ప్రపంచ స్ధాయి రాజధాని పేరుతో చంద్రబాబు దగా 

తాడేపల్లి: ప్రపంచస్ధాయి రాజధాని నిర్మాణం పేరుతో సీఎం చంద్రబాబు రైతులను దగా చేస్తున్నారని మాజీ మంత్రి అంబటి రాంబాబు ఆగ్రహం వ్యక్తం చేసారు. తాడేపల్లి వైయ‌స్ఆర్‌ కాంగ్రెస్ పార్టీ కేంద్ర కార్యాలయంలో మీడియాతో మాట్లాడుతూ... పదేళ్ల క్రితమే 32 వేల ఎకరాల భూములిచ్చిన రైతులకు ఇప్పటివరకు ఎందుకు రిటర్నబుల్ ప్లాట్లు ఇవ్వలేదని నిలదీశారు. నాడు రైతులను త్యాగధనులంటూ కీర్తించిన బాబు.. 
నేడు అపాయింట్ మెంటుకూ నోచుకోవడం లేదని మండిపడ్డారు. రాజధాని కోసం ప్రభుత్వ భూములు కలుపుకుని 50 వేల ఎకరాలు సేకరించిన చంద్రబాబు.. కేవలం కమిషన్లు, కాంట్రాక్టర్ల కోసమే రెండో విడతలో మరో 20 వేల ఎకరాలు సేకరణకు సిద్ధమవడాన్ని తప్పుపట్టారు. నాడు రాజధాని సెల్ఫ్ ఫైనాన్స్ ప్రాజెక్టు అంటూ గొప్పలు చెప్పి... నేడు అప్పు కోసం ప్రపంచమంతా తిరుగుతున్న చంద్రబాబే అమరావతికి అసలైన విలన్ అని స్పష్టం చేశారు. ఈ సందర్భంగా ఇంకా ఏమన్నారంటే..

● రైతుల రిటర్నబుల్ ప్లాట్లు ఎక్కడ ?

గతంలో అమరావతి ప్రాంత రైతులు 35వేల ఎకరాలు భూమి రాజధాని కోసం ఇచ్చారు. మొదట్లో రైతులు భూములు ఇవ్వడానికి తిరస్కరిస్తే వారిని తొలుత బ్రతిమాలి ఆ తర్వాత బెదిరించి ఎట్టకేలకు 35 వేల ఎకరాల భూమి సేకరించిన చంద్రబాబు రైతులను త్యాగధనులు అని కూడా కీర్తించారు. దాంతో పాటు ప్రభుత్వ భూములు, ఫారెస్టు భూములు కలిపి 50వేల పూర్తైంది.. ప్రపంచస్ధాయి రాజధాని నిర్మాణం పూర్తవుతుందని చంద్రబాబు చెప్పారు. ఆ రోజు మరో దశ భూసేకరణ ఉందని కానీ.. మరలా కొంత భూమి సేకరించాల్సిన అవసరం ఉందని కానీ ఎప్పుడూ చెప్పలేదు. ఈ 50 వేల ఎకరాల భూమిలో ప్రపంచంలోనే అత్యద్భుతమైన రాజధాని నిర్మించబోతున్నామని ప్రగల్భాలు పలికిన చంద్రబాబు ఇప్పుడు రెండోదశలో మరో 20వేల ఎకరాల భూమి కావాలంటున్నాడు.  ఇందులో 16,666 ఎకరాలను రైతుల నుంచి పూలింగ్ చేసి, ప్రభుత్వ భూములతో కలిసి 20 వేల ఎకరాలు సేకరించాలని భావించి, కేబినెట్ లో కూడా ఆమోదించారు. ఇంకా మూడో దశ కూడా ఉంది. ఇది చాలా దురదృష్టకరం. 
సుమారు 10 ఏళ్ల క్రితం రైతులు 35 వేల ఎకరాలు ఇచ్చారు. వారికి అభివృద్ధి చేసిన అద్భుతమైన రిటర్నబుల్ ప్లాట్లు ఇస్తామని హామీ ఇచ్చారు. కేటాయించామంటున్నారు... అని ఎక్కడున్నాయో చూపించమని రైతులు అడిగితే పూలింగ్ లో లేని భూములు చూపిస్తున్నారు. పదేళ్లైనా రిటర్నబుల్ ఫ్లాట్లు చూపించని స్ధితిలో ప్రభుత్వం ఉంది. ఇది చంద్రబాబు విజన్. ఎక్కడ భూములున్నాయో తెలియని దుర్మార్గమైన స్థితికి రైతులను నెట్టారు. తమ భూములు, రిటర్నబుల్ ప్లాట్లు గురించి అడిగితే అవమానకరంగా మాట్లాడుతున్నారు. రైతులు తమ భూములు గురించి, కౌలు గురించి బాధపడవద్దని ఒక్క మంత్రి కూడా మాట్లాడ్డం లేదు. ఆ రోజు త్యాగధనులు అని పొగిడి.. ఇవాళ పూర్తిగా పక్కనపెట్టారు. 

