తాడేపల్లి:అధికారాన్ని అడ్డు పెట్టుకుని సీఎం చంద్రబాబు తీవ్ర అధికార దుర్వినియోగానికి పాల్పడుతున్నారని.. వైయ‌స్ఆర్‌సీపీజనరల్ సెక్రటరీ, మాజీ అడిషనల్ అడ్వొకేట్ జనరల్ పొన్నవోలు సుధాకర్ రెడ్డి ఆగ్రహం వ్యక్తం చేశారు. తాడేపల్లి వైయస్సార్ కాంగ్రెస్ పార్టీ కార్యాలయంలో మీడియాతో మాట్లాడుతూ... అధికారాన్ని అడ్డు పెట్టుకుని అవినీతి కేసులను మాఫీ చేసుకుంటున్న చంద్రబాబు... అవినీతి మురికిని అధికారంతో కడిగేసుకుంటున్నారని మండిపడ్డారు. ప్రజాప్రయోజనం ఉంటే తప్ప కేసు విత్ డ్రా చేసుకోవడానికి అవకాశం లేదని కోర్టులు నిర్దేశించినా.... చంద్రబాబు చట్టవిరుద్ధంగా వ్యవహరిస్తున్నారని మండిపడ్డారు. చట్టం ఎవరికీ చుట్టం కాదన్న ఆయన... తన న్యాయవాదుల మీద తప్ప చట్టం మీద బాబుకు నమ్మకం లేదని... ఉంటే ధైర్యంగా కేసులు ఎదుర్కోవాలని డిమాండ్ చేశారు. అసలు విచారణకే రాకుండా అధికార బలంతో అడ్డుకోవడంతో పాటు, కేసులు విత్ డ్రా చేసుకుంటే.. నువ్వు శుద్దపూస ఎలా అవుతావు చంద్రబాబూ అని నిలదీశారు. ఇవన్నీ బెయిల్ రద్దుకు కారణాలేనని.. దీనిపై ఖచ్చితంగా న్యాయపోరాటం చేస్తామని హెచ్చిరించారు. దీనిపై ఇంకా ఆయన ఏమన్నారంటే... ● లిక్కర్ స్కామ్- చంద్రబాబు డిస్టలరీలకు అక్రమ అనుమతులు లిక్కర్ స్కామ్ లో గత ప్రభుత్వ హయాంలో ఏపీ బ్రావరేజీ కార్పొరేషన్ ఎండీ వాసుదేవ రెడ్డి ఫిర్యాదుతో కేసు రిజిష్టర్ చేశారు. ఇందులో అభియోగాలు చూస్తే... 2012-15 వరకు ఏ -4 లిక్కర్ షాపులకు ప్రివిలైజ్ ఫీజు ఉంటే అది తీసేశారు. దానివల్ల ప్రభుత్వానికి రూ.2984 కోట్లు నష్టం జరిగింది. దీంతో పాటు బార్లకు కూడా ప్రివిలైజ్ ఫీజు తీసేయడం వల్ల ప్రభుత్వ ఖజానాకి వేల కోట్ల రూపాయల నష్టం జరిగింది. ఫైనాన్షియల్ కన్సెషన్ ఇవ్వదల్చుకుంటే... బిజినెస్ రూల్స్ ప్రకారం ఆర్థికశాఖ మందుకు కానీ, మంత్రిమండలి ముందుకు కానీ లేదంటే మంత్రుల బృందం వద్దకు కానీ వెళ్లాలి. ఇవన్నీ బైపాస్ చేసి, చంద్రబాబు నాయుడుతో పాటు మిగిలిన నిందితులు ఏ-4 షాపులకి, బార్లకు ప్రివిలైజ్ ఫీజు తొలగించారు. ఆ విధంగా ప్రభుత్వ ఖజానాకు వేలకోట్ల రూపాయల నష్టం చేకూర్చారు. రాష్ట్రంలో ఎన్ని డిస్టలరీలు పెట్టాలి, వినియోగం ఎంత అన్నదానిపై ఒక