హామీలు నెరవేర్చేదెప్పుడో చెప్పాలి..?

బద్వేలు: టీడీపీ ఎన్నికల్లో ఇచ్చిన హామీలను తుంగలో తొక్కి ఆర్భాట ప్రకటనలతో ప్రజలను మభ్య పెడుతుందని వైయస్సార్‌సీపీ ఎమ్మెల్సీ డీసీ గోవిందరెడ్డి  విమర్శించారు. రైతు రుణమాఫీ, డ్వాక్రా రుణాల మాఫీ ఎంతవరకు చేశారో చెప్పాలని ప్రశ్నించారు. దశలవారీగా మాఫీ అంటూ రైతాంగాన్ని నిలువునా కూల్చారన్నారు. ఇంటికో ఉద్యోగమంటే ఉన్న ఉద్యోగులను పీకేయ్యడమా అని అన్నారు. నిరుద్యోగ భృతి పేరు చెబుతూన్నా ఆచరణలోకి ఎప్పుడు వస్తుందో తెలియదన్నారు. రాష్ట్రంలో రైతాంగం కరవుతో తీవ్ర ఇబ్బందులు పడుతున్నా నివారణ చర్యలు తీసుకోలేదన్నారు. బ్రహ్మాంసాగర్‌లోని నీరును నియోజకవర్గంలోని చెరువులు నింపేందుకు విడుదల చేయాలని కోరారు. భూగర్భజలాలు భారీగా తగ్గిపోయి ప్రజలు ఇబ్బందులు పడుతున్నా అధికారులు చర్యలు తీసుకోవడం లేదని ఆగ్రహాం వ్యక్తం చేశారు. రాష్ట్రంలో ఇన్ని సమస్యలున్నా పట్టించుకోకుండా ఆర్భాటంగా  మహానాడు నిర్వహించడమేంటని ప్రశ్నించారు.