తాడేపల్లి: రాజధాని అమరావతి విషయంలో కూటమి ప్రభుత్వం అనుసరిస్తున్న విధానాన్ని వైయస్ఆర్ కాంగ్రెస్ పార్టీ స్టేట్ కో-ఆర్డినేటర్ సజ్జల రామకృష్ణారెడ్డి తప్పుపట్టారు. ఈ మేరకు ఆయన మీడియాతో మాట్లాడుతూ..మూడు ప్రాంతాలను పేకముక్కలతో పోల్చుతూ చంద్రబాబు అవమానకరంగా మాట్లాడుతున్నారని సజ్జల విమర్శించారు. రూ.2 లక్షల కోట్ల అప్పులతో అసాధ్యమైన అమరావతి నిర్మాణంపై ఇతర ప్రాంతాల ప్రజలను సంబరాలు చేయమని చెప్పడం అన్యాయమని అన్నారు. ఈ పిలుపును ప్రజలు తిరస్కరించారని, అధికారులకు ఆదేశాలు ఇచ్చినా పెద్దగా స్పందన రాలేదని తెలిపారు. అమరావతికి కులరంగు పులిమింది చంద్రబాబేనని ఆరోపిస్తూ, పార్లమెంట్లో Renuka Chowdhury “కమ్మరావతి” అన్న వ్యాఖ్యను టిడిపి ఖండించలేదని గుర్తుచేశారు. పైగా రాజ్యసభ గ్యాలరీలో నుంచి లోకేష్ ఆ వ్యాఖ్యకు ధన్యవాదాలు తెలిపారని విమర్శించారు. అమరావతిలో జరిగిన అవినీతిని తాము ప్రశ్నిస్తున్నామని, నేలమీద నిలబడి ఆలోచించాలని శ్రీ వైయస్ జగన్ గారు సూచించారని చెప్పారు. అయితే దానికి బదులుగా ఎదురుదాడులు చేస్తున్నారని అన్నారు. పార్లమెంట్ అధికారాలు, చట్టాల తయారీపై చంద్రబాబుకు సరైన అవగాహన లేదని వ్యాఖ్యానించిన సజ్జల, ఆయన ఇన్నాళ్లు ముఖ్యమంత్రిగా ఎలా పనిచేశారో అర్థం కావడం లేదన్నారు. ప్రజలపై భారంలేని అభివృద్ధి కావాలన్నది జగన్ దృక్పథమని స్పష్టం చేశారు. రాజధాని ఏర్పాటులో 30 వేల ఎకరాల ప్రభుత్వ భూమి ఉండాలని, అది సామాన్యులు, మధ్యతరగతి ప్రజలకు అందుబాటులో ఉండాలని జగన్ ముందుగానే ఆలోచించారని చెప్పారు. ప్రభుత్వంపై అదనపు భారం లేకుండా అభివృద్ధి చేయాలన్నదే లక్ష్యమని వివరించారు. చంద్రబాబు పాలనలో అమరావతిలో విస్తృతంగా అవినీతి జరిగిందని ఆరోపిస్తూ, అధిక వడ్డీతో బాండ్లు తీసుకురావడం సిగ్గుచేటు అని విమర్శించారు. అప్పుల భారం చివరకు ప్రజలపైనే పడుతుందని చెప్పారు. అమరావతి నిర్మాణం ఇప్పటికీ దూరమని, 2043 వరకు లాగాలనే ప్రణాళిక ఉందని ఆరోపించారు. ఈ పేరుతో ఖజానాను ఖాళీ చేయడమే లక్ష్యమని అన్నారు. కేవలం కొద్ది భవనాలు కట్టడం రాజధాని కాదని, ఉద్యోగాలు, ఆర్థిక కార్యకలాపాలు కలిగిన జీవన నగరం కావాలని చెప్పారు. నవ రాయ్పూర్ ఉదాహరణ చూపిస్తూ, తక్కువ ఖర్చుతో అభివృద్ధి సాధ్యమని వివరించారు. కానీ అమరావతిలో మాత్రం భారీ అప్పులు తీసుకుని నిర్మాణం చేయడం ప్రజలపై భారం మోపే చర్య అని విమర్శించారు. వికేంద్రీకరణను తప్పుగా చూపుతూ, శివరామకృష్ణన్ కమిటీ సూచనలను పక్కన పెట్టారని చంద్రబాబుపై ఆరోపించారు. జగన్ తీసుకొచ్చిన అధికార వికేంద్రీకరణ నిర్ణయం సమగ్ర అధ్యయనంతో తీసుకున్నదని తెలిపారు. మచిలీపట్నం–విజయవాడ–గుంటూరు ప్రాంతాలను కలిపి అభివృద్ధి చేసే “గ్రోత్ కారిడార్” ప్రతిపాదనను చంద్రబాబు అడ్డుకుంటున్నారని సజ్జల ఆరోపించారు. ఇది ఆచరణాత్మకమైన ప్రతిపాదన అని, ప్రజల నుంచి మద్దతు లభిస్తోందని చెప్పారు. అమరావతి పేరుతో రాష్ట్ర ప్రజలపై భారీ ఆర్థిక భారం మోపుతున్నారని, ప్రతి వ్యక్తిపై సుమారు రూ.2 లక్షల భారం పడుతోందని పేర్కొన్నారు. ఈ నేపథ్యంలో ప్రజలతోనే సంబరాలు చేయించాలని కోరడం అన్యాయం అని అన్నారు. ప్రజా ప్రయోజనాలే లక్ష్యంగా పనిచేసే నాయకుడు జగన్ అని, ఆయన నాయకత్వంపై తమకు గర్వమని సజ్జల తెలిపారు. తప్పుడు ప్రచారాలతో ప్రజలను తప్పుదోవ పట్టించే ప్రయత్నాలు జరుగుతున్నాయని విమర్శించారు.
