జననేత జగనే సమర్థుడు

తెనాలి: రాష్ట్ర ప్రజలు డాక్టర్ వైయస్ రాజశేఖరరెడ్డి ప్రవేశపెట్టిన సంక్షేమ పథకాలను తిరిగి కోరుకుంటున్నారని వైయస్ఆర్ కాంగ్రెస్ పార్టీ జిల్లా కన్వీనర్ మర్రి రాజశేఖర్ చెప్పారు. ఆ పథకాల అమలు కేవలం వైయస్ జగన్‌మోహన్‌రెడ్డితోనే సాధ్యమవుతుందన్నారు. జగన్ జైలు నుంచి విడుదల కావాలని కోరుతూ పార్టీ వేమూరు నియోజకవర్గ ఇన్‌చార్జి డాక్టర్ మేరుగ నాగార్జున విజయవాడలోని గుణదలకు తలపెట్టిన పాదయాత్రను రాజశేఖర్ ప్రారంభించారు. వేమూరు నియోజకవర్గంలోని అమృతలూరు మండలం కూచిపూడిలో మంగళవారం ఉదయం ఈ యాత్ర ప్రారంభమైంది. ఈ సందర్భంగా మర్రి మాట్లాడుతూ ప్రజా సమస్యల పరిష్కారంలో ప్రభుత్వం పూర్తిగా విఫలమైందన్నారు. సాగు, తాగు నీరు లేక, విద్యుత్ సమస్యలతో ప్రజలు అల్లాడుతుంటే జిల్లాకు చెందిన మంత్రులు కనీసం ప్రశ్నించే స్థితిలో లేరన్నారు. ప్రజల సమస్యలను అర్థం చేసుకుని సమర్థ పాలన అందించే సామర్థ్యం జగన్‌కు మాత్రమే ఉందన్నారు. ఆయన విడుదల కోరుతూ చేపట్టిన పాదయాత్రకు ప్రజల నుంచి వచ్చిన స్పందనే ఇందుకు నిదర్శనమని చెప్పారు.