'షర్మిల సవాల్‌కు చేతనైతే బదులివ్వండి'

తెలంగాణలో ఉక్కు పరిశ్రమ ఏర్పాటు చేయడం ద్వారా ఆ ప్రాంత యువతకు ఉపాధి లభిస్తుందనే సదుద్దేశంతోనే రక్షణ స్టీల్సుకు మహానేత డాక్టర్ వై‌యస్ ప్రభుత్వం అనుమతిచ్చిందని‌ వారు తెలిపారు. జిఓ ఎం.ఎస్ 69/2000ను ప్రతిపక్షాలు పూర్తిగా చదివి మాట్లాడాలని‌ వారు సూచించారు. రక్షణ స్టీల్సుకు లాభాలు వస్తే అందులో 20 శాతం నిధులు స్థానిక ప్రాంత అభివృద్ధి కోసం వెచ్చించాలని‌ మహానేత వైయస్ షరతు విధించిన విషయాన్ని తెలుసుకోవాలన్నారు. రాష్ట్ర ప్రభుత్వరంగ సంస్థ ఎపిఎండిసికి గనుల తవ్వకం కేటాయింపునూ ప్రతిపక్షాలు విమర్శిస్తుండడం విడ్డూరం అన్నారు. ప్రజలకు వాస్తవాలు తెలియదని, తాము చెప్పే అబద్ధాలనే విశ్వసిస్తారనుకుంటే ప్రజలే తగిన బుద్ధి చెబుతారని హెచ్చరించారు.

దళితుల సర్వతోముఖాభివృద్ధికి మహానేత డాక్టర్ వై‌యస్‌ఆర్ ఎంతగానో పాటుపడ్డారని, దళితులకు ఆయన చేసినంత మేలు మరే ‌సిఎం చేయలేదని మారెప్ప తెలిపారు. పదవులు, పైరవీల కోసమే కాంగ్రెస్, ‌టిడిపి నేతలు వైయస్‌పై నోరుపారేసుకుంటున్నారని విమర్శించారు. విజన్ 2020 పేరుతో 420 పథకాలు పెట్టి దళితులు, ‌బిసిలను చంద్రబాబు నిండా ముంచారని దుయ్యబట్టారు. ‘రాష్ట్రంలో ఇప్పటి వరకూ ఎస్సీ కమిషన్ ఏర్పాటు చేయలేదు. 3 వేల ఎస్సీ, ఎస్టీ అట్రాసిటీ కేసులు పెండింగ్‌లో ఉన్నాయి. వీటి గురించి పట్టించుకోని ప్రభుత్వం ఆర్భాటాలతో కొత్త పథకాలు ప్రకటిస్తోంది. ప్రభుత్వ ప్రచారమే తప్ప వాటితో దళితులకు ఒరిగిందేమీ లేద’ని విమర్శించారు.