అసెంబ్లీ సమావేశాల తీరు బాధాకరం: వైయస్ఆర్ సీపీ

హైదరాబాద్: అసెంబ్లీ వర్షాకాల సమావేశాలు నిర్వహించిన తీరును వైయస్ఆర్ కాంగ్రెస్ పార్టీ తీవ్రంగా ఖండించింది. ఈ అంశంలో అధికార, ప్రతిపక్ష పార్టీలు కుమ్మక్కయ్యాయని ఆరోపించింది.  పార్టీ కేంద్ర కార్యాలయంలో శనివారం సాయంత్రం ఏర్పాటు చేసిన విలేకరుల సమావేశంలో శాసన సభాపక్ష ఉప నేత శోభా నాగిరెడ్డి మాట్లాడారు.  రోగి కోరిందే వైద్యం లాగా అసెంబ్లీని నడిపారని ఆమె ఎద్దేవా చేశారు. మహానేత వైయస్ఆర్ మరణానంతరం అసెంబ్లీ సమావేశాల నిర్వహణ అస్తవ్యస్థంగా తయారయ్యిందన్నారు. అధికార, ప్రతిపక్ష పార్టీల వైఖరి వల్ల సమావేశాల నిర్వహణపై ప్రజలకు నమ్మకం పోయిందని ఆమె ఆవేదన వ్యక్తం చేశారు. తొలిరోజు నిర్వహించిన బీఏసీ సమావేశంలో వైయస్ఆర్ సీపీ శాసన సభా పక్ష నాయకురాలు శ్రీమతి వైయస్ విజయమ్మ మాట్లాడుతూ, ప్రజా సమస్యలను చర్చించడానికి సభను కనీసం 15 రోజులు నిర్వహించాలని కోరారనీ,  కంటి తుడుపు చందంగా  ప్రభుత్వం సమావేశాలను ఒక రోజు అంటే అయిదు రోజులకు పొడిగించిందనీ ఆమె చెప్పారు. ఆ సమావేశానికి ఇటు ముఖ్యమంత్రి గాని, అటు ప్రతిపక్ష నేత చంద్రబాబు గానీ హాజరుకాలేదనీ, వారు వచ్చి ఉంటే సమావేశాలు మరిన్ని రోజులు పొడిగించేందుకు అవకాశముండేదనీ ఆమె అభిప్రాయపడ్డారు. వారు రాని వైనం   ఆ పార్టీలకు సమావేశాలపై ఉన్న  ఆసక్తిని తేటతెల్లం చేసిందని పేర్కొన్నారు.  విద్యుత్తు, ఫీజు రియింబర్సుమెంటు, డీజిల్ ధర పెంపు, సిలిండర్ల సంఖ్య కుదింపు, తదితర అంశాలు చర్చించే అవకాశముండేదన్నారు. ఇలాంటి సమావేశాలను ఎప్పుడూ చూడలేదని దుయ్యబట్టారు. ప్రజా సమస్యలపై తాము రోజు వాయిదా తీర్మానాలు ఇచ్చామన్నారు. ప్రముఖ స్వాతంత్ర్య సమరయోధుడు కొండా లక్ష్మణ బాపూజీ మృతికి సంతాపం తెలపడం మినహా.. ఈ సమావేశాలలో జరిగిందేమీ లేదని శోభ తెలిపారు.