నెల్లూరు జిల్లాలో పునర్విభజన చిచ్చు రేపిన చంద్రబాబు

నెల్లూరు: నెల్లూరు జిల్లా వెంకటగిరి నియోజకవర్గంలో నుంచి మూడు మండలాలను తిరుపతి జిల్లాలో కలపాలన్న నిర్ణయంతో చంద్రబాబు నెల్లూరు జిల్లాలో చిచ్చు రేపారని మాజీమంత్రి కాకాణి గోవర్ధన్ రెడ్డి ఆగ్రహం వ్యక్తం చేశారు. నెల్లూరు వైయ‌స్ఆర్‌సీపీ కార్యాలయంలో మీడియాతో మాట్లాడుతూ... ఎన్నిక ముందు గూడురును నెల్లూరులో కలుపుతామన్న చంద్రబాబు ఇచ్చిన మాట తప్పడంతో పాటు, కొత్తగా నెల్లూరు నుంచి 3 మండలాలను తిరుపతిలో చేరుస్తూ డ్రాఫ్ట్ విడుదల చేయడాన్ని తీవ్రంగా ఆక్షేపించారు. ప్రభుత్వ నిర్ణయంతో జలాశయాల నీటి విడుదలలో కొత్త సమస్యలు తలెత్తడం ఖాయమని... ఇది  ప్రజలు, రైతుల్లో తీవ్ర ఆందోళనకు కారణమైందని స్పష్టం చేశారు. 2019లో ఎన్నికల మేనిఫెస్టోలో ప్రతి పార్లమెంటు నియోజకవర్గాన్ని జిల్లాగా చేస్తామన్న హామీ మేరకు...  వైయస్.జగన్ ప్రభుత్వంలో బౌగౌళిక పరిస్థితులు, ప్రజల అభ్యంతరాల మేరకే 26 కొత్త జిల్లాలను ఏర్పాటు చేశామన్నారు. కానీ చంద్రబాబు ప్రభుత్వం తీసుకున్న నిర్ణయం జిల్లాల మధ్య నీటి తగాదాలకు కారణమైందని మండిపడ్డారు. నెల్లూరు జిల్లా నుంచి 3 మండలలాను తిరుపతిలో కలపాలన్న నిర్ణయాన్ని తక్షణమే వెనక్కి తీసుకోవాలని డిమాండ్ చేశారు. ఈ సందర్భంగా ఇంకా ఏమన్నారంటే... 

● పునర్విభజన చిచ్చు రేపిన కూటమి ప్రభుత్వం..

కూటమి ప్రభుత్వం నెల్లూరు జిల్లాలో పునర్విభజన చిచ్చు రేపింది. పునర్విభజన నిరసన జ్వాలలు, మంటలు చెలరేగుతున్నాయి. పునర్విభజన విషయంలో ఎన్నికలకు ముందు ఇచ్చిన మాటకు, అధికారంలోకి వచ్చిన తర్వాత చేష్టలకు సంబంధం లేకుండా చంద్రబాబు ప్రయత్నిస్తున్నారు. వైయస్.జగన్ ముఖ్యమంత్రిగా ఉన్నప్పుడు రాష్ట్రంలో జిల్లాల పునర్విభజన పూర్తి చేశాడు. 2019 కంటే ముందు పాదయాత్రలో ప్రతి పార్లమెంటు నియోజకవర్గాన్ని జిల్లా చేస్తామని చాలా స్పష్టంగా ప్రకటించారు. ఆ మేరకు 13 నుంచి జిల్లాల సంఖ్యను 25కు పెంచారు. వైయస్.జగన్ మేనిఫెస్టో ప్రకటించిన తర్వాత ప్రజలు ఆయనకు అధికారం కట్టబెట్టారు. అనంతరం ఇచ్చిన హామీ మేరకు ప్రతి పార్లమెంటు నియోజకవర్గాన్ని ఒక జిల్లా చేయడంతో పాటు విశాఖ ఏజెన్సీలో ఉన్న ప్రత్యేక పరిస్థితులు దృష్ట్యా  అల్లూరి సీతారామరాజు జిల్లాను ప్రత్యేక జిల్లాకు ప్రకటించడంతో మొత్తం 26 జిల్లాలు ఏర్పడ్డాయి. దీనిలో స్థానికంగా  కొన్ని సమస్యలు తలెత్తాయి. సర్వేపల్లి నియోజకవర్గం తిరుపతి పార్లమెంటులో ఉన్నప్పటికీ.. భౌగోళికంగా నెల్లూరు నగరం చుట్టూ ఉంది. అలాంటి కొద్ది పాటి మార్పులు చేసి.. విభేదాలకు తావు లేకుండా జిల్లాల పునర్విభజన చేయడం జరిగింది. సర్వేపల్లితో పాటు వెంకటగిరి నియోజకవర్గంలో వెంటకగిరి పట్టణం కూడా తిరుపతి జిల్లాకు వెళ్లినా... నెల్లూరు జిల్లాకు సంబంధించి ఇబ్బందులు లేకుండా ఉండాలన్న ఉద్దేశంతో వెంకటగిరి నియోజకవర్గంలోని రాపూరు, కలువాయి, సైదాపురం మండలాలను మాత్రం నెల్లూరు జిల్లాలో చేర్చారు. చంద్రబాబు అధికారంలోకి వచ్చిన తర్వాత... గతంలో ఎన్నికలకు మందు కందుకూరుని ఒంగోలులోకి, గూడూరుని నెల్లూరు లోకి తీసుకొస్తానని చెప్పిన హామీ మేరకు... కందుకూరుని ఒంగోలులోకి తీసుకెళ్లాడు. గూడురుని మాత్రం నెల్లూరులోకి తీసుకురాకుండా నెల్లూరులోనే ఉంచుతూ.. గతంలో నెల్లూరు జిల్లాలో అంతర్భాగాలుగా ఉన్న రాపూరు, కలువాయి, సైదాపురం మండలాలను మరలా తిరుపతి జిల్లాలో కలుపుతున్నామని డ్రాఫ్ట నోటిఫికేషన్ జారీ చేశారు. 

