బాబు అండ్ కో ముందే సర్దుకున్నారు

విజయవాడ :పెద్దనోట్ల రద్దు చంద్రబాబుకు ముందే తెలుసని ఏపీ ప్రతిపక్ష నేత వైఎస్ జగన్ మోహన్ రెడ్డి అన్నారు.  క్రెడిట్ కొట్టేసేందుకు ముందుగా ఆయన మోదీకి లేఖ రాశారని చెప్పారు. పెద్దనోట్ల రద్దు ప్రక్రియ అంతా సాఫీగా జరిగి ఉంటే చంద్రబాబు దాని క్రెడిట్ తీసుకునేవారని, కానీ ఇప్పుడు బాగా జరగలేదు కాబట్టి మోదీ బ్యాడ్ అంటున్నారని ఎద్దేవా చేశారు. చంద్రబాబు, ఆయన అనుయాయులు అన్నీ ముందే చక్కబెట్టేసుకున్నారని ఆరోపించారు. నోట్ల రద్దుకు సరిగ్గా రెండు రోజుల ముందే హెరిటేజ్ షేర్లను ఆయన ఫ్యూచర్ గ్రూపునకు అమ్మేశారని, ఇది ఎలా చేయగలరని ప్రశ్నించారు. ఐటీ దాడుల్లో పెద్దపెద్దోళ్ల ఇళ్లల్లో కోట్లకు కోట్ల కొత్తనోట్లు దొరుకుతున్నాయనని.. బీదవాళ్లు మాత్రం క్యూలో నిలబడి గట్టిగా రెండు వేలు తెచ్చుకోలేకపోతున్నారని ఆయన చెప్పారు. ఇది బ్లాక్‌మనీ మీద పోరాటమా లేక పేదలను కూడా పన్ను పరిధిలోకి తీసుకురావాలనే ఆరాటమా అని ప్రశ్నించారు.