● ప్రపంచశ్రేణి రాజధాని పేరుతో పచ్చి మోసం..

పదేళ్ల క్రితం 50 వేల ఎకరాల్లో  ప్రపంచస్ధాయి రాజధానిని నిర్మిస్తామన్న చెప్పిన చంద్రబాబు.. ఇవాళ మాటమార్చి 50 వేల ఎకరాలు అంటే మున్సిపాల్టీ అవుతుంది.. మరో 50వేల ఎకరాలు సేకరిస్తే తప్ప ప్రపంచస్దాయి రాజధాని కాదని చెబుతున్నారు. చంద్రబాబు గారూ మీది నోరా? తాటిమట్టా? కేవలం అమరావతిని అడ్డుపెట్టుకుని దోచుకునే కార్యక్రమం తప్ప మరొక్కటి కాదు. 
తొలిదశలో తీసుకున్న భూముల మీద రూ.1లక్ష కోట్లు ఖర్చుపెట్టాలని చెప్పారు. అందులో చంద్రబాబు అధికారంలో ఉన్నప్పుడు రూ.5587 కోట్లు మాత్రమే టెండర్లు పిలిచారు. ఆపనులు చేపట్టిన తర్వాత వాటికి సంబంధించి  రూ.4318 కోట్ల బిల్లులు మాత్రమే చెల్లించారు. 

● చంద్రబాబుపాలన నాశనమైన వ్యవస్థలు..

అంటే చంద్రబాబు మాటలు కోటలు దాటుతాయి.. చేతలు మాత్రం గడప దాటని పరిస్థితి.
చంద్రబాబు ప్రభుత్వం వస్తే భూములు ధరలు పెరుగుతాయని ఆశపడ్డారు. ఆయన్ను గెలిపించారు. చంద్రబాబు పాదం పెట్టడంతోనే అమరావతితో పాటు రాష్ట్రమంతా భూములు ధరలు కుప్పకూలిపోయాయి. రియల్ ఎస్టేట్ అంతా సర్వనాశనం అయిపోయింది. రైతులు, రియల్ ఎస్టేట్ వ్యాపారులు దెబ్బతినిపోతున్నారు. 
కూటమి ప్రభుత్వం అధికారంలోకి వచ్చి 18 నెలలు పూర్తవుతున్నా... ఇప్పటివరకు తట్టెడు మట్టి ఎత్తిపోసిన పరిస్థితి లేదు కానీ...  తన ప్రియమైన కాంట్రాక్టర్లకు మాత్రం రూ.3వేల కోట్లు అడ్వాన్స్ రూపంలో చెల్లించారు. దాన్ని మొబలైజేషన్ అడ్వాన్స్ అని పేరు పెట్టాడు. దానిలో కమిషన్లు దోచుకునే పరిస్థితికి వచ్చాడు. మా హయాంలో రివర్స్ టెండరింగ్ తో పాటు జ్యుడీషియల్ ప్రివ్యూ కూడా పెట్టాం. మంచి విధానాన్ని తీసుకొచ్చి, ధరలు తెగ్గించి, కాంట్రాక్టర్లు కుమ్మక్కు కాకుండా విధంగా పద్దతి ప్రకారం చేస్తే.. వాటన్నింటినీ పక్కనపెట్టాడు. కేవలం కమిషన్లు కోసమే అన్నింటినీ పక్కన పెట్టాడు.