● నీటి తగాదాలకు తెర లేపిన చంద్రబాబు ...

నెల్లూరు జిల్లాలో ఉన్న ఈ 3 మండలాలను తిరుపతిలో కలిపితే... రైతులు, ప్రజలు తీవ్ర ఇబ్బందులు పడతారు. కారణం రాష్ట్ర విభజన తర్వాత అతిపెద్ద జలాశయాలైన సోమశిల, కండలేరు రెండూ నెల్లూరు జిల్లాలోనే ఉన్నాయి. సోమశిల జలాశయం నుంచి కండలేరుకు నీళ్లు వదిలితే, కండలేరు నుంచి నెల్లూరు జిల్లాలో ఉన్న మనుబోలు, పొదలకూరు ప్రాంతాలకు సాగునీరు అందించే పరిస్థితి ఉండేది. కానీ చంద్రబాబు ప్రభుత్వం రాపూరు మండలాన్ని తిరుపతి జిల్లాలో కలపడం వల్ల నీటియాజమాన్య హక్కులు కలిగిన మనుబోలుతో పాటు పొదలకూరు మండలం, కండలేరు లెఫ్ట్ కెనాల్ ద్వారా వెంకటాచలం మండలంలోని పాలిచర్లపాడు వరకు నీటిని వినియోగించుకుంటారు. ఈ గ్రామాలకు నీటిని విడుదల చేయాలంటే...ఈ ప్రాంతాలన్నీ నెల్లూరు జిల్లా అధికారుల పరిధిలో కాకుండా తిరుపతి జిల్లా పరిధిలో ఉంటుంది. నీటి యాజమాన్య హక్కులకు సంబంధించి రెండు జిల్లాల మధ్య విభేదాలు తలెత్తే అవకాశం ఉంటుంది.  కారణం ఈ ప్రాంతంలో ఉన్న ప్రజాప్రతినిధులు పక్క జిల్లాలో ఉన్న ఇరిగేషన్ అడ్వైజరీ బోర్డులో సభ్యులు కాదు కాబట్టి మాట్లాడ్డానికి వీలులేదు. తిరుపతి జిల్లా ప్రజాప్రతినిధుల ఆ జిల్లా ప్రజల ప్రయోజనాలను దృష్టిలో పెట్టుకుని వ్యవహరిస్తారు. ఈ నేపధ్యంలో తిరుపతి జిల్లా ప్రజాప్రతినిధులు  రాబోయో రోజుల్లో  ఏదైనా నిర్ణయం తీసుకుని నెల్లూరు జిల్లా రైతులకు మొండిచేయి చూపిస్తే...ఎవరిలో పోరాడాలి. ప్రతి సంవత్సరం రెండు పంటలు పంటే ఈ జిల్లాలో ప్రతి సంవత్సరం ఎవరితో పోరాడాలి.చంద్రబాబు తీసుకున్న ఈ నిర్ణయం రైతులు, ప్రాంతాల మధ్య చిచ్చురేపుతుంది.అదే విధంగా ఇనుకుర్తి, ముదిగేడు, బిడదవోలు, కళ్యాణపురం గ్రామాలు పొదలకూరు మండలంలో ఉన్నా ఆ గ్రామాల పొలాలన్నీ పక్కనే  ఉన్న సైదాపురం మండలంలో ఉన్నాయి. అటువంటి పొలాలకు సంబంధించి ఏ సమస్య వచ్చినా వారు తిరుపతికి వెళ్లాల్సిన పరిస్థితి. అలాంటి ఇబ్బందికర పరిస్ధితుల్లో ఆయా ప్రాంతాలను నెల్లూరు నుంచి తిరుపతి జిల్లాలో కలపాలని నిర్ణయం తీసుకోవడం రైతులను తీవ్ర క్షోభకు గురిచేస్తుంది. ఇవేవీ ఆలోచించకుండా చంద్రబాబు హేతుబద్దత లేకుండా తీసుకున్న ఈ నిర్ణయం రైతుల మధ్య కొట్లాటకు దారితీస్తుంది.  

