గాలింపు చర్యలు కొనసాగుతున్నాయి

తూర్పుగోదావరి: తూర్పుగోదావరి జిల్లా కచ్చులూరు వద్ద గోదావరిలో బోల్తా పడిన పడవ ఆచూకీ కోసం గాలింపు చర్యలు కొనసాగుతున్నాయని మంత్రి కురసాల కన్నబాబు పేర్కొన్నారు. గాలింపు చర్యలను శుక్రవారం కన్నబాబు పరిశీలించారు. ఈ సందర్భంగా ఆయన మీడియాతో మాట్లాడుతూ, ప్రమాదం సంభవించిన సమయంలో బోటులో గల్లంతైన వారి సంఖ్య 77గా లెక్క తేలిందని చెప్పారు. ఇప్పటి వరకు 35 మృతదేహాలను వెలికితీశారని అన్నారు. విశాఖకు చెందిన ఓ మహిళ మృతదేహం లభ్యమైందని, ఇంకా 16 మంది మృతదేహాలు దొరకాల్సి ఉందని అన్నారు. ఆ మృతదేహాలు బోటులోనే ఉండొచ్చని భావించారు. వరద ప్రవాహం అధికంగా ఉండటంతో ప్రమాదానికి గురైన బోటును బయటకు తీయడం కష్టమవుతుందని, గాలింపు చర్యలు కొనసాగుతున్నాయని చెప్పారు. బోటు ప్రమాదం సమయంలో 27 మందిని రక్షించిన మత్స్యకారులను ఆయన అభినందించారు.