చిల్లర వ్యాపారంపై బాబు చిల్లర రాజకీయం

గుంటూరు, 8 డిసెంబర్‌ 2012: దేశ చిల్లర వర్తక రంగంలో విదేశీ ప్రత్యక్ష పెట్టుబడుల (ఎఫ్‌డిఐ) బిల్లుపై‌ రాజ్యసభలో ఓటింగ్‌ సందర్భంగా ముగ్గురు టిడిపి సభ్యులు గైర్హాజరవడాన్ని వైయస్‌ఆర్‌ కాంగ్రెస్‌ పార్టీ అధికార ప్రతినిధి అంబటి రాంబాబు తప్పుపట్టారు. ఇదంతా టిడిపి అధ్యక్షుడు చంద్రబాబు కుమ్మక్కు రాజకీయాలకు ప్రత్యక్ష ఉదాహరణ అని ఆయన అన్నారు. శ్రీ వైయస్ జగ‌న్మోహన్‌రెడ్డిని ప్రజాక్షేత్రంలో ప్రత్యక్షంగా ఎదుర్కొనే దమ్ము లేక, ఆయనను ఇబ్బంది పెట్టేందుకే కాంగ్రెస్ పార్టీతో ‌చంద్రబాబు కుమ్మక్కు అయ్యారని ఆయన ఆరోపించారు. శనివారంనాడు గుంటూరులోని జిల్లా పార్టీ కార్యాలయంలో జరిగిన విలేకరుల సమావేశంలో పార్టీ ముఖ్యనేతలతో కలిసి అంబటి మాట్లాడారు. చంద్రబాబు నాయుడు చీకటిలో బేరసారాలు ఆడుకుని కాంగ్రెస్ పార్టీతో చేతులు కలిపారని విమర్శించారు. దాని కంటే చిరంజీవిలా పార్టీని విలీనం చేసి కేంద్ర మంత్రి పదవి పొందాలని హితవు పలికారు.