● గూడురుకిచ్చిన హామీ ఏమైంది?

ఎన్నికల ముందు ఇచ్చిన హామీ మేరకు గూడురుని కూడా నెల్లూరులో కలిపి న్యాయం చేస్తారనుకుంటే... ఆయన నోటి మాటలు  నీటి మూటలని మరోసారి స్పష్టం అయింది. గూడురు నియోజకవర్గం మీద చంద్రబాబు ఎందుకు సవతిప్రేమ చూపిస్తున్నాడో సమాధానం చెప్పాలి? దీనిమీద మా పార్టీ అధ్యక్షుడు వైయస్.జగన్ తో మాట్లాడి చంద్రబాబు మాట ఇచ్చి తప్పిన హామీపై తగిన కార్యాచరణ చేపడతాం. చంద్రబాబుకి నిద్రలేస్తే ప్రజలను మభ్యపెట్టడం, మోసం చేయడం తప్ప మరొక్కకార్యక్రమం లేదు. ఆయన గతంలో ఇచ్చిన మాటకు భిన్నంగా నోటిఫికేషన్ విడుదల చేయడం సరికాదు. మా నాయకుడు వైయస్.జగన్ కు ఈ ప్రాంతం గురించి తెలుసుకాబట్టే... సర్వేపల్లి నియోజకవర్గం తిరుపతి పార్లమెంటు పరిధిలో ఉన్నా నెల్లూరు జిల్లాలోనే కొనసాగింది. మా నాయకుడికి ఇక్కడున్న పరిస్ధితిని వివరించి.. ఆయన్ను ఒప్పించాం... ఇది మా చిత్తశుద్ధికి నిదర్శనం. 

● సోమిరెడ్డి ప్రతిపక్షమా? అధికార పక్షమా?

కానీ  వైయ‌స్ఆర్‌సీపీ హయాంలో సర్వేపల్లిని నెల్లూరు జిల్లాలో ఉంచాలని లేఖ రాశానని చెప్పిన సోమిరెడ్డి చంద్రమోహన్ రెడ్డి... ఇప్పుడు అధికారం పక్షంలో ఉండి కూడా లేఖ రాశానని చెప్పడం హాస్యాస్పదం. సోమిరెడ్డి నువ్వు లేఖలు రాసి కాలక్షేపం చేయడం కాదు... బహుశా నియోజకవర్గంలో నీ అరాచకాలు, చిలక్కొట్టుడులు తెలిసీ చంద్రబాబు నీ మొహం చూడడం ఇష్టం లేక అపాయింట్ మెంట్ ఇవ్వలేనట్టుంది. అందుకే లెటర్ రాసి చేతులు దులుపుకునే ప్రయత్నం చేస్తున్నాడు. నియోజకవర్గ ప్రజల ప్రయోజనాల కోసం ఏం చేశావని నిలదీస్తారన్న భయంతోనే లేఖ పేరుతో డ్రామాకు తెరతీశాడు. గతంలో వెంకటగిరి శాససనభ్యుడిగా పనిచేసి ప్రస్తుతం మంత్రిగా పనిచేస్తున్న ఆనం నారాయణరెడ్డి కూడా ప్రభుత్వం మీద ఒత్తిడి తెచ్చి రాపూరు, కలువాయి, సైదాపురం మండలాలను నెల్లూరులో కొనసాగించాలి. అదే విధంగా చంద్రబాబు ఇచ్చిన హామీ మేరకు గూడురు నియోజకవర్గాన్ని కూడా నెల్లూరులో మార్చాలాని డిమాండ్ చేశారు. 

నెల్లూరులో పెంచలయ్య హత్యకు నిరసనగా జరుగుతున్న బంద్ లో మేము కూడా భాగస్వామ్యులవుతామని తెలుగుదేశం పార్టీ చెప్పడం విడ్డూరంగా ఉంది. అధికార పార్టీ చేస్తున్న కార్యక్రమాలకు నిరసనగా ధర్నాలు, రాస్తారోకోలు, బందులకు పిలుపునిస్తారు. అలాంటిది టీడీపీ కార్యకర్తలే హత్య చేస్తే.. దానికి నిరసనగా పిలుపునిచ్చిన బందులో మీరే పాల్గొంటామని చెప్పడం అంటే... చంద్రబాబు ప్రభుత్వం ప్రజావ్యతిరేకంగా పాలిస్తోంది కాబట్టి నెల్లూరు జిల్లాలో పెంచలయ్య హత్యకు నిరసనగా జరుగుతున్న బందులో పాల్గొంటామని టీడీపీ నేతలు చెబుతున్నట్టుంది. టీడీపీ పాలకవర్గమా? ప్రతిపక్షమా? తేల్చి చెప్పాలని కాకాని గోవర్ధన్ రెడ్డి అన్నారు.