● సెల్ఫ్ ఫైనాన్స్ పేరుతో పచ్చి అబద్దాలు... 

ఇక రాజధాని కోసం డబ్బులు ఎక్కడా అంటే అన్నీ అప్పులే... వైయస్.జగన్ అమరావతిని నిర్లక్ష్యం చేస్తున్నాడు.  రాజధాని సెల్ఫ్ ఫైనాన్స్ నగరం మొత్తం అదే సంపాదించుకుంటుంది. భూములు అమ్ముకుని నిర్మాణం చేపట్టటమే అని చెబుతూ... ప్రతిపక్షంలో ఉన్నప్పుడు రాజధానికి   పైసా పెట్టక్కరలేదు అని డబ్బాలు కొట్టి.. ఇవాళ ప్రపంచంమంతా అప్పులు కోసం తిరుగుతున్న ప్రభుత్వమిది. 
ఏసియన్ డెవలప్ మెంట్ బ్యాంకు నుంచి రూ.15 వేలు కోట్లు అప్పు, హడ్కో నుంచి రూ.11వేలు, ఎన్ఏబీఎప్ఐడీ నుంచి రూ.7500 కోట్లు, జర్మనీకి చెందిన కేఎఫ్ డబ్ల్యూ నుంచి రూ.1500 కోట్లు అప్పు తీసుకొచ్చారు. ఇవన్నీ చంద్రబాబు చెప్పిన సెల్ఫ్ ఫైనాన్స్ నగరం అమరావతి కోసమే చేసిన అప్పులు.... కేవలం దోచుకోవడం కోసమే ఈ అప్పులన్నీ చేశాడు. 

2019 కంటే ముందు చంద్రబాబు టైంలో రూ.41,170 కోట్లతో టెండర్లు కరారు చేస్తే.. కాంట్రాక్టర్లు సిండికేట్ అయ్యి రూ.5587 కోట్లు మాత్రమే ఖర్చు చేసి.. మిగిలిన రూ.35,583 కోట్లు మిగిలిపోయాయి. ఇవాళ వాటిని మరలా చంద్రబాబు మొదలుపెట్టాడు. గతంలో కొంత పనులు జరగ్గా... మిగిలిన వాటి కోసం... ఎస్ ఓ ఆర్ ప్రకారం మరలా ధరలను రూ. 48,849 కోట్లకు పెంచాడు. ఈ ఐదేళ్లలో పెద్దగా ధరలు పెరగలేదు. ఇసుక ఉచితం కానీ చంద్రబాబు అంచనాలను భారీగా పెంచి, కాంట్రాక్టర్లకు ఇచ్చి మామాళ్లు దండుకోవడం తండ్రీకొడుకులకు అలవాటుగా మారిందే తప్ప ప్రపంచ స్థాయి రాజధానిని నిర్మించాలన్న చిత్తశుద్ధి లేదు.
రైతులకు ఇప్పుడిప్పుడే వాస్తవాలు అర్ధం అవుతున్నాయి.   

● తాత్కాలికం పేరుతో దోపిడీ...

