స్థానికులకే ఉద్యోగ అవకాశాలు కల్పించాలి

నెల్లూరు: జిల్లాలో పరిశ్రమలు స్థాపించేవారు స్థానికులకే అందులో ఉద్యోగ అవకాశాలు కల్పించాలని నెల్లూరు రూరల్‌ ఎమ్మెల్యే కోటంరెడ్డి శ్రీధర్‌రెడ్డి డిమాండ్‌ చేశారు. శనివారం ఏపీ స్టేట్‌ స్కిల్‌ డెవలప్‌మెంట్‌ కార్పొరేషన్‌ ఆధ్వర్యంలో హరనాథపురంలోని నారాయణ ఇంజనీరింగ్‌ కాలేజ్‌లో నిర్వహించిన జాబ్‌మేళా కార్యక్రమంలో ఎమ్మెల్యే పాల్గొన్నారు. ఈ సందర్భంగా ఆయన మాట్లాడుతూ..జిల్లాలో పరిశ్రమలు స్థాపించేందుకు రైతుల వద్ద నుంచి వేలాది ఎకరాల భూమి తీసుకుంటున్నారన్నారు. అయితే ఇందులో స్థానికులకు కాకుండా వేరే వారికి ఉపాధి కల్పించడం దుర్మార్గమన్నారు. వేలాది ఉద్యోగాలు కల్పిస్తామని రాతపూర్వకంగా హామీ ఇచ్చి నామమాత్రంగానే అవకాశాలు కల్పించడం సరైంది కాదన్నారు.