కమిటీ రిపోర్ట్ ఇస్తుంది. పీఎంకె డిస్టలరీస్, విశాఖ డిస్టలరీస్ తో పాటు మరో మూడు కలుపుకుని మొత్తం 5 డిస్టలరీలకు చట్ట వ్యతిరేకంగా అనుమతులు మంజూరు చేశారు. ఇవాళ మార్కెట్ లో కనిపిస్తున్న ప్రెసిడెంట్ మెడల్, బూమ్ బూమ్ వంటి బ్రాండ్లు అన్నింటికీ చంద్రబాబు ప్రభుత్వమే అనుమతులు మంజూరు చేసింది. దీని ద్వారా వేల కోట్ల రూపాయలు ప్రభుత్వ ఖజానాకి నష్టం కలిగించారని అప్పిటి ఏపీబీసీఎల్ ఎండీ వాసుదేవరెడ్డి సీఐడీకి ఫిర్యాదు చేస్తే దాన్ని క్రైమ్ నెంబరు 18/2023 కింద కేసు నమోదు చేశారు. తర్వాత పరిణామ క్రమంలో కూటమి ప్రభుత్వం అధికారంలోకి వస్తే... ఫిర్యాదుదారు, ఎండీ వాసుదేవరెడ్డి, అక్కడే పనిచేస్తున్న సత్యప్రసాద్ ని భయపెట్టి... వాసుదేవరెడ్డి ద్వారా కోర్టులో కేసు విత్ డ్రాకు అభ్యంతరం లేదని లెటరు పైల్ చేయించారు. ఇంతకన్నా సాక్షులను ప్రభావితం చేయడం, బెదిరించడం ఉంటుందా? ఇవి బెయిల్ కేన్సిల్ చేయడానికి కారణాలు కావా? లిక్కర్ స్కామ్ లో అంటిన మురికిని చంద్రబాబు తన అధికార బలంతో కడిగేసుకుంటున్నాడు. సీఆర్ పీసీ 321, బీఎన్ ఎస్ ఎస్ 360 కింద విత్ డ్రా చేసుకోవచ్చు. అయితే ఎప్పుడు విత్ డ్రా చేసుకోవచ్చన్నది కూడా చట్టం నిర్దేశిస్తుంది. కేవలం సమాజానికి మంచి జరిగినప్పుడు మాత్రమే విత్ డ్రా చేసుకోవాలి కానీ.. మీ స్వప్రయోజనాల కోసం అధికారం మీ చేతిలో ఉందని విత్ డ్రా చేయడం చట్ట సమ్మతం కాదు. వైయ‌స్ఆర్‌సీపీలీగల్ టీమ్ దీనిపై కచ్చితంగా పోరాటం చేస్తుంది. అధికారంలోకి వచ్చిన తర్వాత తప్పులు చేసి, ఆ తర్వాత వచ్చే ప్రభుత్వంలో కేసులు నమోదైతే మరలా వారికి అధికారం వచ్చిన రోజు కేసులు విత్ డ్రా చేసుకుంటారు. ఇది చట్ట సమ్మతం కాదు. ప్రభుత్వం చాలా కేసుల్లో ఇలా విత్ డ్రా చేసుకోవడానికి సిద్ధంగా ఉన్నట్టు సమాచారం. ● కేసు విత్ డ్రా- సుప్రీం తీర్పుకు విరుద్దం... సుప్రీం కోర్టు ఇలాంటి కేసుల్లో చాలా గట్టిగా తీర్పులిచ్చింది. అధికారంలో మీకు మీరై కేసులు విత్ డ్రా చేసుకుంటే అది ప్రజాప్రయోజనం కాదని చెప్పింది. సుప్రీం కోర్టు తీర్పులతో సంబంధం లేకుండా చేస్తుంది. వాళ్ల నాయకులకు అనుకూలంగా ముద్ర వేసి ఇవ్వడానికి పబ్లిక్ ప్రాసిక్యూట్ పోస్టాఫీసు కాదు. గౌరవ కోర్టు వారు కూడా యాంత్రికంగా విత్ డ్రా చేయడానికి హక్కులేదు. కోర్టు వారు కూడా ప్రజాప్రయోజనం ఉందా? లేదా ? అన్నది చూసిన తర్వాత మాత్రమే నిర్ణయం తీసుకోవాలి. చంద్రబాబు తనమీద ఉన్న ఏపీ స్కిల్ డెవలప్ మెంట్ కేసులో బెయిల్ మీద ఉన్నారు. దీనిలో రూ.371 కోట్ల అవినీతి సొమ్ము చేతులు మారింది. ఏపీ పైబర్ నెట్ స్కామ్, అమరావతి ఇన్నర్ రింగ్ రోడ్డు కేసులో కూడా చంద్రబాబు బెయిల్ మీద ఉన్నారు. అమరావతి అసైన్డ్ ల్యాండ్స్ ఇది చాలా ముఖ్యం. పేదలకు అమరావతి క్యాపిటల్ కాకముందు ప్రభుత్వం అక్కడ భూములిచ్చింది. చంద్రబాబు ప్రభుత్వం రాజధాని అక్కడ పెట్టాలని నిర్ణయించుకున్న తర్వాత వారిని భయపెట్టి, హింసించి ఆ ఆసైన్డ్ ల్యాండ్స్ కు ప్రభుత్వం మీకు ఏ విధమైన పరిహారం ఇవ్వదని ప్రచారం చేసి వారి దగ్గర నుంచి ఆ భూములను మీరు కొనుగోలు చేసింది వాస్తవమా ? కాదా? ఆ మొత్తం అసైన్డ్ ల్యాండ్స్ రూ.4,400 కోట్లు కుంభకోణం చేసి దోపిడీ చేశారని సీఐడీ కేసు నమోదు చేసింది. ఆ భూములు కొన్న తర్వాత మీరు జీవో ఎం ఎస్ నెంబరు 41 విడుదల చేసి ఆభూములను రెగ్యులరైజ్ చేసుకున్నారు. ఆ జీవో పీఓటి యాక్ట్ కు వ్యతిరేకంగా ఉంది. ఇన్ని లొసుగులు పెట్టుకుని రూ.4,400 కోట్ల విలువైన పేద ప్రజల కష్టార్జితమైన భూమిని స్వాధీనం చేసుకున్నారు. ఇన్ని కేసులు మీ మీద ఉంటే.. అధికారంలోకి వచ్చిన తర్వాత ఫిర్యాదు దారుల మీద ఒత్తిడి చేసి కేసులు విత్ డ్రా చేయడానికి పిటిషన్ చేసి. మీరు శుద్దపూసలగా, మంచు కడిగిన ముత్యంలా ఆ కేసుల నుంచి భయటపడాలని చూస్తున్నారు. ఇది ఎంత మాత్రం చట్టసమ్మతం కాదు. ప్రజలు మీకు అధికారం ఇచ్చింది వాళ్లకు మేలు చేస్తారనే తప్ప .. మీ సొంత పనులు చేసుకుని మీకు మేలు చేసుకుంటారని కాదు? ఈ విషయాన్ని గుర్తించుకోవాలి. ● బెయిల్ రద్దుకు వైయ‌స్ఆర్‌సీపీ పోరాటం... వైయ‌స్ఆర్‌సీపీ న్యాయ విభాగం దీని మీద పోరాటం చేస్తుంది. మీ చర్యలను కచ్చితంగా అడ్డగిస్తుంది. ఎన్నికల మేనిఫెస్టోలో మాకు అధికారం ఇస్తే మా మీద కేసులు విత్ డ్రా చేసుకుంటామని చెప్పారా? అధికారం వచ్చిన తర్వాత ప్రజాశ్రేయస్సును తుంగలో తొక్కి మీ పనులు చక్కబెట్టుకుంటున్నారు. పాలకుల చేతిలో అధికారం కేంద్రీకృతమైన తర్వాత వారి పైన