2018లో రూ.2270 కోట్లు సచివాలయ నిర్మాణం కోసం చంద్రబాబు టెండర్లు పిలవగా కొంత పనులు జరిగాయి. ఇప్పుడు మిగిలిన పనుల కోసం ... రూ.4689 కోట్లు పెంచారు. అమరావతిలో సచివాలయం, అసెంబ్లీ, హైకోర్టుతో సహా అన్నీ తాత్కాలికమే. ఈ తాత్కాలిక నిర్మాణల పేరుతో చంద్రబాబు పెట్టిన ఖర్చు చూస్తే... కేవలం అసెంబ్లీ, సెక్రటేరియట్ కలిసిన గవర్నమెంట్ కాంప్లెక్స్ 6 లక్షల ఎస్ ఎఫ్ టీలలో...  ఎస్ ఎఫ్ టీ కోసం రూ.11వేల చొప్పున ఖర్చు పెట్టాడు. ఈ పరిస్థితులు ఎక్కడైనా చూశామా? దీనికోసం రూ.680 కోట్లు ఈ ఐదు భవనాల కోసం ఖర్చు పెట్టాడు. ఇవన్నీ తాత్కాలికం అని నిర్మించారు. ఇవన్నీ పనికిరావని.. ఇప్పుడు మరలా రూ.1006 వేల కోట్లతో హైకోర్టు, సెక్రటేరియట్, అసెంబ్లీ నిర్మాణం చేపట్టాలని నిర్ణయించారు. తాత్కాలికం పేరుతో కోట్లాది రూపాయల ప్రజాధనం విచ్చలవిడిగా ఖర్చుపెట్టారు.
భారతదేశ అత్యున్నతమైన పార్లమెంటు శాశ్వత భవన నిర్మాణానికి రూ.970 కోట్లు ఖర్చు పెడితే.. చంద్రబాబు 2014-19 మధ్యలోనే తాత్కాలిక అసెంబ్లీ, సచివాలయాలకు రూ.680 కోట్లు ఖర్చు పెట్టారు. అంటే ఏ స్ధాయిలో కమిషన్లు కొట్టేశారో అర్ధం చేసుకోవచ్చు. పక్కనే తెలంగాణాలో శాశ్వత సచివాలయ నిర్మాణానికి రూ.558 కోట్లు అయింది. 

రాజధాని నిర్మాణంలో చంద్రాబాబు చేస్తున్న తప్పుల వల్ల  రైతులు తీవ్రమైన విసుగు, ఆగ్రహంతో ఉన్నారు. రామచంద్రయ్య అనే వ్యక్తి ఇటీవల మాట్లాడుతూ.. ప్రపంచంలో ఏ రాజధానిలోనూ నీళ్లు తోడి నదిలో పోసే పరిస్థితి లేదని చెప్పారు. రాజధాని పల్లంలో ఉంటే నది ఎత్తు ప్రాంతంలో ఉంది. కొండవీటి వాగు నుంచి వచ్చే నీరు నదిలో కలవడం లేదు. ఎత్తిపోయాల్సిన పరిస్థితి ఏర్పడుతుంది. అలాంటి రాజధానులు నిర్మించేటప్పుడు అక్కడ పరిస్థితి దారుణంగా ఉంటుంది. రైతులు ఏ విధంగా నష్టపోతున్నారో చూస్తున్నాం. పదేళ్ల క్రితం ఇచ్చిన భూములకే రిటర్నబుల్ ప్లాట్లు లేవు. కొత్తగా సేకరించే భూమి పరిస్ధితి ఏంటనే ఆందోళన ఉంది. రాజధాని నిర్మాణం పూర్తి కాదు, రైతుల గోడు వినేవాడు లేకుండా పోతుంది.భూములిచ్చిన తర్వాత రైతులను పలకరించేవాడే లేకుండా పోతుంది.

