డయాలసిస్ పేషెంట్ పింఛన్ తొలగింపు.. 

గుంటూరు జిల్లా ప్రత్తిపాడు నియోజకవర్గంలోని వట్టిచెరుకూరు మండలం కారంపూడిపాడు గ్రామానికి చెందిన సంధు వెంకటేశ్వరరావు జీవితం చివరి వరకు అనారోగ్యంతో పోరాడారు. 2019లో ఆయనకు కిడ్నీ వ్యాధి నిర్ధారణ కావడంతో అప్పటి నుంచి డయాలసిస్ చికిత్స పొందుతూ వచ్చారు. కుటుంబ ఆర్థిక పరిస్థితి బలహీనంగా ఉండటంతో వైయ‌స్ఆర్ కాంగ్రెస్‌ ప్రభుత్వం మంజూరు చేసిన డయాలసిస్ పింఛనే ఆయనకు ప్రధాన ఆసరాగా మారింది. ప్రతి నెల అందే రూ.10 వేల పింఛన్‌తోనే చికిత్స ఖర్చులు భరిస్తూ జీవనం కొనసాగించారు.

అయితే స్థానిక రాజకీయ పరిణామాలు వెంకటేశ్వరరావు కుటుంబాన్ని తీవ్ర ఆందోళనకు గురి చేశాయి. గ్రామానికి చెందిన టీడీపీ నాయకుడు టి. శ్రీనివాసరావు, మరికొందరిపై అక్రమంగా పింఛన్లు పొందుతున్నారంటూ ఏప్రిల్ 29న అధికారులకు ఫిర్యాదు చేశారు. ఈ జాబితాలో వెంకటేశ్వరరావు పేరు కూడా ఉండటం కుటుంబ సభ్యులను కలవరపరిచింది.

వెంకటేశ్వరరావు ఆరోగ్య పరిస్థితి గురించి, ఆయన పూర్తిగా డయాలసిస్ చికిత్సపై ఆధారపడి ఉన్నారని బంధువులు వివరించినప్పటికీ తమ వినతిని పట్టించుకోలేదని కుటుంబ సభ్యులు వాపోతున్నారు. పింఛన్ నిలిచిపోతుందనే భయం, చికిత్స ఎలా కొనసాగించాలనే ఆందోళన ఆయనను తీవ్ర మనోవేదనకు గురి చేసినట్లు గ్రామస్తులు చెబుతున్నారు. ఈ పరిస్థితుల్లోనే వెంకటేశ్వరరావు అకాల మరణం చెందడం గ్రామంలో విషాదాన్ని నింపింది.

ఈ ఘటనపై స్పందించిన వైయ‌స్ఆర్‌సీపీ ప్రత్తిపాడు నియోజకవర్గ ఇన్‌చార్జి బలసాని కిరణ్ కుమార్, జిల్లా పార్టీ అధ్యక్షుడు అంబటి రాంబాబుతో కలిసి మే 28న బాధిత కుటుంబాన్ని పరామర్శించారు. కుటుంబ సభ్యులకు ఓదార్చి, పార్టీ తరఫున పూర్తి అండగా ఉంటామని హామీ ఇచ్చారు.

ఈ సందర్భంగా బలసాని కిరణ్ కుమార్ మాట్లాడుతూ, తీవ్రమైన అనారోగ్యంతో బాధపడుతున్న వ్యక్తి పింఛన్‌పై ఆధారపడి చికిత్స పొందుతుంటే రాజకీయ కక్ష సాధింపు కోసం అతని జీవనాధారాన్ని దెబ్బతీయడం అమానవీయమని విమర్శించారు. వెంకటేశ్వరరావు మరణానికి కారణమైన పరిస్థితులపై సమగ్ర విచారణ జరిపి బాధ్యులపై చర్యలు తీసుకోవాలని డిమాండ్ చేశారు.

బాధిత కుటుంబానికి వైయ‌స్ఆర్‌సీపీ నేతలు అండగా నిలవడం పట్ల కుటుంబ సభ్యులు, గ్రామస్తులు కృతజ్ఞతలు వ్యక్తం చేశారు. అనారోగ్యంతో పోరాడుతున్న పేద కుటుంబాలకు రాజకీయాలు కాకుండా మానవత్వం అవసరమని గ్రామస్తులు అభిప్రాయపడుతున్నారు.