ఉన్న కేసులు ఉపసంహరించుకోకూడదని.. పలువురు న్యాయ కోవిదులు సైతం అభిప్రాయపడ్డారు. రాష్ట్ర ప్రభుత్వమే ముద్దాయి, న్యాయమూర్తిగా వ్యవహరిస్తే అది రాజ్యాంగం మూల సూత్రాలకు విరుద్ధం అని సోలీ సొరాబ్జీ చెప్పారు. ఒక పోలీసు, ఒక ముద్దాయి, ఒక వ్యవస్థ మూడూ ఏకమైన రోజు అది రాజ్యాంగం ఖూనీ అయినట్టేనని జస్టిస్ మదన్ లోకు చెప్పారు. కేసుల విత్ డ్రా కోసం మీ ప్రయత్నాలు మీరు చేస్తున్నారు.. అది చట్ట సమ్మతం కాదన్నదే మా అభ్యంతరం. కేవలం ప్రజాప్రయోజనాలుంటేనే కేసులు విత్ డ్రా చేసుకోవాలే తప్ప.. మీ వ్యక్తిగత ప్రయోజనాల కోసం కాదు. కచ్చితంగా వైయ‌స్ఆర్‌సీపీ న్యాయవిభాగం దీన్ని అడ్డుకుంటుంది. ఇటువంటి అనైతిక, అనాలోచిత రాజ్యాంగ వ్యతిరేక చర్యలకు వ్యతిరేకంగా పోరాడతాం. పాలకులు ఇలాగే కొనసాగతే ... వాళ్ల చేతిలో అధికారం ఉన్నంత సేపు, వాళ్ల మీద నమోదైన కేసులను వాళ్లే తీసేసుకుంటే ఇక వ్యవస్థలతో పనేముంటుంది. లిక్కర్ కేసులో వైయ‌స్ఆర్‌సీపీ నేతలను ఇరికించేందుకు ఒక వెర్షన్ చెప్పమంటున్నారంటూ ఏపీబీసీఎల్ ఎండీ హైకోర్టులో పిటిషన్ దాఖలు చేస్తే... అదే వాసుదేవరెడ్డితో మీరు విత్ డ్రా పిటిషన్ వేయించారు. అది వాసుదేవరెడ్డికి సంబంధించిన విషయం కాదు. రాష్ట్ర ప్రజల సంపదకు సంబంధించిన విషయమన్న పొన్నవోలు.... ఇదేమీ ఆయన వ్యక్తిగత ఆస్తుల గొడవ కాదని స్పష్టం చేశారు. ఇది కచ్చితంగా సాక్ష్యాలను చెరిపేయడం, సాక్షులను బెదిరించడం కిందకే వస్తుంది. ఇవన్నీ మీ బెయిల్ రద్దు కావడానికి కారణం అవుతాయని పొన్నవోలు సుధాకర్ రెడ్డి తేల్చిచెప్పారు. ● పాత్రికేయల ప్రశ్నలకు బదులిస్తూ... చట్టం ఎవరికీ చుట్టం కాదు. వారి తరపున వాదిస్తున్న న్యాయవాదుల మీద నమ్మకం తప్ప... చంద్రబాబుకు చట్టం మీద నమ్మకం లేదు. చట్టం మీద నమ్మకం ఉంటే 14-15 కేసులు విత్ డ్రా చేసుకోవడానికి ప్రయత్నించరు. నీ నిర్దోషిత్వాన్ని నిరూపించుకోవాలంటే... కేసులు విచారణ ఎదుర్కొని శుద్ధపూసలా బయటకు రావాలి. కేసుల విచారణ జరగనీయకుండానే అధికార బలంతో అవినీతి మురికిని కడుగేసుకునే ప్రయత్నం చేస్తున్నావు.. నువ్వు శుద్ధ పూస ఎలా అవుతావు? విచారణలో నిర్ధోషత్వాన్ని నిరూపించుకోవాలని పొన్నవోలు సుధాకర్ రెడ్డి స్పష్టం చేశారు.
