన్నాయన్నారు. కేసీ కెనాల్‌కు నీళ్లు వస్తాయని కొందరు రైతులు వరి పంటను సాగు చేశారన్నారు. ప్రస్తుతం ఆ పంట నీళ్లు లేక ఎండుతోందని ఆవేదన వ్యక్తం చేశారు. ఆనకట్ట నుంచి వచ్చే నీరు కుందూ నదిలోకి వెళ్లకుండా కేసీ ప్రధాన, చాపాడు కాలువలకు వదిలేందుకు అధికారులు చర్యలు తీసుకోవాలని కోరారు. ప్రభుత్వం సక్రమంగా వ్యవసాయానికి విద్యుత్ సరఫరా చేసి పంటలను కాపాడాలని డిమాండ్ చేశారు. ఈ కార్యక్రమంలో వైయస్ఆర్‌ సీపీ రైతు విభాగం జిల్లా కన్వీనర్ సంబటూరు ప్రసాద్‌రెడ్డి, చల్లబసాయపల్లె సంగన కిషోర్‌రెడ్డి, పెద్దచీపాడు బాలనరసింహారెడ్డి, చాపాడు ఈశ్వరరెడ్డి, లక్ష్మిపేట మాజీ సర్పంచ్ నారాయణరెడ్డి, బాలమునిరెడ్డి, మొరాయిపల్లె, మల్లెవేముల రైతులు పాల్గొన్నారు.