అన్నమయ్య జిల్లా: సంక్షేమం, అభివృద్ధి అనే మాటలకు అర్థం చెప్పిన ప్రజానాయకుడు, మాజీ ముఖ్యమంత్రి వైయస్ జగన్ మోహన్ రెడ్డి (జగనన్న) పాలన కాలం రాయచోటి నియోజకవర్గానికి వరంగా మారిందని స్థానిక ప్రజలు గట్టిగా చెబుతున్నారు. దశాబ్దాల పాటు నిర్లక్ష్యానికి గురైన రాయచోటి ప్రాంతం, జగనన్న హయాంలోనే నిజమైన అభివృద్ధి బాట పట్టిందని ప్రజలు స్పష్టం చేస్తున్నారు. దివంగత ముఖ్యమంత్రి వైయస్ రాజశేఖర్ రెడ్డి హయాంలో ప్రారంభమైన అభివృద్ధి ప్రయాణం, ఆయన తనయుడు జగనన్న పాలనలో మరింత వేగం పుంజుకుందని రాయచోటి ప్రజలు గుర్తుచేస్తున్నారు. 2019–2024 మధ్యకాలంలో జగనన్న నాయకత్వంలో, అప్పటి ఎమ్మెల్యే గడికోట శ్రీకాంత్ రెడ్డి అహర్నిశల కృషి, ఎంపీ మిథున్ రెడ్డి సహకారంతో రాయచోటి నియోజకవర్గం అన్ని రంగాల్లో విప్లవాత్మక మార్పులకు నాంది పలికిందని ప్రజలు పేర్కొంటున్నారు. దశాబ్దాల కల అయిన రాయచోటిని జిల్లా కేంద్రంగా మార్చిన ఘనత జగనన్న ప్రభుత్వానిదేనని ప్రజలు గర్వంగా చెబుతున్నారు. 95 రకాల జిల్లా ప్రధాన కార్యాలయాల ఏర్పాటు ద్వారా ఉద్యోగాలు, అవకాశాలు, మౌలిక సదుపాయాలు రాయచోటికి చేరాయని వెల్లడిస్తున్నారు. పరిపాలన ప్రజల గడప వద్దకు చేరిందని అభిప్రాయపడుతున్నారు. సంక్షేమ పథకాల అమలులో దేశానికే ఆదర్శంగా నిలిచిన జగనన్న పాలనలో, ఒక్క రాయచోటి నియోజకవర్గానికే రూ. 2 వేల కోట్లకు పైగా లబ్ధి నేరుగా ప్రజలకు చేరిందని ప్రజలు స్పష్టం చేస్తున్నారు. గ్రామ సచివాలయాలు, రైతు భరోసా కేంద్రాలు, విలేజ్ హెల్త్ క్లినిక్లు, నాడు–నేడు కార్యక్రమం ద్వారా ప్రభుత్వ పాఠశాలల రూపాంతరం—ఇవి పేద, మధ్యతరగతి కుటుంబాల జీవితాల్లో గుణాత్మక మార్పు తీసుకొచ్చాయని చెబుతున్నారు. సాగునీరు లేని ప్రాంతానికి సాగునీటి కలను నెరవేర్చేందుకు చేపట్టిన లిఫ్ట్ ఇరిగేషన్ ప్రాజెక్టులు, చెరువుల పునరుజ్జీవనం రైతుల్లో కొత్త ఆత్మవిశ్వాసాన్ని నింపాయని తెలిపారు. ప్రతి ఇంటికీ త్రాగునీరు అనే లక్ష్యంతో వాటర్ గ్రిడ్, జలజీవన్ మిషన్ పథకాలు జగనన్న పాలనలోనే ప్రారంభమయ్యాయని గుర్తుచేస్తున్నారు. పేదల సొంతింటి కలను సాకారం చేస్తూ నిర్మించిన జగనన్న కాలనీలు, నాలుగు వరుసల రహదారులు, నగర వనం, క్రీడా మైదానాలు, ఆసుపత్రులు రాయచోటి ముఖచిత్రాన్నే మార్చేశాయని ప్రజలు అంటున్నారు. “అభివృద్ధి అంటే ఇదే… పాలన అంటే ఇదే” అని జగనన్న చేతల్లో చేసి చూపించారని పేర్కొంటున్నారు. రహదారులు, త్రాగునీరు, సాగునీరు, విద్య, వైద్యం, ఉపాధి—ప్రతి రంగంలోనూ రాయచోటి నియోజకవర్గం అభివృద్ధికి నిలువెత్తు సాక్ష్యంగా మారిందని ప్రజలు చెబుతున్నారు. గతంలో ఎప్పుడూ జరగని విధంగా ప్రభుత్వ కార్యాలయాలకు శాశ్వత భవనాలు, భూకేటాయింపులు జరగడం చరిత్రగా నిలిచిందని అభిప్రాయపడుతున్నారు. జగనన్న జన్మదిన సందర్భంగా రాయచోటి నియోజకవర్గ ప్రజలు హృదయపూర్వకంగా తమ భావాలను వ్యక్తం చేస్తున్నారు. “రాయచోటిని అభివృద్ధి చేసిన జగనన్నను ఎప్పటికీ మా గుండెల్లోనే పెట్టుకుంటాం… ఎల్లప్పుడూ ఆయనకు అండగా ఉంటాం” అని చెబుతూ, “నాయకుడా… వెయ్యేళ్లు వర్ధిల్లాలి” అంటూ జగనన్నకు దీవెనలు అందిస్తున్నారు. ప్రజల కోసం బతికే నాయకుడిగా, ప్రజల కోసమే పాలించే జననేతగా వైయస్ జగన్ మోహన్ రెడ్డి పేరు చరిత్రలో శాశ్వతంగా నిలిచిపోతుందని రాయచోటి ప్రజలు గర్వంగా ప్రకటిస్తున్నారు.