ఇప్పటికైనా చంద్రబాబు రాజధాని నిర్మాణంలో చేస్తున్న తప్పులను గమనించి రైతులు మేలు చేయాలి. రైతులకు తక్షణమే రిటర్నబుల్ ప్లాట్లు ఇచ్చి రిజిస్ట్రేషన్ చేయాలని అంబటి రాంబాబు డిమాండ్ చేశారు. గతంలో భూములిచ్చిన రైతులకు న్యాయం చేయకుండా.. మరలా కొత్తగా మరలా సేకరణ అంటున్న చంద్రబాబే.. అమరావతి రైతుల పాలిట నిజమైన విలన్ అని తేల్చి చెప్పారు. కేవలం కాంట్రాక్టర్లు మేలు కోసం, అప్పులు తెచ్చి జేబులు నింపుకోవడం కోసం అమరావతిని ఉపయోగించుకుని ఈ దుస్థితిని తీసుకొస్తున్నారని మండిపడ్డారు. 

● అనంతరం పాత్రికేయుల ప్రశ్నలకు బదులిస్తూ... 

రైతులను చంద్రబాబును నమ్ముతున్నారు ఎలా చెబుతున్నారు. సీఆర్డీయే కార్యాలయానికి వెళ్తే పట్టించుకునేవాళ్లు లేరు. తమను నీచంగా చూస్తున్నారని రైతులే ఆవేదన చెందుతున్నారు. ఎన్నికల ప్రచారంలో 50వేలు ఎకరాలు చాలవని చంద్రబాబు ఎందుకు చెప్పలేదు? ఇప్పుడే ఎందుకు చెబుతున్నాడు. ముఖ్యమంత్రి అమాయక రైతులను ఎందుకు బెదిరిస్తున్నాడు? ఇన్ని ఎకరాలు ఏం చేసుకుంటారు? మరలో కొత్తగా రెండు, మూడు దశలు సేకరణ ఎందుకొచ్చిందో ప్రజలకు సమాధానం చెప్పాలి? అమరావతి పేరుతో జరుగుతున్నది అభివృద్ధి కాదు. రైతులకు ప్లాట్లు ఇవ్వకుండా పెద్దవాళ్లకు భూములు కేటాయిస్తూ.. కాకులను కొట్టి గెద్దలకు పెట్టిన తరహాలో వ్యవహరిస్తున్నారు. ఇది  ముమ్మాటికీ దోపిడీయే. ప్రతిపక్షపార్టీగా రైతుల పక్షాన గొంతెత్తి చెప్పాల్సిన బాధ్యత మా మీద ఉంది. 

డిప్యూటీ సీఎం పవన్ కళ్యాణ్ పర్యటనలో అగంతకుడు ప్రవేశించాడు.. ఆయన భద్రతకు ముప్పు ఉందని ఆ పార్టీ నేతల ఆందోళనపై మాట్లాడుతూ..  డిప్యూటీ సీఎంకి సరైన సెక్యూరిటీ కూడా ఇవ్వలేని దుస్ధితిలో కూటమి ప్రభుత్వం ఉందా? ఆయన సెక్యూరిటీ ఎవరు ఇవ్వాలి? అపరిచిత వ్యక్తి వచ్చాడంటూ ఫిర్యాదులు ఇవ్వటం సిగ్గుచేటు. పవన్ కళ్యాణ్ ప్రచారం కోసం కామిడీ చేస్తున్నారు. సీరియస్ రాజకీయాల్లో పవన్ వెరైటీ కామిడీ చేస్తున్నారు. తన అభిమాని తనకోసం వచ్చినా పవన్ భయపడుతున్నారు. ఆయనకు ప్రాణహాని ఉంటే తక్షణమే రక్షణ కల్పించాలి. ఒక‌ డీఎస్పీని అవినీతి పరుడని పవన్ అంటే ప్రభుత్వం ఆ డిఎస్పీకి అవార్డు ఇచ్చింది. ఇదీ కూటమి ప్రభుత్వంలో పవన్ పరిస్థితి అని అంబటి రాంబాబు స్పష్టం చేశారు.