జగన్ విడుదలకోసం ప్రభం'జనం'

అద్దంకి: వైయస్‌ఆర్ సీపీ అధినేత వైయస్ జగన్‌ మోహన్‌ రెడ్డి జైలు నుంచి బయటకు రావాలని..రాష్ట్రానికి మంచి పాలన అందించాలని ఆకాంక్షిస్తూ ఆ పార్టీ జిల్లా నాయకుడు వైవీ భద్రారెడ్డి శింగరకొండ వరకు చేపట్టిన పాదయాత్రకు అద్దంకిలో అపూర్వ స్పందన లభించింది. మద్దిపాడు మండలం గుండ్లాపల్లి నుంచి ప్రారంభమైన రెండోరోజు పాదయాత్ర సాయంత్రం 4 గంటలకు అద్దంకి పట్టణానికి చేరుకుంది. రామ్‌నగర్ వద్ద పార్టీ పట్టణ కన్వీనర్ కాకాని రాధాకృష్ణమూర్తి ఆధ్వర్యంలో కార్యకర్తలు, అభిమానులు ఎదురేగి పాదయాత్రలో పాల్గొన్న నేతలకు ఘన స్వాగతం పలికారు. భద్రారెడ్డికి మహిళలు హారతులిచ్చి ఆశీర్వదించారు. పట్టణంలోని బంగ్లారోడ్డులో అంబేద్కర్ విగ్రహానికి, ఎన్టీఆర్ నగర్‌లోని వైఎస్‌ఆర్ విగ్రహానికి భద్రారెడ్డి పూలమాలలు వేసి నివాళులర్పించారు. పాదయాత్ర శింగరకొండకు కిలోమీటరు దూరంలో ఉండగా జోరుగా వర్షం మొదలైంది. అంతటి జోరు వర్షాన్ని కూడా లెక్క చేయకుండా పాదయాత్రను కొనసాగించారు. వైయస్‌ఆర్ సీపీ కేంద్ర పాలకమండలి సభ్యుడు వైవీ సుబ్బారెడ్డి పాదయాత్ర ముగింపు కార్యక్రమానికి హాజరయ్యారు. శింగరకొండలోని ప్రసన్నాంజనేయస్వామి దేవాలయంలో వైవీ సుబ్బారెడ్డి, వైవీ భద్రారెడ్డి తదితరులు ప్రత్యేక పూజా కార్యక్రమాలు నిర్వహించారు.