ఎన్నికలపై వైయస్ఆర్‌సీపీ 4 రోజుల సమీక్ష

హైదరాబాద్:

సార్వత్రిక ఎన్నికలపై వైయస్ఆర్ కాంగ్రె‌స్‌ పార్టీ ఈ నెల 29 నుంచి నాలుగు రోజుల పాటు సమీక్షలు నిర్వహించనుంది. సీమాంధ్రలోని 13 జిల్లా కేంద్రాల్లో ఈ సమీక్షలు విడివిడిగా ఎక్కడికక్కడే జరుగుతాయి. సమీక్షా సమావేశాల నిర్వహణకు ఒక్కొక్క జిల్లాకు విడివిడిగా అనుభవజ్ఞులైన నేతలతో త్రిసభ్య కమిటీలను పార్టీ అధినాయకత్వం ఏర్పాటు చేసింది. సార్వత్రిక ఎన్నికల్లో ఆయా జిల్లాల్లో పార్టీ అభ్యర్థుల గెలుపు, ఓటములకు దారితీసిన పరిస్థితులపై ఈ సమీక్షలో లోతుగా అధ్యయనం, విశ్లేషణ జరుగుతుందని పార్టీ వర్గాలు పేర్కొన్నాయి.

లోక్‌సభ, శాసనసభ నియోజకవర్గాల్లో పార్టీ అభ్యర్థులుగా పోటీచేసిన వారు, ఎంపీలు, ఎమ్మెల్యేలు ఈ సమీక్షా సమావేశాల్లో ప్రధానంగా పాల్గొంటారు. ఈ నెల 29న నెల్లూరు, ప్రకాశం, చిత్తూరు, వైయస్ఆర్ కడప, 30న కృష్ణా, అనంతపురం, 31న కర్నూలు, విజయనగరం, శ్రీకాకుళం, జూన్ 1న తూర్పు, పశ్చిమ గోదావరి, గుంటూరు, విశాఖపట్టణం జిల్లాల్లో సమీక్షలు జరుగుతా‌యని ఆయా జిల్లాలకు పార్టీ వర్తమానం పంపింది.